နေဗျဳဒဝ်၊ ဂျောန် (၉)
အ္စာ၊အ္စာၝောံ နူကဵုပရေၚ်ပညာသ္ဇိုၚ် မလုပ်လဝ် ပ္ဍဲချဳဒရာၚ်ဒစဵုဒစးအဝဵု CDM ဂှ် သွက်ဂွံကလေၚ်လုပ်ကမၠောန်တုဲ ကာလလုပ်ဂရၚ်ပ္တီ လက္ကရဴအိုတ်ဂှ် ထပ်ပပဵုလဝ်အယုက် စဵုကဵုဂိတုဂျောန် (၁၄) ပၠန်ရဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ကံၚ်ဇြဳပၞာန်သီအဝဵုဝွံ ကာလဂရၚ်ပ္တီလက္ကရဴအိုတ် အ္စာ၊အ္စာၝောံ CDM တံဂှ် တုဲကၠုၚ် ပ္ဍဲဂိတုမေ (၃၁) ၊ ဂိတုဂျောန် (၇) ဂှ် ဂရၚ်ပ္တီလက္ကရဴအိုတ်ဂးတုဲ စၟတ်လဝ်တုဲ အခါလၟုဟ်ဂှ်လေဝ် ဂိတုဂျောန် (၁၄) ဂှ် နဒဒှ်ကာလုပ်ဂရၚ်ပ္တီ လက္ကရဴအိုတ်တုဲ ထပ်စၟတ်ကၠုၚ်ပၠန်ရ။
ကံၚ်ဇြဳပၞာန်ဂှ် နကဵုညးဒုၚ်ကာပရေၚ်ပညာသ္ဇိုၚ်တံ အတိုၚ်ပၟိက်ဆန္ဒဇကုတံ သွက်ဂွံကလေၚ်ကေတ်တာလျိုၚ် ဗ္တောန်ထ္ၜးကဵုတံဂှ် ပ္ဍဲရုၚ်သ္ကိုပ်ပရေၚ်ပညာပွိုၚ်ဍုၚ် ပ္ဍဲဒၞါဲဘာ ဇကုမယိုက်ဂၠေၚ်လဝ်တာလျိုၚ် လက္ကရဴအိုတ် ဟွံသေၚ်မ္ဂး ပ္ဍဲရုၚ်သ္ကိုပ်ပရေၚ်ပညာပွိုၚ်ဍုၚ် ဒၞါဲမကြပ်ကဵု ဒေသမမံၚ်ဒၟံၚ်လၟုဟ်တံဂှ် သွက်ဂွံကေတ်အဆက်ကဵုပရိုၚ်ဂှ် ထပ်ကော်ဘိက်လဝ်ပၠန်ရ။
ကံၚ်ဇြဳပၞာန် သွက်ဂွံကလေၚ်လုပ်ကမၠောန်ဂှ် ၜိုန်ရကော်ဘိက်ဒၟံၚ်ကီုလေဝ် ပ္ဍဲသၟဝ်တဲကံၚ်ဇြဳပၞာန်တံဂှ် ဘိုအ်ဂွံကလေၚ်ကၠောန်ကမၠောန် ဟွံမွဲတုဲ အ္စာ၊အ္စာၝောံတံလေဝ် ကလေၚ်လုပ်အာ ကမၠောန်ဟွံသေၚ်ပုဟ်ဂှ် အ္စာၝောံဂအုပ်ဘာမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဌာနဝန်ဇၞော်ပရေၚ်ပညာ သၟဝ်တဲကံၚ်ဇြဳပၞာန်ဂှ် စဵုကဵုဂိတုဂျောန် စၟတ်တ္ၚဲ(၇) ဏံ အ္စာ၊အ္စာၝောံ CDM မကေတ်ကၠုၚ်အဆက် သွက်ဂွံကလေၚ်လုပ်ကမၠောန်ဂှ် (၂၉၀၀) ပြၚ် နွံတုဲ အ္စာ၊ အ္စာၝောံ CDM (၅၀) တၠ အပ္ဍဲဂှ်ဂှ် ကလေၚ်ကေတ်ဒၟံၚ်တာလျိုၚ် ဗ္တောန်ထ္ၜးကဵုဒၟံၚ်ယျရောၚ်ဂှ် သ္ဂးလဝ်ရ။
ဆ္ဂး အ္စာ၊ အ္စာၝောံ CDM ဗွဲမဂၠိုၚ်ဂှ် ဆလအ်မှ ဟွံကလေၚ်ကၠောန်ကမၠောန် သၟဝ်တဲကံၚ်ဇြဳပၞာန်သီအဝဵုတံရောၚ်ဂှ် သ္ဂုတ်သွာတ်လဝ်ရ။
အလုံမွဲကၟိန်ဍုၚ်ပြးဇး ဟိုတ်နူဟွံဒုၚ်တဲကုပွမသီအဝဵုတုဲ အ္စာ၊အ္စာၝောံ နူဌာနက္ဍိုက်ပ် ပရေၚ်ပညာသ္ဇိုၚ် ဂၠိုၚ်ကဵုဠက် ပါလုပ်လဝ် ပ္ဍဲချဳဒရာၚ်ဒစဵုဒစးအဝဵု CDM ဂှ်ရ။
အတိုၚ်စရၚ် ဌာနဝန်ဇၞော်ပရေၚ်ပညာ သၟဝ်တဲကံၚ်ဇြဳပၞာန် လလောၚ်တြးလဝ် ပ္ဍဲဂိတုဨပရဴ (၂၃) တေံဂှ်မ္ဂး ပၞောဝ်ကဵု ညးဒုၚ်ကာပရေၚ်ကောပ်ကာဲ ကဵု ပရေၚ်ပဗ္တောန်ထ္ၜး နူဌာနက္ဍိုက်ပ်ပညာသ္ဇိုၚ် အပံၚ်ဖအိုတ် (၄၅၀,၀၀၀) ပြၚ် နွံဂှ် (၁၂၀,၀၀၀) ပြၚ် လီုလဝ် တာလျိုၚ် သ္ဂောံယိုက်ဂၠေၚ်ရဂှ် ထ္မံက်ထ္ၜးလဝ်ရ။
ကံၚ်ဇြဳပၞာန်ဂှ် သွက်သၞာံဗ္တောန်ပညာ သၞာံဏံဂှ် စပံက်လဝ် ဘာပရေၚ်ပညာသ္ဇိုၚ်တံ ပ္ဍဲဂိတုဂျောန် (၂) ဂှ်တုဲ ကွးဘာပအပ်လဝ်ဘာ သွက်ဂွံတိုန်ဘာဂှ် (၅၆) ကိုဋ်ပြၚ် နွံဂှ် လလောၚ်ပ္တိတ်လဝ် ပ္ဍဲဂိတုဂျောန် (၁) တေံရ။
ပရိုၚ်−သြၚ်လောန်တိုၚ်(မ်)