မတ်မလီု၊ ဂျောန် (၁၂)
ပ္ဍဲတွဵုရးဍုၚ်မန် အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် ကမၠောန်ပရေၚ်သိုၚ်ခၞံ (၇၀) တၟံကၠံပြၚ် ဒးဒေါအ်ဇူကၠုၚ်ရဂှ် တၠကမၠောန်ပရေၚ်သိုၚ်ခၞံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ပရေၚ်သိုၚ်ခၞံတံဝွံ အပ္ဍဲကာလပၞာန်သီအဝဵုဂှ် ဟိုတ်နူၚုဟ်မးသြန်ဗၟာ သဝ်စှ်ေတုဲ ၚုဟ်ဒဝ်ဠာ သၠုၚ်တိုန်ကၠုၚ်ကီု၊ ကပေါတ်ဗၞိက်အပြောံ ပရေၚ်သိုၚ်ခၞံတံ ၚုဟ်သၠုၚ်တိုန်ကၠုၚ် ဂၠိုၚ်ကဵုဆဂှ်ကီု၊ သီုကဵု ၚုဟ်ကၠေၚ်စက် မပါလုပ် ခရိတ်အိုတ်နာနာ ဇၞော်သၠုၚ်ကၠုၚ်ဂှ်ရ ဒးဆေၚ်ဒၟံၚ်မုက်ကဵု ကျဟောံဗြံတံရ။
ကမၠောန်ပရေၚ်သိုၚ်ခၞံ မဒးဆေၚ်ဒၟံၚ်မုက်ကဵု ကျဟောံဗြံတံဝွံ အခါလၟုဟ်ဂှ် ကမၠောန်ဗွဲမဂၠိုၚ် ဒးဒေါအ်ဇူကၠုၚ်အိုတ်တုဲ ကမၠောန်ပရေၚ်သိုၚ်ခၞံဇၞော်ဇၞော် ၜိုတ်ညိညဟေၚ်ဓဝ်ရ ကၠောန်ကမၠောန်မာန်ဂှ် တၠကမၠောန် ပရေၚ်သိုၚ်ခၞံမွဲတၠ ဟီုရ၊
“အဲဂှ် ဒေါအ်လဝ် ပရေၚ်သိုၚ်ခၞံရ၊ ကဵုၚုဟ်နှေန်တံဂှ် ဟွံကိတ်တုဲ ကျမံၚ်ဏောၚ်၊ ကုမ္ပဏဳပိုယ်ဂှ် ဒှ်ဒၟံၚ် နူကဵုမ္ၚးဖအိုတ်ရ၊ ဂၠေံတုဲ ဒးစကာဒၟံၚ်ဂှ်ရ ဟွံကိတ်ပုဟ်၊ ဗွဲမဂၠိုၚ်ဂှ် ဒေါအ်ထောံအိုတ်ရ၊ ၜိုတ် (၇၀) ပြၚ် ဒေါအ်ထောံအိုတ်ယျ၊ လ္ၚဵုဂှ်တှ်ေ ကၠောန်ဒၟံၚ် ညိညဓဝ်ရ၊ လ္ပာ်စမြိုၚ်ဟီုမ္ဂး ဒေါအ်ထောံလဝ်ရ ဂၠိုၚ်၊ သွက်သၟာကမၠောန်ဇၞော်ဇၞော်တံပၠန်လေဝ် ကောန်ကမၠောန်တံ နွံဒၟံၚ် တၟာဂလိုၚ်တုဲ ဂွံဒေါအ်ထောံဂှ် ဟွံလောဲသွာပုဟ်” သာ်ဝွံ သ္ဂးရ။
တုဲပၠန် ကမၠောန်ပရေၚ်သိုၚ်ခၞံဇၞော်ဇၞော် မဆက်ကၠောန်ဒၟံၚ်တံဝွံလေဝ် ဒးရေၚ်တၠုၚ်ဒၟံၚ် အတိုၚ်လိက်ကသုက် မချူက်လဝ်တံဂှ်တုဲ ကမၠောန်ဂမၠိုၚ် တုဲဒှ်မ္ဂး သွက်ဂွံဒေါအ်ဇူကၠုၚ် နွံဒၟံၚ်ရောၚ်ဂှ် သ္ဂးရ။
မွဲလ္ပာ်ဂှ်ပၠန် ကမၠောန်ပရေၚ်သိုၚ်ခၞံတံဝွံ ပ္ဍဲကမၠောန်တိန်ဒါ နူကဵုဌာန သၟဝ်တဲကံၚ်ဇြဳပၞာန်တံ မကော်ဒၟံၚ်တံဂှ်လေဝ် တၟော်စဟွံကိတ်တုဲ ပွမရေၚ်တၠုၚ်ကမၠောန်မာန် ဟွံမွဲဂှ်ရ ကမၠောန်လ္ၚဵုတံ ဒးဆေၚ်ဒၟံၚ်မုက်ကဵု အကာဲအရာ ဒးဒေါအ်ဇူထောံဒတုဲရ။
ပ္ဍဲတွဵုရးဍုၚ်မန်ဂှ် သၟာကမၠောန် မကၠောန်စဗ္ဒဗ္ဒါဲဒၟံၚ် ကမၠောန်ပရေၚ်သိုၚ်ခၞံဂှ် ဂၠိုၚ်ကဵုဠက် နွံဒၟံၚ်တုဲ ဟိုတ်နူကမၠောန်ပရေၚ်သိုၚ်ခၞံတံ ဒးဒေါအ်ဇူကၠုၚ်ဂှ်ရ ဒးဆေၚ်ဒၟံၚ်မုက်ကဵု အခက်အခုဲ ပရေၚ်စသုၚ်မံၚ်စံၚ်ဗွိုက်လ္တက် သ္ၚိကၟိန်တံ ဇၞော်ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)