ယှဳကျေအ်ဖျေန်၊ ပူတေန်၊ ထရတံ ညးပိကာလဆဵုမ္ဂး သဳကၠဳအာပရေၚ်ယှအ်ဖျေံလွဟ်နျူရောၚ်

ဝါယှေန်တာန် ၊ နိုဝင်ဘာ ၁၅

ပ္ဍဲကဵုသဘၚ်သဳကၠဳ ဍုၚ်ယှာန်ကျေန်ဏံမ္ဂး ဒဝ်နေဝ်ထရ၊ ဗလာဒဳမာ ပူတေန် ကေုာံ ယှဳကျေအ်ဖျေန် က္ဍိုပ်သ္ကိုပ်ဍုၚ်အမေရိကာန်၊ ရတ်ယှာ ကဵု ကြုက်တံ ပိတၠ ဆဵုဂဗအလန်ပထမကၠာအိုတ်ရောၚ် နူကဵုသ္ၚိစၠတ်ဗတာၚ် ဟီုဂးဏာ ပ္ဍဲနဝ်ဝမ်ပါ ၁၃ ဂှ်ရ။

စိုပ်နိုဝမ်ပါ ၁၉ အဟိန်ညးပိတၠ ဆေၚ်မုက်သဳကၠဳအာညးသ္ကံမ္ဂး သွက်ဂွံယှအ်ဖျေံအာ တိုက်လွဟ်နျူကလဳယာတံ၊ စပ်ကဵုပေါဲပၞာန်အဳရာန်ဂှ်လေဝ်  ထရ စဳဇန်လဝ် မိက်ဂွံသဳကၠဳအာရ။

ဆဂး စပ်ကဵုပရေၚ်ပေါဲပၞာန် ယူခရုၚ်-ရတ်ယှာဂှ် သွက်ဂွံသဳကၠဳအာ ဟွံစၟဳစလဝ်ပုဟ် ညးတာလျိုၚ်အမေရိကာန်တံ ဟီုရ။

စပ်ကဵုပရေၚ်ပြဿနာနျူကလဳယာတုဲ တၚ်တုပ်စိုတ်မွဲမွဲဂကူ ဂွံမာန်ရောၚ်ဂှ် နကဵုညးတံ ဟွံစၟဳစလဝ်ပုဟ် ညးတာလျိုၚ်ဇၞော် အမေရိကာန်မွဲတၠ ဟီုရ။

ရတ်ယှာကဵု အမေရိကာန်တံ ပိုၚ်ပြဳလဝ် တိုက်လွဟ်နျူကလဳယာ ဇၞော်ဇၞော်နွံမံၚ်တုဲ ဍုၚ်ၜါဍုၚ်ဏံဟေၚ် သဳကၠဳအာညးသ္ကံ တိုက်ရိုက်ထေက်ရောၚ် ကြုက်ဟီုလဝ်ရ။

ရတ်ယှာ ဒေပ်စွံလဝ် မကမ်နူကလဳယာဂၠိုၚ်အိုတ်၊ အမေရိကာန် ပိုၚ်ပြဳလဝ် ဒုတိယဂၠိုၚ်အိုတ်တုဲ ဗွဲကြဴဂှ် ကြုက်နွံမံၚ် အတိုၚ် Stockholm International Peace Research Institute ချူလဝ် ဂွံတီရ။

သွက်ဂွံသဳကၠဳအာ ပရေၚ်ယှအ်ဖျေံလွဟ်ဏံ ရန်တၟံ ရတ်ယှာကဵုကြုက်တံ ဂွံပါလုပ်ဟာဂှ် သောၚ်ၚ်ကၠးကၠး ဟွံဂွံတီလဝ်ဏီပုဟ်။

အဟိန် ယှဳ၊ ပူတေန်၊ ထရတံ ညးပိတၠ ဆဵုဂဗမ္ဂး ရန်တၟံလဝ် သွက်ဂွံသဳကၠဳအာ ပရေၚ်ပေါဲပၞာန်အဳရာန်ရောၚ် ခယျလဝ်ဂှ် ညးတာလျိုၚ်အမေရိကာန်မွဲတၠ ဟီုရ။

ဆဂး ပ္ဍဲကဵုပရေၚ်ဆဵုဂဗသဳကၠဳဏံ သွက်ဂွံသဳကၠဳအာ ကိစ္စပေါဲပၞာန်ယူခရုၚ်ဟွံမွဲပုဟ် ဂွံတီရ။

သေဌဳဇၞော် တၠကာန်ပဏဳ Tesla ကေုာံ Space X အဳလောန်မာတ်သ် ပါဗက်အာကရောံ ထရ အာဍုၚ်ကြုက်ကီုလေဝ် ပ္ဍဲကဵုက္ဍိုပ်သ္ကိုပ်ပိတၠတံ ဆဵုဂဗညးသ္ကံဂှ် ညးပါလုပ်အာဟွံသေၚ်ဂှ် ညးတာလျိုၚ်တံ ဟီုလဝ်ရ။

Ref:Reuters

Leave a Reply

Your email address will not be published. Required fields are marked *