လ္ဂုၚ်၊ ဂျောန် (၉)
ဟိုတ်နူတၚ်ပိုၚ်ကၞာတ် ကံၚ်ဇြဳပၞာန်သီအဝဵုတံတုဲ အပ္ဍဲဗွဝ်ဖျာ ဒးဂဗဒၟံၚ်ကဵု ကၠေၚ်စကၠေၚ်သတ်ဗြဴတံ ပိုတ်အိုတ်ရောၚ်ဂှ် တၠကမၠောန်ပရေၚ်သွံရာန်ကၠေၚ်သတ်ဗြဴကၠေၚ်စတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကၠေၚ်စကၠေၚ်သတ်ဗြဴတံဝွံ ဟိုတ်နူကံၚ်ဇြဳပၞာန် ထိၚ်လဝ်သြန်ဒဝ်ဠာကီု၊ ကၟာတ်လဒဵုလဝ် အခေါၚ်ပၠောပ်ကၠေၚ်သတ်ဗြဴ နူကဵုဍုၚ်သ္အာၚ်ကီု၊ ဟိုတ်နူဟွံဖျေံကဵု အခေါၚ်ကၠောန် အခေါၚ်ပၠောပ်ပ္တိုန်တံဂှ်ရ ဒးဂဗဒၟံၚ်ကဵု ပွမပိုတ်အိုတ်တံရ။
ဟိုတ်နူတၚ်ပိုၚ်ကၞာတ်သာ်ဏံတုဲ အပ္ဍဲဗွဝ်ဖျာ ကၠေၚ်သတ်ဗြဴကၠေၚ်စ ပိုတ်အိုတ်ဒၟံၚ် စဵုကဵု လလအ်ပွိုၚ် (၂) ဂိတု နွံကၠုၚ်ဣရ။
ဟိုတ်နူကၠေၚ်သတ်ဗြဴ ပိုတ်အိုတ်ဒၟံၚ်ဂှ်ရ အပ္ဍဲဗွဝ်ဖျာ ၚုဟ်ကလိုက်ကၟဵု ဟွံညိၚ်ဝတ် က္တဵုဒှ်ဒၟံၚ်တုဲ ပြဟ်ဟ်ဏံ ကၠေၚ်သၞေဝ်ကေဝ်တံဟေၚ် ဒးသ္ပဒၟံၚ် ပရေၚ်သွံရာန်ရဂှ် တၠကမၠောန်ပရေၚ်သွံရာန်ကၠေၚ်စကၠေၚ်သတ်ဗြဴ မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူမိက်ဂွံပိုၚ်ကၞာတ်ဒဝ်ဠာတုဲ ၝတံဏံ ပိုယ်တံ မပၠောပ်ဒၟံၚ် နူကဵုဍုၚ်သ္အာၚ်တံဂှ် ဍေံတံ ပိုၚ်ကၞာတ်ထောံ မွဲလစုတ်ရ၊ လၟုဟ်ဂှ် ၚုဟ်ကၠေၚ် အပ္ဍဲဗွဝ်ဖျာဂှ် ကၠေၚ်သတ်ဗြဴကၠေၚ်စ မကော်ဒၟံၚ် ကၠေၚ်ကၟာဂှ် ပိုတ်အိုတ်ဒၟံၚ် (၇)တ္ၚဲ (၁)သတ္တာဟတုဲ ကြပ် (၂) သတ္တာဟဟီုတှ်ေ က္တဵုဒှ်ဒၟံၚ် စဵုကဵု (၁၄) တ္ၚဲရ၊ လၟုဟ် မပိုယ်တံ သွံဒၟံၚ် အပ္ဍဲဗွဝ်ဖျာတံဂှ်မ္ဂး ဖံက်ကၠေၚ်သၞေဝ်ကေဝ်တံတုဲ ဒးသွံဒၟံၚ်ရ၊ ဂးဒၟံၚ် ကၠေၚ်သတ်ဗြဴ ကၠေၚ်ကၟာကီုလေဝ် ဍာံဍာံတေံ ပ္ဍဲဗွဝ်ဖျာဂှ် ပိုတ်အိုတ်ဒၟံၚ် လအ်ယျ” သာ်ဝွံ သ္ဂးရ။
ကၠေၚ်သတ်ဗြဴတံ ပိုတ်အိုတ်ဒၟံၚ်ဂှ်ရ အပ္ဍဲဗွဝ်ဖျာ ၚုဟ်သၠုၚ်တိုန်ကၠုၚ် မွဲဆမွဲတာန်တုဲ ကၠုၚ်စိုပ်အပ္ဍဲဂိတုဂတတံဏံ ထပ်တုဲ ဒးဂဗကၠုၚ်ကဵု ပြသၞာကၠေၚ်သတ်ဗြဴအောန်စှ်ေအာမာန်တံရောၚ်ဂှ် တၠကမၠောန်ပရေၚ်သွံရာန် ကၠေၚ်စကၠေၚ်သတ်ဗြဴတံ သ္ဂးအိုတ်ရ။
ၚုဟ်ကၠေၚ်သတ်ဗြဴဝွံ ကၠာဒပ်ပၞာန်ဟွံဂွံသီအဝဵုဂှ် မွဲပသာ မၞုံကၠုၚ် နူ (၂၄၀၀) ဒ္ကေဝ်ဓဝ်ဂှ် အပ္ဍဲဂိတုဂျောန်သၞာံဏံ ဒပ်ပၞာန်သီလဝ်အဝဵုဂှ် မွဲပသာ စဵုကဵု(၈၀၀၀) ဒ္ကေဝ် ၚုဟ်သၠုၚ်တိုန်ကၠုၚ် မွဲဆမွဲတာန်ရ။
ပ္ဍဲကၟိန်ဍုၚ်ဗၟာ ဟိုတ်နူ ကၠေၚ်စအပ္ဍဲကၟိန်ဍုၚ် ရုမ်မ်ဂပ်ပ် ဟွံမွဲဂှ်ရ လၟေၚ်သၞာံ လျိုၚ်တာန်ကၠေၚ် ဂၠိုၚ်ကဵုဠက် ဒးပၠောပ်ဒၟံၚ် နူကဵုဍုၚ်သ္အာၚ်တံရ။
ကၠေၚ်စတံဂှ် အဓိကပၠောပ်ဒၟံၚ် နူကဵုဍုၚ်အေန်ဒိုဝ်နဳယှာ၊ မလေဝ်ယှာ ကေုာံ ဍုၚ်သေံတံတုဲ သွံတြးဒၟံၚ်ရ။
ၚုဟ်ကၠေၚ်စတံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် စဵုကဵုဗဒါဲ (၄) ဆ ၚုဟ်သၠုၚ်တိုန်ကၠုၚ် မလုပ်ဗၞတ်ဗ္ၜတ်ရ။
ပရိုၚ်−သြၚ်လောန်တိုၚ်(မ်)