ၜဳကလေၚ်၊ နဝ်ဝေမ်ဗာ (၃၀)
ပ္ဍဲကွာန်အေန်ဖလံၚ်၊ ဂကောံကွာန်ဇြေန်အေန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ပ္ဍဲဂိတုနဝ်ဝေမ်ဗာ (၂၉) ပယျာံဂယးဂှ် က္ဍိုပ်သ္ကိုပ်ပၞာန်ညးဍုၚ်ကွာန် ကံၚ်ဇြဳပၞာန်မွဲတၠ ဒးဒုၚ်ပန်ဂစိုတ်လဝ် ကဵုသေနာတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ၜိုတ်အခိၚ်ပယျာံဂယး (၁၀) နာဍဳကဝက်ဂှ် သၟာသေနာတ်ဟွံတီယၟု (၂) တၠ ပန်လဝ် ဥူဖုၚ်မျေတ်ကျဝ် မဒှ်က္ဍိုပ်သ္ကိုပ်ညးဍုၚ်ကွာန် ကၠုၚ်ကံက်ၚုဟ်ချေဝ် နူကဵုကွာန်တံၚ်ဇြောန် ပ္ဍဲကွာန်အေန်ဖလံၚ်ဂှ် နကဵုသေနာတ် ကြပ်ပ်ရ။
ဟိုတ်နူဒးဒုၚ်ပန်ပှော်လဝ် ကဵုသေနာတ်ဂှ်ရ က္ဍိုပ်သ္ကိုပ်ညးဍုၚ်ကွာန် ဥူဖုၚ်မျေတ်ကျဝ်ဝွံ ကလိဂွံလဝ်ဝပ်သေနာတ် ပ္ဍဲက္ဍိုပ် ကေုာံ သြိုဟ်တံဂှ်တုဲ အဃောမပလံၚ်ဏာ ရုၚ်ဂဥုဲညးဍုၚ်ကွာန် ပွိုၚ်ဍုၚ်ၜဳကလေၚ်ဂှ် ဒးချိုတ်အာလဝ်ရောၚ် ဂွံတီကေတ်ရ။
ဥူဖုၚ်မျေတ်ကျဝ် မဒးချိုတ်အာဂှ်ဝွံ ဒှ်ကောန်ဂကောံအုပ်ဓုပ် ကွာန်တံၚ်ဇြောန်ကဵု က္ဍိုပ်သ္ကိုပ်ပၞာန်ညးဍုၚ်ကွာန်တုဲ ဒၟါနူညးတုဲ မၞိဟ်မဒးဒုၚ်ရပ်ဒက်တံကဵု ဒးဂြိပ်ဒဴဒၟံၚ်တံလေဝ် နွံဂှ် ညးဒေသမွဲတၠ ဟီုရ။
ဂကောံလဵုပန်ပှော်လဝ် က္ဍိုပ်သ္ကိုပ်ပၞာန်ညးဍုၚ်ကွာန် ဥူဖုၚ်မျေတ်ကျဝ်ဂှ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်ကဵုလဝ် ဟွံမွဲဏီရ။
ပ္ဍဲပွိုၚ်ဍုၚ်ၜဳကလေၚ်ဂှ် ကြဴနူဒပ်ပၞာန်သီအဝဵုတုဲ သီုက္ဍိုပ်သ္ကိုပ်ပၞာန်ညးဍုၚ်ကွာန် သီုမၞိဟ်ကဵုပရိုၚ်တံ (၃၀) ပြၚ် ဒးဒုၚ်ပန်ပှော်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)