ဖၞုံဖေန်၊ ဂျောန် (၉)
ကာမ္ဗောဒဳယျာ ကဵု ဗေကျေန်တံ ကယျာန်ပါဲလဝ် လိက်ဒုၚ်စဳရေၚ် ညးတံ မသိုၚ်ခၞံဒၟံၚ် ဗ္ဒိုပ်ဒပ်ဍာ်ဒမၠုက် သွက်ဒပ်ဍာ်ကြုက် ဒဒှ်ရသ္ကိုပ်ဝန်ဇၞော်တၟိ အဝ်သတြေလျ ဂွိၚ်ဂွါဲဒၟံၚ် ကေုာံ အာတ်မိက်လဝ် ဒဒှ်မသောၚ်ကၠးမွဲညံၚ်သ္ဂောံနွံ ပ္ဍဲဂိတုဂျောန် (၇) တေံဂှ်ရ။
ဗ္ဒိုပ်ဖျေံသ္ဇိုၚ်ရဳယာမ် ကၟိန်ဍုၚ်ကာမ္ဗောဒဳယျာ မၞုံဒၟံၚ် ဗွဲမစှ်ေကဵုဗျူဟာ ပ္ဍဲပ္ၚံက်ဗလးၜဳသေံဂှ် နူကဵုဒပ်ဍာ်ကြုက် သွက်ဂွံစကာဗွဲမတၞဟ်ခြာတုဲ ဒဒှ်ရသိုၚ်ခၞံဒၟံၚ်ဂှ် နိဿဲကေတ် သၞာဲဒဴဍုၚ်ပလိုတ် ဟွံမိက်ထ္မံက်ယၟုဂမၠိုၚ်တုဲ Washington Post ထ္မံက်ထ္ၜးလဝ်ရ။
ယၚ်ဗ္ဒိုပ်ဖျေံသ္ဇိုၚ်ဂှ်ဝွံ ဒှ်ကၠုၚ်လဝ် ဒၞါဲပရေံမွဲ သၞာံမလအ်လ ပ္ဍဲပရေၚ်ဆက်ဆောံ အမေရိကာန်−ကာမ္ဗောဒဳယျာတုဲ ကြုက်ဝွံ ပရေၚ်အုပ်ဓလီုသြဇာဍုၚ်ဂၠးတိဍေံဂှ် နဒဒှ်မဂ္စါန်ဂြောပ်ဒၟံၚ် နကဵုဇာဇၞိက်ဗ္ဒိုပ်ဂမၠိုၚ်တုဲ ဒဒှ်ရပြံၚ်လှာဲစကာဒၟံၚ် ဒၞါဲဂှ်ဂှ် ဝါယှေန်တာန် သံသယနွံကၠုၚ်လဝ်ရ။
ဒုသ္ကိုပ်ဝန်ဇၞော် ကာမ္ဗေဒဳယျာ ပရက်သုတ်ဃောန်ဂှ် ပ္ဍဲအရာဆဵုဂဗကဵု ဝန်ဇၞော်ကာဍုၚ်သ္အာၚ် အဝ်သတြေလျ ပါန်နဳဝံၚ်ဂှ် ဒဒှ်ရတးပါဲလဝ် လိက်ဒုၚ်စဳရေၚ် ဟွံမွဲကဵုရိုဟ်ကၞက်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး မလလောၚ်ပ္တိတ်လဝ် ပ္ဍဲတ္ၚဲအၚာအခိၚ်မလဇုဲ နူကဵုဖၞုံဖေန်ရ။
“နကဵုကာမ္ဗောဒဳယျာ သွက်ဂွံသုၚ်စောဲ ဒပ်ပၞာန်ကြုက် ဗွဲမတၞဟ်ခြာ ဟွံသေၚ်မ္ဂး ဒၞါဲဂှ်ဂှ် ကၠောန်ညံၚ်ဂွံဖောအ်ဗြေဝ်တောတက် နဒဒှ်ဗ္ဒိုပ်ဖျေံသ္ဇိုၚ်ဒပ်ပၞာန်ဍေံဂှ် ဟွံကဵုအခေါၚ်ပုဟ်” သာ်ဝွံ ညးမၞုံအခေါၚ်ဟီုဂးအလဵုအသဳ ဟီုဂးလဝ်ကဵု AFP ရ။
