ဝေန်ယျေ၊ ဂျောန် (၉)
ပ္ဍဲဘာဗ္တောန်လိက်ဂမၠိုၚ် မၞုံအပ္ဍဲတိဍာ်ထိၚ်ဒဝ် ကဝ်တူလေဝ် ဗော်သွးကောန်ဂကူကရေၚ် KNU ဂှ် အပ္ဍဲသၞာံဗ္တောန်ပညာသၞာံဏံ လၟိဟ်ကွးဘာ သာတုဲဂၠိုၚ်ကၠုၚ်ဂှ်ရ တၚ်နွံပၟိက် ဗ္ဒမ်ဗ္တောန်လိက်ကဵု အ္စာ၊အ္စာၝောံတံ နွံကၠုၚ်ဂှ် ညးမၞုံအခေါၚ်ဟီုဂး KNU ဗဒိုဝ်သဝ်တဝ်နဳ ဟီုရ။
ပ္ဍဲဘာသၟဝ်တဲ ဌာနပရေၚ်ပညာ ကေုာံ ယေန်သၞာၚ် ကေအေန်ယူ (KECD) တံကဵု ဘာဗ္တောန်လိက်နအလဵုပူဂဵုတံ ပံၚ်ကောံဒက်ပ္တန်လဝ်တံဂှ် လၟိဟ်ကွးဘာ သၞာံဗ္တောန်ပညာ သၞာံဏံဝွံ လ္တူနူသၞာံကၠာတေံ သာတုဲ ဂၠိုၚ်ကၠုၚ်ရ။
ပြဟ်ဟ်ဏံဂှ် ပ္ဍဲဘာတန်သၠုၚ် မွဲဘာဓဝ်ဂှ် လၟိဟ်ကွးဘာကၠုၚ်စိုပ်ပအပ်လဝ်ဘာဝွံ နွံကၠုၚ်စဵုကဵု (၁၀၀၀) ပြၚ်ရ။
ပ္ဍဲဘာဗ္တောန်လိက် အပ္ဍဲတိဍာ်ထိၚ်ဒဝ် KNU ဂှ် ဟိုတ်နူလၟိဟ်ကွးဘာတံ သာဂၠိုၚ်ကၠုၚ်ဂှ်ရ သွက်ဒၞါဲမံၚ်တံဂှ် အခက်အခုဲနွံရောၚ် ဗဒိုဝ်သဝ်တဝ်နဳ ဟီုဂးလဝ် သာ်ဏံရ။
“ပၞာန်သီထောံအဝဵုတုဲ ဘာတံဂှ် ဒှ်အာဆဆဵုအိုတ်ရ၊ ဘာအပ္ဍဲကၟိန်ဍုၚ်တံဂှ် ဟွံဒှ်တိုန် ချိုတ်တ်ပၠိုတ်တ်အိုတ်ရ၊ ဒၞါဲမစုက် ဒၞါဲမကြပ်တံ စိုပ်ကၠုၚ်ဇရေၚ်ပိုယ်ရ၊ ပြသၞာဖဵုအဆက်လက္ကရဴဂှ် သွက်ဂွံဒုၚ်တဲကွးဘာဂှ် အခက်အခုဲဒၞါဲမံၚ်တံ နွံဒၟံၚ်ညိ” သာ်ဝွံ သ္ဂးရ။
ပ္ဍဲဘာဗ္တောန်လိက် KNU တံဂှ် လၟိဟ်ကွးဘာဂၠိုၚ်ကၠုၚ်ဂှ်ဝွံ ဟိုတ်နူဟွံမိက်တိုန်ဘာ ပ္ဍဲသၟဝ်တဲကံၚ်ဇြဳပၞာန်တံ မဒှ်ရဂှ် သ္ဂးရ။
ဟိုတ်နူလၟိဟ်ကွးဘာ ဂၠိုၚ်ကၠုၚ်ဂှ်ရ တၚ်နွံပၟိက်ကုအ္စာ၊အ္စာၝောံတံလေဝ် နွံကၠုၚ်ရဂှ် ညးဒုၚ်တာလျိုၚ် လလောၚ်ပရိုၚ် ဇာဇၞိက်ကွးဘာကရေၚ် KSNG သဝ်အေဝ်ကညဝ် ဟီုရ။
“ကွးဘာတံဂှ် တိုန်ကၠုၚ် တၟာဂလိုၚ်ရ၊ ဗွဲမဂၠိုၚ်ဂှ်တှ်ေ ကွးဘာနူလ္ပာ်ဗၟာတံ၊ ဟိုတ်နူကံၚ်ဇြဳပၞာန်တုဲ အကာဲအရာဟွံခိုဟ် ထေၚ်ကေတ်ရ၊ ကွးဘာတံ ဂၠိုၚ်ကၠုၚ်တုဲ ဒၞါဲမံၚ်တံလေဝ် နွံပၟိက်ကၠုၚ်၊ အ္စာ၊အ္စာၝောံတံလေဝ် နွံပၟိက်ကၠုၚ်” သာ်ဝွံ သ္ဂးရ။
ပ္ဍဲဌာနပရေၚ်ပညာ ကေုာံ ယေန်သၞာၚ်ကရေၚ် KNCD အပ္ဍဲတိဍာ် KNU ဂှ် တန်မူလ၊တန်ဒေါဝ်၊ တန်သၠုၚ်တံ မပါလုပ် ဘာဗ္တောန်လိက် ဂၠိုၚ်ကဵုကၠံ နွံဒၟံၚ်တုဲ လၟိဟ်ကွးဘာ စဵုကဵု ဗ္ဒါဲ(၁) ကိုဋ်ပြၚ် တိုန်စိုပ်ကတ်ဗ္တောန်ဒၟံၚ်ရ။
တုဲပၠန် ပ္ဍဲဘာပရေၚ်ပညာကဆံၚ်သၠုၚ်တံ မဒှ် ဘာကဝ်လိက်ဂျူနဳယျာ၊ ဘာကွတ်သ္ပအ္စာတံ ကေုာံ ဘာပူဂဵုပံၚ်ကောံဒက်ပ္တန်လဝ်တံဂှ်လေဝ် ညးမတိုန်စိုပ်ကတ်ဗ္တောန်ဒၟံၚ် ဂၠိုၚ်ကဵုလ္ၚီ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)