လ္ဂုၚ်၊ ဂျောန် (၁၁)
ဟိုတ်ဒၟါနူ ပၟတ်ဓာတ်လလဳဟွံမှာန်ကီု သီုကဵုၚုဟ်ကၠေၚ်စက် သၠုၚ်တိုန်ကၠုၚ်ကီုတံတုဲ ရုၚ်စက်ဇိၚ်ဂၠိက်ယာတ် အပ္ဍဲကၟိန်ဍုၚ်ဗၟာ ဗ္ဒါဲသီုဖအိုတ် ဒးဂဗဒၟံၚ်ကဵု အကာဲအရာဒးဒေါအ်ဇူတံရောၚ်ဂှ် တၠကမၠောန်ရုၚ်စက်ဇိၚ်ဂၠိက်ယာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရုၚ်စက်ဇိၚ်ဂၠိက်ယာတ်တံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် ဟိုတ်နူပၟတ်ဓာတ်လလဳ ဟွံမှာန်တုဲ ဒးရပ်စပ်သုၚ်စောဲဒၟံၚ် ကၠေၚ်စက်တံ အဓိကဂှ်ရ ခရိတ်အိုတ်နာနာ ဇၞော်သၠုၚ်ကၠုၚ်တုဲ ကမၠောန်ဆက်တုဲ ဂွံဂေတ်ဂြိပ်ဂှ် ဒးဂဗဒၟံၚ်အခက်အိုတ်ရ။
အခိၚ်လၟုဟ်ဂှ် ကမၠောန်ဇိၚ်ဂၠိက်ယာတ်တံဝွံ ဟိုတ်နူပၟတ်ဓာတ်လလဳဟွံမှာန်တုဲ သွက်ရုၚ်စက်ဂွံဂေတ်ဂြိပ်ဂှ် မွဲတ္ၚဲမ္ဂး သွက်စရိတ်ကၠေၚ်စက်ဂှ် တန်တဴကဵုကမၠောန်ဍောတ်ဇၞော်တုဲ ဒးသုၚ်စောဲဒၟံၚ် ဂၠိုၚ်ကဵုကိုဋ်ရ။
ဟိုတ်ဂှ်ရ နကဵုကံၚ်ဇြဳပၞာန် စဵုကဵု ဂိတုဂျောန်အိုတ် ကဵုပၟတ်ဓာတ်လလဳ ဗွဲလၟေၚ်ၚ် ဟွံမာန်မ္ဂး ရုၚ်စက်ဇိၚ်ဂၠိက်ယာတ် ကြပ်သီုဖအိုတ် ဒေါအ်ဇူကၠုၚ်မာန်ဂှ် တၠကမၠောန်ရုၚ်စက်ဇိၚ်ဂၠိက်ယာတ်မွဲတၠ ဟီုရ။
“ဗလးကဵု ပၟတ်ဓာတ်လလဳ ဗွဲလၟေၚ်ၚ် ဟွံမာန်ရမ္ဂး လညာတ်ပိုယ်တံ ကဵုၚုဟ်ကၠေၚ်ဏံဂှ်တှ်ေ ၚုဟ်ကၠေၚ်ဂှ်လေဝ် မွဲလဳတာ ဗ္ဒါဲ (၃၀၀၀) ဒှ်ဒၟံၚ်တုဲ သွက်ဂွံဂေတ်ဂြိပ်ကဵု ပၟတ်စက်တံဂှ် ဒှ်ဟွံမာန်ပုဟ်၊ ဂွံပၟတ်မာန်ဟီုမ္ဂး အယောၚ်အလာခိုဟ်ကၠုၚ်မာန်ရ၊ ယဝ်ရ ဟွံဂွံပၟတ် လၟေၚ်ၚ်ရဟီုမ္ဂး ၜိုတ်ဂိတု(၆) အိုတ်၊ ဂိတု(၇) မံက်မ္ဂး ရုၚ်စက်မဒးဒေါအ်ဇူကမၠောန်တံ နွံကၠုၚ်ရဏောၚ်” သာ်ဝွံ တၠကမၠောန်ရုၚ်စက်ဇိၚ်ဂၠိက်ယာတ်မွဲတၠ ဟီုရ။
ကံၚ်ဇြဳပၞာန်သီအဝဵုဂှ် စနူဂိတုဂျောန်တုဲ မွဲတ္ၚဲ နူ(၉) နာဍဳ ပယျာံဂယး စဵုကဵု (၅) နာဍဳ ပယျာံသဝ်တ္ၚဲ ညံၚ်ကမၠောန်ဇိၚ်ဂၠိက်ယာတ် နူအပ္ဍဲရးလ္ဂုၚ်တံ သ္ဂောံဂွံပၟတ်ဓာတ်လလဳ ဗွဲလၟေၚ်ဂှ် ရေၚ်တၠုၚ်ကဵုရောၚ် ဟီုဂးလဝ်ကီုလေဝ် ဒဵုကဵုအခိၚ်လၟုဟ် မူရဴသာ်လဵုမှ ရေၚ်တၠုၚ်ကဵုလဝ် ဟွံမွဲဏီရ။
ကမၠောန်ဇိၚ်ဂၠိက်ယာတ် မဒးဆေၚ်ဒၟံၚ်မုက်ကဵု အခက်အခုဲနာနာသာ် သွက်ရုၚ်စက်ဂွံဂေတ်ဂြိပ်ဂှ်ဝွံ ဟိုတ်နူသြန်လုပ်ကဵုသြန်တိတ် ဟွံညဳတုဲ သွက်ဂွံကဵု သြန်ဂိတုညးဒုၚ်ကာတံဂှ် ဒးဂဗဒၟံၚ်အခက်အိုတ်ရဂှ် မာန်နေဂျာ ရုၚ်စက်ဇိၚ်ဂၠိက်ယာတ်မွဲတၠ ဟီုရ။
ပ္ဍဲကၟိန်ဍုၚ်ဗၟာဂှ် ရုၚ်စက်ဇိၚ်ဂၠိက်ယာတ် ဂၠိုၚ်ကဵုလ္ၚီ နွံဒၟံၚ်တုဲ သၟာကမၠောန် မ္ဒးဗ္ဒဗ္ဒါဲကၠောန်စဒၟံၚ် လ္တူကမၠောန်ဇိၚ်ဂၠိက်ယာတ်တံဂှ် (၇) ကိုဋ်ပြၚ် မၞုံဒၟံၚ်ရ။
ဆ္ဂး အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် သၟာကမၠောန်ဇိၚ်ဂၠိက်ယာတ် (၂) ကိုဋ်ပြၚ် ဒှ်အာကမၠောန်ကၟိတ်ဟွံမွဲရဂှ် ဂအုပ်ဂကောံကမၠောန်အလုံဂၠးတိ ILO လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)