မတ်မလီု၊ နဝ်ဝေမ်ဗာ (၃၀)
အသေအဟာန် တ္ၚဲသၟတ်မန် မရနုက်ကဵု (၁၁) ဝါ ကၠုၚ်စိုပ်ဂိတုဒဳဇြေမ်ဗာ (၂၈) ဏံဂှ် ရန်လဝ် သွက်ဂွံကၠောန်ဗဒှ်အာ ပ္ဍဲတိဍာ်ဗော်ဍုၚ်မန်တၟိရောၚ် ဌာန်ကောံသၟတ်မန် (MYF) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲသၟတ်မန်ဂှ် ကၠောန်ဗဒှ်ကၠုၚ်လဝ် စနူကဵုသၞာံ ၂၀၁၂ တုဲကၠုၚ်တေံတုဲ သၞာံဏံမ္ဂး ပေၚ် မရနုက်ကဵု (၁၁) ဝါရ။
တ္ၚဲသၟတ်မန် သၞာံဏံဂှ် ဟိုတ်နူအကာဲအရာ ပရေၚ်ဍုၚ်ကွာန်လၟုဟ်တုဲ သွက်ဂွံကၠောန်ဗဒှ် ပ္ဍဲတိဍာ်ဗော်ဍုၚ်မန်တၟိဂှ် ရန်လဝ်ရ။
သွက်ဂွံကဵုအခေါၚ်ကၠောန်ဗဒှ် အသေအဟာန်တ္ၚဲသၟတ်မန်ဂှ် သွက်ဂွံပ္ညဳအာကဵု ညးတာလျိုၚ် လ္ပာ်ဗော်ဍုၚ်မန်တၟိ (NMSP) တံနွံဒၟံၚ်ဂှ် ညးမၞုံအခေါၚ်ဟီုဂး ဌာန်ကောံသၟတ်မန် (MYF) နာဲမျေတ်သဵု ဟီုရ။
“ရန်လဝ် ပ္ဍဲတိဍာ်ဗော်ဍုၚ်မန်တၟိညးတံဂှ် နွံရ၊ ၜိုန်ဂှ်ကီုလေဝ် သွက်ဂွံဂွံတၚ်ကဵုအခေါၚ်ကီု ညးတံဂှ် ပေါဲသ္ဘၚ်စပ်ကဵု ပရေၚ်ဂကူတံဂှ် ကဵုကၠုၚ်လဝ်ဒၞါဲ ဒုၚ်လဝ်တဲနွံရ၊ ဆ္ဂး အတိုၚ်အကာဲအရာပရေၚ်ဍုၚ်ကွာန်ဂှ်တှ်ေ ပိုယ်တံ ကၠောန်ဏောၚ်၊ ညးတံဒုၚ်တဲဗက် ညးတံဒးကဵုပရေၚ်ဂီုကၠီု ဗွဲမဒးရးဏောၚ်၊ အေဇှ် လ္ပာ်ညးတံ မာန်ဟာ ဟွံမာန်ဟာ အကြာပိုယ်ကဵုညးတံ ပ္ညဳကၠာတုဲမှ ဂွံတၚ်တုပ်စိုတ်တုဲမှ ဆက်ကၠောန်ဂွံဏောၚ်” သာ်ဝွံ ညးဟီုရ။
ဆ္ဂး အသေအဟာန် တ္ၚဲသၟတ်မန်ဂှ် ဟွံဂွံအခေါၚ်ကၠောန်ဗဒှ် ပ္ဍဲတိဍာ်ဗော်ဍုၚ်မန်တၟိမ္ဂး ကၠောန်ဗဒှ်ပ္ဍဲၝောံခန်မွဲမွဲဒၞါဲ လ္တူဍုၚ်မတ်မလီုတုဲ နူကဵုအန်လာၚ် သဵုယှေဝ်မဳဒဳယျာတံမွဲကဆံၚ် ဂလာန်ဗ္ကန်မိက်ဂွံကဵု ဗ္စိုပ်သၟတ်တံ ညံၚ်ဂွံစိုပ်ဂှ် သွက်ဂွံကၠောန်အာဂှ်လေဝ် ရန်တၟံလဝ်ရောၚ် နာဲမျေတ်သဵု သ္ဂးရ။
တ္ၚဲသၟတ်မန်ဝွံ ကၠောန်ဗဒှ်ကၠုၚ်လဝ် နကဵုတၚ်ရန်တၟံ သွက်ဂွံသ္ပဂါရဝ ကုက္ဍိုပ်သ္ကိုပ် မလုပ်လဝ်ပေါဲဗ္တိုက် သွက်အခေါၚ်အရာ ဂကူမန်တံကီု၊ အကြာဂကောံသၟတ်မန်ရေၚ်သ္ကအ် သွက်ပရေၚ်ဍုက်ကေဝ်ဒဒှ်ေဒယှ်တံ ဂွံဇၞော်ပၟဝ်တိုန်ကၠုၚ်တံ မဒှ်ရ။
တ္ၚဲသၟတ်မန် မရနုက်ကဵု (၁၀) ဝါတုဲကၠုၚ်တေံဂှ် ကၠောန်ဗဒှ်လဝ် ပ္ဍဲရာမညရဌ မၞုံဍုၚ်မတ်မလီု တွဵုရးဍုၚ်မန်ရ။
ကြဴနူဒပ်ပၞာန်သီအဝဵုတုဲဂှ် သၟတ်တံဝွံ ဒှ်ဒၟံၚ်ပွန် ကောန်ဂကောံဒပ်ကံၚ်ဇြဳပၞာန်တံ အဓိကတုဲ ဒးဒုၚ်ရပ်ဒက်ဒၟံၚ် ဂၠိုၚ်အိုတ်တုဲ ပ္ဍဲတွဵုရးဍုၚ်မန်ဂှ် အသိၚ်ချဳဒရာၚ် ကဏ္ဍပံၚ်ဇဳ စပ်ကဵုပရေၚ်သၟတ်တံဂှ် စှ်ေကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)