သေတ်ဒိုဲ၊ နဝ်ဝေမ်ဗာ (၃၀)
ပ္ဍဲတွဵုရးရခေၚ်ဂှ် ဂၠံၚ်ကုန်၊ ဂၠံၚ်ဍာ် လ္ပာ်ကံၚ်ဇြဳပၞာန်တံ မကၟာတ်လဝ် ဂၠိုၚ်ကဵုဂိတု နကဵုတၚ်ထ္ၜးဟိုတ် ပရေၚ်ပၞာန်တံဂှ် ကလေၚ်ပံက်ကဵုကီုလေဝ် ဟိုတ်နူအကာဲအရာၜါလ္ပာ် မၚ်ရံၚ်ဒၟံၚ်တံဂှ်ရ ဖျေံစိုတ်ဟွံဂွံဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပေါဲဗ္တိုက် ကလေၚ်မွဲဝါပၠန် ဒပ်ကံၚ်ဇြဳ ကဵု ဒပ်ပၞာန်ရခေၚ်(AA) တံတုဲ ဂၠံၚ်ကုန်၊ ဂၠံၚ်ဍာ် နူတွဵုရးရခေၚ်လ္ၚဵုတံဂှ် လ္ပာ်ကံၚ်ဇြဳပၞာန် ကၟာတ်လဝ် ဂၠိုၚ်ကဵုဂိတုကီုလေဝ် ကြဴနူဒေါအ်ပန်ပှော်ၜါလ္ပာ် ပ္ဍဲဂိတုနဝ်ဝေမ်ဗာ (၂၆) တုဲကၠုၚ်တေံတုဲဂှ် ကလေၚ်ပံက်ကဵုလဝ် ဂၠံၚ်လ္ၚဵုတံရ။
ပ္ဍဲကဵုတွဵုရးရခေၚ်ဂှ် ယတေအ်ဒံၚ်၊ ပူတဳဒံၚ်၊ ဂၠံၚ်ဇၞော် လ္ဂုၚ်−သေတ်ဒိုဲ၊ နူကဵုသေတ်ဒိုဲ ဂၠံၚ်အာ ပုဏ္ဏာကျောန်၊ ကျံက်ဒဝ်၊ မျံက်ဥူ မကၟာတ်လဝ်ဂၠံၚ်တံဂှ် ပ္ဍဲအကြာတ္ၚဲတံဏံ ကံၚ်ဇြဳပၞာန် ကလေၚ်ပံက်ကဵုလဝ်ရ။
ဆ္ဂး ဂၠံၚ်လ္ၚဵုတံဂှ် ကလေၚ်ပံက်ကဵုလဝ်ကီုလေဝ် ဟိုတ်နူအကာဲအရာၜါလ္ပာ် မၚ်ရံၚ်ဒၟံၚ်တံဂှ်ရ ဖျေံစိုတ်ဟွံဂွံဏီတုဲ ညးဍုၚ်ကွာန်ဗွဲမဂၠိုၚ်တံလေဝ် ဒးမၚ်ရံၚ်ဒၟံၚ်အကာဲအရာတံရောၚ် ညးမကဵုဒၟံၚ်အရီုဗၚ် ညးပါဲဒဴဘဲပၞာန်မွဲတၠဟီုရ။
“ပံက်ကဵုဂၠံၚ်ရဂှ် ဒှ်ရဲမၚ်ကျောဝ် ဟွံကဵုဗၠးနူမတ်တံဏောၚ်၊ ညးလဵုဂှ် မုကၠောန်၊ မဒါန်တံဂှ် ညးလဵုဂှ် ကဵုဒၟံၚ်ဗီုလဵု၊ ညးလဵုဂှ် သ္ကိုပ်သ္ကတုဲ ကၠောန်ဒၟံၚ်ရောဟီုဂှ် မၚ်ကျောဝ်ဒၟံၚ်ရ၊ အေဒၞါဲဂှ် ဟွံဒးကဵုမတ်ပုဟ် မွဲမွဲလ္ပာ် လညာတ်ဗၠေတ်အာ မွဲမွဲသာ်မ္ဂး မၞိဟ်ဂှ် ဍေံတံကၠုၚ်ဓဇက်ဂြဲဏာရဏောၚ်၊ ဒးဖေက်ဒၟံၚ် သီုဖအိုတ်တှ်ေ အလဵုညးဒေသတံဂှ် ဒးမၚ်ကျောဝ်ဒၟံၚ် အကာဲအရာတံဖိုဟ်ရ” သာ်ဝွံ ညးမကဵုဒၟံၚ် အရီုအဗၚ်ပရေၚ်ပါဲဒဴဘဲပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၜိုန်ရပံက်လဝ် ဂၠံၚ်တံကီုလေဝ် နကဵုညးပါဲဒဴဘဲပၞာန်ရခေၚ်တံ အခိၚ်လၟုဟ် သွက်ဂွံစဴဌာန်ဒၟံၚ်တံဂှ်လေဝ် အခက်ခုဲဒၟံၚ်ဖိုဟ်တုဲ ဖအောန်ဖျေံကဵုလဝ် စပ်ကဵုကၟာတ်လဝ် အခေါၚ်အာကၠုၚ် ကုလသမဂ္ဂကီု သီုဂကောံဗော်သွး အပ္ဍဲဍုၚ်၊ မ္ၚးဍုၚ် မကဵုဒၟံၚ်အရီုဗၚ် ကုရဲပါဲဒဴဘဲပၞာန်တံ နွံဟွံမွဲဂှ် ကံၚ်ဇြဳပၞာန် ကလေၚ်သှ်ကဵုလဝ် ဗွဲမလုပ်သၞောဝ်ဂှ် ဟွံမွဲဏီရ။
လာၚ်တရဴဍာ် ယှိုဲပျဳတာန် မဒေါအ်ဇူလဝ် ပွိုၚ်ၜါဂိတု ပ္ဍဲတွဵုရးရခေၚ်ဂှ်လေဝ် လာၚ်မဓဇက်ဂြိပ်ဒၟံၚ် ပွိုၚ်ဍုၚ်သေတ်ဒိုဲ၊ ယတေအ်ဒံၚ် ကေုာံ ပွိုၚ်ဍုၚ်ဗူတဳဒံၚ်တံဂှ် ကလေၚ်ဓဇက်ဂြိပ်ရဏောၚ် ပ္ဍဲဂိတုနဝ်ဝေမ်ဗာ (၂၈) တုဲကၠုၚ်တေံ လလောၚ်တြးလဝ်ရ။
သွက်ဂွံသောၚ်ကလး အခက်အခုဲညးဍုၚ်ကွာန်ရခေၚ်တံ မဒးဂဗဒၟံၚ်လၟုဟ်တံမာန်ဂှ်ကဵု သွက်ဂွံရီုဗၚ်ကဵု စပ်ကဵုပရေၚ်ဗ္စာရဏာမၞိဟ်တံမာန်ဂှ်တုဲ တုပ်လဝ်စိုတ် ပရေၚ်ဒေါအ်ပန်ပှော် ကေုာံ ပွမလုပ်ပ္ညဳပ္ညပ်အကြာတံရဂှ် ညးမၞုံအခေါၚ်ဟီုဂး ဒပ်ပၞာန်ရခေၚ် (AA) ဥူခိုၚ်သုခ ဟီုဂးလဝ်ရ။
ညးဒေသတံဂှ် စၟဳဒၟံၚ် သွက်ဂကောံပရေၚ်ရီုဗၚ်ဟံၚ်ပြာ်တံ သ္ဂောံကလိဂွံအခေါၚ် ကလေၚ်အာကၠုၚ်ဂွံ ပ္ဍဲပွိုၚ်ဍုၚ်ဗူတဳဒံၚ်၊ မာၚ်တဝ်၊ ယတေအ်ဒံၚ်၊ မျံက်ဥူ၊ မေန်ပျာ၊ မျေပုမ်၊ ပံက်တဝ် ကေုာံ ပွိုၚ်ဍုၚ်ကျံက်ဒဝ် မကၟာတ်လဝ် အခေါၚ်အာကၠုၚ် ကုလသမဂ္ဂ သီုဂကောံပရေၚ်ရီုဗၚ် နူအပ္ဍဲဍုၚ်တံ၊ မ္ၚးဍုၚ်တံဂှ် ဂွံတီကေတ်ရ။
အပ္ဍဲပေါဲဗ္တိုက်ကလေၚ်မွဲဝါပၠန် ပ္ဍဲရခေၚ်ဂှ် ညးဍုၚ်ကွာန်ကောန်အရာပ် ဗွဲမဂၠိုၚ်ဂၠေၚ် ဒးချိုတ်လဝ်တုဲ ဟိုတ်နူထပိုတ်ပန်ထပိုတ် ကံၚ်ဇြဳပၞာန်တံဂှ်တုဲ ညးဒေသတံဝွံ ဒးဆေၚ်လဝ်မုက်ကဵု အခက်အခုဲ လ္ပာ်ဇဳသာ်ရ။
ပရိုၚ်−သြၚ်လောန်တိုၚ်(မ်)