မတ်မလီု၊ နိုဝမ်ပါ ၅
နူကဵုဂကောံအလဵုအသဳပၞာန်တွဵုရးမန် သွက်ဂွံသ္အးကၠေံ ပရေၚ်ဗက်စ အဂတိမာန် ကော်ကောံဓရီု ဂကောံစဵုဒၞာ ပရေၚ်သ္အး အဂတိ တွဵုရးမန် (CPU) ဂှ် လလောၚ်ပတိတ်ပရိုၚ်ရ။
အပ္ဍဲနိုဝမ်ပါ ၃ ကၠောန်လဝ်ကောံဓရီု ပ္ဍဲရုၚ်ဂကောံအလဵုအသဳ တွဵုရးမန် ဍုၚ်မတ်မလီုဂှ်တှ်ေ ဒှ်ကောံဓရီု ကၠောန်လဝ်အလန်ပထမ လက်ထက်သ္ကိုပ်ဝန်ဇၞော် ဥူအံၚ်ဝေၚ်တာန် ဏံမဒှ်ရ။
အပ္ဍဲကောံဓရီုဝွံ နူကဵုဂကောံစဵုဒၞာ ပရေၚ်သ္အးဗက်စအဂတိဂှ်တှ်ေ စပ်ကဵုပရေၚ်ကဵုပညာ ဒစးဒုၚ်သ္အးကၠေံ ပရေၚ်အဂတိ အကြာသၞာဲဒါ ဌာန ဆေၚ်စပ်အဆံၚ်ၚ်တံကဵု ညးဍုၚ်ကွာန်တံဂှ် သွက်ဂွံကၠောန်အာ သ္ကိုပ်ဝန်ဇၞော် ဥူအံၚ်ဝေၚ်တာန် ဗတိုက်ဖအောဝ်လဝ်ရ။
တုဲပၠန် ပ္ဍဲတွဵုရးမန် ပရေၚ်စအဂတိတံ ညံၚ်ဂွံယအ်အောန်စှ်ေအာဂှ် နူကဵုဇီုဒိုဟ်နာနာ နကဵုနဲကဲစုၚ်ၚ် ဘိုၚ်ဂစာန်ဂိုတ်ဂစာန်ကဵုညိဂှ် သ္ကိုပ်ဝန်ဇၞော် ဥူအံၚ်ဝေၚ်တာန် ဟီုရ။
နူကဵုဂကောံအလဵုအသဳပၞာန် တွဵုရးမန် သွက်ဂွံဗတိုက်သ္အး ပရေၚ်ဗက်စအဂတိဂးတုဲ ကော်ကောံဓရီု ဆၜိုတ်သွက်ဂွံထ္ၜးစ ရ မဒှ်တုဲ နတဲဍာံဍာံမ္ဂး နူအဆံၚ်ညးတာလျိုၚ်သၠုၚ်အိုတ် စဵုစိုပ်သၞာဲဒါအဆံၚ်သၟဝ်တေံ ကၠောန်မံၚ်ပရေၚ်ဗက်စအဂတိတံ ပရေအ်မံၚ်ကွေံကွေံရဂှ် ညးဒေသတံ ဟီုရ။
မွဲလပါ်တေံပၠန် နူကဵုအလဵုအသဳပၞာန် နကဵုက္ဍိုပ်လိက် သွက်ဂွံဗတိုက်သ္အးကၠေံ ပရေၚ်ဗက်စအဂတိကေုာံ ပရေၚ်ကဵုပညာ နာနာတံဂှ် ကၠောန်မံၚ်ကီုလေဝ် ညးတာလျိုၚ်ဒပ်ပၞာန်တံကဵု သၞာဲဒါ နူကဵုဌာနဆေၚ်စပ်အဆံၚ်ၚ် စလာဘ်ဗဇဴ ကၠောန်မံၚ်ပရေၚ်အဂတိ တံဂှ် ဗွဲမစိုပ်တရဴ ကေတ်ကၠုၚ်အရေဝ် ဟွံမွဲပုဟ်။
အတိုၚ်လိက်ဒုၚ်စဳရေၚ် ဂကောံသုတေသန ISP-Myanmar မ္ဂး ပ္ဍဲကဵုဍုၚ်ဗမာ အခိၚ်သီအဝဵုလောန်ၜက် ကေုာံ ပ္ဍဲလက်ထက် အလဵုအသဳပၞာန်တံဂှ် ပရေၚ်အဂတိ ဒှ်မံၚ်သၠဲသၠဲလးလးတုဲ စိုပ်မံၚ် အကာဲအရာ ပရေအ်အိုတ်ရဂှ် ထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – MOI