ဝန်ဇၞော်ကာစဵုဒၞါ ကာမ္ဗောဒဳယျာကဵု ကလုတ်တမာန်ကြုက်တံဝွံ တိုန်စိုပ်အာ အသေအဟာန်ပံက် စမြိုၚ်တၟိ မၞုံပ္ဍဲရဳယာမ်ဂမၠိုၚ် မပ္တံကဵု ဆေၚ်ပလေဝ်ပလေတ်ဂၠုၚ် ကေုာံ ဒဒန်က္ၜၚ်တံရောၚ်။
ဆ္ဂး သ္ကိုပ်ဝန်ဇၞော်တၟိ အဝ်သတြေလျ Anthony Albanese မစိုပ်ကၠုၚ်အေန်ဒိုဝ်နဳယှာ သွက်ဂွံသၠုၚ်ပ္တိုန် ပရေၚ်ဆက်ဆောံကလုတ်တမာန်တုဲ သွက်ဂွံကလေၚ်တဲကဵု ကုဇြဟတ်ကြုက်မဇၞော်ကၠုၚ် အပ္ဍဲဒေသဂှ်ဝွံ စပ်ကဵုလိက်ဒုၚ်စဳရေၚ်ဂှ်တုဲ သ္ဇက်ဒးဂွိၚ်ရောၚ်ဂှ် ဟီုဂးလဝ်ရ။
“ကမၠောန်တံဏံဝွံ စပ်ကဵုတၚ်ရန်တၟံ ကေုာံ ညံၚ်သ္ဂောံဒှ်အထံက်အရီု ကုပရေၚ်ဂီုကၠီု ကေုာံ ပရေၚ်ညိၚ်ဝတ် အပ္ဍဲဒေသတုဲ ညံၚ်ဒဒှ်မသောၚ်ကၠးသ္ဂောံနွံ ပိုယ်တံ ဖ္တိုက်ဖ္အောဝ် ကုပေကျေန်ရ” သာ်ဝွံ ဟီုဂးလဝ်တုဲ ကာမ္ဗောဒဳယျာဝွံ ဗ္ဒိုပ်ဖျေံသ္ဇိုၚ်ရဳယာမ်ဂှ် ဒပ်ပၞာန်ဍုၚ်သ္အာၚ်လဵုမွဲမှ ဒဒှ်ရ ဟွံကဵုအခေါၚ်သုၚ်စောဲဗွဲတၞဟ်ခြာဂှ် ဟီုဂးလဝ်ရဂှ် ညးဟီုလဝ်ကဵု သၟာပရိုၚ်ဂမၠိုၚ်ရ။
အဝ်သတြေလျဝွံ စပ်ကဵုပေကျေန်သြဇာဇၞော်သၠဲတိုန် ပ္ဍဲဒေသပသိဖေတ်(ခ်) ဂှ်တုဲ ပွမဂွိၚ်ဂွါဲတံ ဂၠိုၚ်တိုန်ကၠုၚ်ဒၟံၚ်ရ။
အတိုၚ်မူဒမျိုၚ်လိက်ကသုက်တုပ်စိုတ် ကြုက် ကဵု ဂကောံတ္ကအ်သဝ်လမန် ပရိုၚ်မပြးအာ ပ္ဍဲဂိတုဨပရဴဂှ်မ္ဂး နူကဵုအဝ်သတြေလျ ပ္ဍဲကၟိန်ဍုၚ်တ္ကအ်ပသိဖေတ်(ခ်) မၞုံအခြာဇမ္ၚောဲ သၟဝ် (၂၀၀၀) ကဳလောမဳတာဓဝ်ဂှ် ကဵုအာအခေါၚ် ဒပ်ဍာ်ကြုက် တရးဖျေံစွံလဝ်ဒပ်ရောၚ်ဂှ်လေဝ် ပွမဂွိၚ်ဂွါဲဂမၠိုၚ် သၠုၚ်တိုန်ကၠုၚ်ဒၟံၚ်ဣရ။
Ref: CNA