ဗြဝတဳ၊ နဝ်ဝေမ်ဗာ (၃၀)
ဒေသ တေအ်ဗဝ်ဗိုဝ်ကီု သီုကဵုမွဲဒမြိပ် ဂၠံၚ်ကွဳစက် ဗြဝတဳ−ဝဝ်လေဝ် နူအပ္ဍဲတိဍာ် ဒပ်မဟာ (၆) ဗော်သွးကောန်ဂကူကရေၚ် (KNU) တံဂှ် ကလေၚ်ထိၚ်ဒက်မာန်လဝ်ယျဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုနဝ်ဝေမ်ဗာ (၂၈) တုဲကၠုၚ်တေံရ။
ဒေသဖလူ၊ ကျံက်ခက်၊ တေအ်ဗဝ်ဗိုဝ်၊ ဝဝ်လေဝ် ဒေသ KNU မထိင်ဒက်လဝ်တံဂှ်ကဵု မွဲဒမြိပ်ဂၠံၚ်ကွဳစက် ဗြဝတဳ−ဝဝ်လေဝ်တံဂှ် ဒပ်ကံၚ်ဇြဳပၞာန် ထ္ပက်ပၞာန်ဗ္တိုက်လဝ် သီုဂၠံၚ်ကျာ သီုကရောၚ်ပၞာန်ဗလးတိ နကဵုဇြဟတ် လၟိဟ်ဗွဲမဂၠိုၚ်ဂၠေၚ်တုဲ သီုကဵုပန်ပှော်ဗ္တိုက်လဝ် နကဵုလွဟ်ပၞာန်ဇၞော်တံရ။
အခိၚ်လၟုဟ်ဂှ် ဒပ်ကံၚ်ဇြဳပၞာန် ကလေၚ်ထိၚ်ဒက်ဂွံ မွဲဒမြိပ်ဒေသဂှ်မာန်ယျဂးတုဲ သွက်ညးဒေသမဂြိပ်ဒဴပါဲဒလေတ်ဒၟံၚ်တံ ဂွံကလေၚ်ဖျေံသ္ဇိုၚ်တန်တဴအာ အပ္ဍဲကွာန်ဒေသဇကုတံမာန်ဂှ် ကံၚ်ဇြဳပၞာန်တံ ဗက်ကဵုဒၟံၚ်သမ္တီတံ နွံဂှ်လေဝ် ဂွံတီကေတ်ရ။
လ္တူတၚ်လလောၚ်တြး ဒပ်ကံၚ်ဇြဳပၞာန် ကလေၚ်ထိၚ်ဒက် တေအ်ဗဝ်ဗိုဝ်ကီု သီုကဵုမွဲဒမြိပ်ဂၠံၚ်ကွဳစက် ဗြဝတဳ−ဝဝ်လေဝ်တံမာန်တုဲ တိဍာ်ၜိုဟ်သြိုဟ်ဒၟံၚ်ယျဂှ် နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်ဒၟံၚ် ညးမၞုံအခေါၚ်ဟီုဂး ကရောၚ်ပၞာန်ကဝ်ဗရာ ကေုာံ ဗော်သွးကောန်ဂကူကရေၚ် KNU တံကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီရ။
အတိုၚ်ညးမၞုံအခေါၚ်ဟီုဂး ကရောၚ်ပၞာန်ကဝ်ဗရာ ချူထ္မံက်ထ္ၜးလဝ် လ္တူဇာဇၞိက်ပရေၚ်မၞိဟ်ညးဂှ်မ္ဂး ဗ္ဒိုပ်တေအ်ဗဝ်ဗိုဝ်ဝွံ ဒးကျအာလဝ် ဟွံသေၚ်တုဲ သ္ၚဳဂၠိပ်အကာဲအရာပရေၚ်ပၞာန်တုဲ ဂကောံဒပ်ပံၚ်ကောံတံ ဆုတ်ကလေၚ်ထောံ နူဒေသပၞာန်ဂှ်တုဲ ဂကောံဒပ်ပံၚ်ကောံတံဝွံ ဆုတ်ကလေၚ်လဝ် ဗွဲမဗၠးၜးမာန်တုဲ ဒပ်ကံၚ်ဇြဳပၞာန်တံ ထိၚ်ဒက်ဟွံမာန်ဏီပုဟ်ဂှ် တုဲကၠုၚ်ဟွံလအ်ဏံ ချူပ္တိုန်လဝ်ရ။
အပ္ဍဲဂိတုမေ တုဲကၠုၚ်တေံဂှ် ဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်သီလဝ် ဗ္ဒိုပ်ဒပ်တေအ်ဗဝ်ဗိုဝ် ကံၚ်ဇြဳပၞာန် မၞုံအပ္ဍဲတိဍာ်ဒပ်မဟာ (၆) ဂှ်တုဲ ဒပ်ကံၚ်ဇြဳပၞာန်ဝွံ သွက်ဂွံကလေၚ်သီကေတ် ဗ္ဒိုပ်တေအ်ဗဝ်ဗိုဝ်မာန်ကီု သီုဂၠံၚ်ကွဳစက် ဗြဝတဳ−ဝဝ်လေဝ်တံမာန်ဂှ် သုၚ်စောဲ ဇြဟတ်လွဟ်ဗွဲမဂၠိုၚ်ဂၠေၚ် လ္တူဂကောံဒပ် ပံၚ်ကောံတံတုဲ ထ္ပက်ဒၟံၚ်ပၞာန် ဗ္တိုက်ဒၟံၚ် ဒဵုကဵုဂိတုဏံ ဂိတုနဝ်ဝေမ်ဗာအိုတ်ဏံရ။
ပ္ဍဲပရေၚ်ပြုပြေၚ်ပၞာန် ကံၚ်ဇြဳပၞာန် အခိၚ်မလအ်ကၠုၚ် ဗ္ဒါဲ (၆) ဂိတုဂှ် သ္ကိုပ်ဗျူဟာ ကံၚ်ဇြဳပၞာန် မပါလုပ် ကောန်ဂကောံဒပ် ဂၠိုၚ်ကဵုကၠံ ချိုတ်အာလဝ်တုဲ မၞိဟ်ဂွံဝပ်ဇီုကပိုက်တံလေဝ် နွံလဝ် ဗွဲမဂၠိုၚ်ဂၠေၚ်ရ။
ပရိုၚ်−သြၚ်လောန်တိုၚ်(မ်)