မနဳလာ၊ နိုဝင်ဘာ ၁၇
အကာဲအရာ ညးဍုၚ်ကွာန်ဗမာတံ ဒးဒုၚ်စသိုၚ်မံၚ် ဒဒိုက်နာနာတံဂှ် စိုပ်အာပ္ၚံက် အဆံၚ်ဇၞော်ဇၞော်ယျ ညးအုပ်ကာကုလသမဂ္ဂ အာန်တိုနီယို ဂူတာရက် ဟီုရ။
နိုဝမ်ပါ ၁၆ အခိၚ်နူဂယး ကၠောန်လဝ် ပေါဲသဳကၠဳ အာသဳယာန်-ကုလသမဂ္ဂ မရနုက် ၁၆ ဝါဂှ် ဂူတာရက် ဟီုဏာဂလာန် အတိုၚ်ဏံရ။
သွက်ဂွံစဵုဒၞာအာ ညးဍုၚ်ကွာန်ကောန်အရာပ်တံဂှ် အရီုဗၚ်ဗစာရဏာမၞိဟ်တံ ပရေၚ်ဒၞာတာဟွံမွဲ ညံၚ်ဂွံလုပ်စိုပ်အာ နကဵုဂကောံဆေၚ်စပ် သီုညးဖအိုတ်တံ သွက်ဂွံကဵုအခေါၚ်ပလံၚ်ဗစိုပ်အာ ညးဗတိုက်ဖအောဝ်လဝ်ရ။
ဂကောံဆေၚ်စပ် သီုညးဖအိုတ်တံ သွက်ဂွံစဵုဒၞာအာ ညးဍုၚ်ကွာန်ကောန်အရာပ်တံကီု ညံၚ်ဂွံမၚ်မွဲထိၚ်ဒဝ်အာ သၞောဝ်ဂၠးကဝ်တံဂှ် မိက်ဂွံဗတိုက်ဖအောဝ်ဏာ ဂူတာရက် ဟီုရ။
ဂကောံကဵုအရီုဗၚ်ဂမၠိုၚ် အန္တရာဲဟွံမွဲ စဵုဒၞာဟွံမွဲ ညံၚ်ဂွံကဵုအခေါၚ်လုပ်ကဵုအရီုဗၚ် ဍာ်ဇမၠိၚ်ဂှ် ညး ဗတိုက်ဖအောဝ်လဝ်ရောၚ်။
တၚ်တုပ်စိုတ်ဘုံ ၅ တၚ် အာသဳယာန်ဂှ် နကဵုကုလသမဂ္ဂ ထံက်ဂလာန်ဂှ် ဂူတာရက် ထပ်သ္ပဒတန်တုဲ ဗမာတံသီုဖအိုတ် ပါလုပ်အာက္ဍိုပ်တုဲ ညံၚ်ဂွံဂၠာဲအာသွဟ်မွဲဂှ် ဟီုလဝ်ရ။
ပရေၚ်ကိစ္စတမ်ရိုဟ် ဂွံဒှ်ပြဿနာတံဂှ် ဒးသောၚ်ကလးအာ နကဵုပရေၚ်ဍုၚ်ကွာန်တုဲ ပရေၚ်ပကီုပရာတ် ဗတိုက်မံၚ် ပ္ဍဲအလုံဍုၚ်မွဲ ဒးဒေါအ်ထောံရောၚ် ညးဟီုရ။
အခိၚ်ကၟာတ်လဝ်အခေါၚ် ဍုၚ်ဗမာ တိုန်ကောံဓရီုအဆံၚ်သၠုၚ် အာသဳယာန်ဂှ် ကလေၚ်ၜတ်ကၞာတ်အာ ပရေၚ်ထမံက်ရုပ်ရဴ တၚ်တုပ်စိုတ်ဘုံတံရောၚ် ဟီုလဝ်ရ။
တၚ်တုပ်စိုတ်ဘုံ ၅ တၚ်ဂှ် ကိုပ်ကၠာတေံ ဗမာတုပ်စိုတ်ကီုလေဝ် ခြာဟွံလံဏံ ကလေၚ်တးပါဲထောံရ။
အခိၚ်ပၞာန်ကျာတံ ဗတိုက်မံၚ် လၟိဟ်ညးဍုၚ်ကွာန် ကောန်အရာပ်တံ ချိုတ်ဂၠိုၚ်တိုန်မံၚ်ဏံ ဂလာန်ဗတိုက်ဖအောဝ် ဂူတာရက် မံက်တိတ်ကၠုၚ် မဒှ်ရ။
Ref:Bermana

