ကျာ်ထဝ်၊ နိုဝမ်ပါ ၁၅
တွဵုရးမန် ပေါဲဗတိုက်အကြာၜါလပါ် ဒှ်မံၚ်ပ္ဍဲကဵုပွိုၚ်ဍုၚ်ကျာ်ထဝ်ဂှ် ညးဍုၚ်ကွာန် ၁၅၀၀၀ ပြၚ်ၚ် ဒးပါဲဒဴမံၚ်ဘဲပၞာန် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူကဵုနိုဝမ်ပါ ၃ ဂှ်တုဲ ဒၞာဲဂကောံဒပ်ပၠန်ဂတးတံ ဖျေံလဝ်သ္ဇိုၚ် ချဳဒရာၚ်မံၚ် အပ္ဍဲပွိုၚ်ဍုၚ်ကျာ်ထဝ်ဂှ် ဒပ်ပၞာန်ဗမာ ဇြဟတ် ၁၂၀၀ ပြၚ်တံ ထပက်ကၠုၚ်လဝ် ကရောၚ်ပၞာန် မဒှ်ရ။
ကွာန်ဇြဳပျံၚ် (၁) ကီု အကြာပွိုၚ်ဍုၚ်ကျာ်ထဝ် ကွာန်နွံမံၚ်တံဂှ် ကၠာကရောၚ်ပၞာန် ဟွံတိုန်ကၠုၚ်ကၠုၚ်ဏီဂှ်တှ်ေ ဒပ်ပၞာန်ဗမာ ဗက်ထဍိုၚ်ပန်မံၚ်ကဵု လွဟ်ဇၞော်တံ ကြဳဖျေံဗုမ် နူကဵုၜၚ်ကျာတံ ကၠောန်လဝ်ရ။
ဟိုတ်နူကရောၚ်ပၞာန်တံ ထပက်ကီု ပေါဲဗတိုက်ဒှ်လဝ်အကြာၜါလပါ်တံဂှ်နူကဵုကွာန် ကညေန်အိုၚ်၊ ခမံက်ခွေ၊ ကဝ်ကာတ်၊ ကျံက်ဖျာ၊ မိုဝ်ဗဝ်နတ်သေန်၊ ချံၚ်သံက်၊ ဇြဳပျံၚ် ၆ ကွာန်တံ အပံၚ်ဖအိုတ် ၜိုတ် ၁၅ ကွာန် ညးဍုၚ်ကွာန်တံ ဒးဂြိပ်တိတ်အာ မဒှ်ရ။
ဒဵုကဵု နိုဝမ်ပါ ၁၄ ဂှ် ပေါဲဗတိုက်အကြာၜါလပါ်တံ ဆက်ဒှ်မံၚ်ဖိုအ်တုဲ ညးဍုၚ်ကွာန်တံ နွံတိုန်ပၟိက် စၞစဇွောံမ ဂဥုဲဇဗနာနာ ပရေၚ်ဗစာရဏာမၞိဟ်တံ ဇၞော်ကဵုဇြဟတ်ရ။
အတိုၚ်ရဲကဵုမံၚ်ပရေၚ်အရီုဗၚ် ပါဲဘဲပၞာန်တံဟီုဂှ်တှ်ေ ပေါဲဗတိုက်အကြာပွိုၚ်ဍုၚ်ကျာ်ထဝ် ဆက်ဒှ်တ္ၚဲဂၠိုၚ်ဂၠိၚ်အာမ္ဂး ညးပါဲဘဲပၞာန်ဂမၠိုၚ် ဒးဆဵုဂဗကၠုၚ် ပရေၚ်အေၚ်ကၠောဝ်တံ ဒှ်မာန်ရောၚ် သ္ဂးရ။
ပ္ဍဲကဵုပရေၚ်လဝေၚ်ပၞာန် ပွိုၚ်ဍုၚ်ကျာ်ထဝ်ဂှ် နူကဵုဒပ်ပၞာန်ဗမာ လလောၚ်တြးပတိတ်လဝ်ပရိုၚ် ဒဒှ်ရသီဂွံလဝ် ဗဒိုပ်ဂကောံပၠန်ဂတးတံ ၁၁ ဒၞာဲ သီုကဵုဌာန်ဂအုပ်ရးတၟေၚ် အလဵုအသဳညဳသၟဟ်ကောန်ဂကူ NUG ကီုရ။
ဟိုတ်နူပေါဲဗတိုက် အကြာပွိုၚ်ဍုၚ်ကျာ်ထဝ်ဂှ် သွက်ပရေၚ်ဂီုကၠီုညးဒေသတံကီု ပရေၚ်ကဵုအရီုဗၚ်ဗစာရဏာမၞိဟ်တံကီု ပဵုတုဲ အခက်အခုဲ ဒှ်ကၠုၚ်မာန်ရောၚ် နူကဵု KNU လလောၚ်ပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo – CJ

