ဒဳမအ်ဇြော – မာတ်ချ်(၁)
တွဵုရးကရေၚ်ဍာဲ ပ္ဍဲဒဳမအ်ဇြော ကေုာံမိုဝ်ဗျာ ဖေဝ်ခုမ်တအ်ဂှ် ဟိုတ်နူလွဟ်ဇၞော်ကံၚ်ဇြဳပၞာန် ပန်ပှော်ဖျေံလဝ်တုဲ ညးဒေသၜါတၠ ချိုတ်လဝ်တုဲ ဂွံလဝ်ဘဲဝပ်တြဴတၠရဂှ် တမ်ရိုဟ်တၚ်ဂၞၚ်ပရိုၚ် ပ္ဍဲဒေသဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ(၂၇) အခိၚ်ဇိုၚ်သဝ်တ္ၚဲဂှ် သီုပေါဲဗတိုက်ဟၟဲမွဲသာ် ကံၚ်ဇြဳပၞာန်ပန်ဖျေံလဝ်လွဟ်ဇၞော် အဆက်က်ရ။
လွဟ်ဇၞော်ကံၚ်ဇြဳပၞာန်ဂှ် ဒၟာနူဒတုံပြဟ်ခတိုဟ်အာလဝ် ပ္ဍဲလပါ်ပလိုတ်ဒဳမအ်ဇြောတုဲ မၞိဟ်ဗြဴမွဲတၠ ဒးချိုတ်အာလဝ်ကီု လွဟ်ဇၞော် (၁၂၀-မမ) လေဝ် ဟိုတ်နူပြဟ်ဒတုံစှ်ေလဝ် ပ္ဍဲဗ္ဒာဲသ္ၚိ ဂကောံသ္ၚိကၟိန်ပါဲဒဴဘဲပၞာန်မွဲသ္ၚိတုဲ မၞိဟ်ဗြဴအာယုက်(၃၀)သၞာံမွဲတၠ ဇီုကပိုက်ဒး ကဝေက်လွဟ်တုဲ ချိုတ်အာလဝ်ရ။
ဟိုတ်နူလွဟ်ဇၞော် ပြဟ်စှ်ေခတိုဟ်လဝ် ပ္ဍဲသ္ၚိတာဲဂှ်ရ မၞိဟ်လုပ်ဂကောံကၟိန် သီု(၃)တၠ ဇီုက်ကပိုက်ဒးလဝ်တုဲ ဘဲဝပ်ပ္ဍဲတဲပါဲမၞိဟ်တြုံမွဲတၠ သၠေက်သၠံၚ်ဒၟံၚ်ကီု သီုကဵုဘဲဝပ်သ္ကာတ်မြဟ် ပ္ဍဲဂြၚ်ဂၞိၚ်မၞိဟ်ဗြဴမွဲတၠဂှ် အကာဲအရာဒးဒှ်ဒၟံၚ် ဓဝိၚ်ရ။
လွဟ်ဇၞော်ကံၚ်ဇြဳပၞာန် ပ္ဍဲလပါ်မ္ၚးကွာန် ဒဝ်တမဂျဳဂှ် (၅)မ၊ ပ္ဍဲကဵုကွာန်ဒဝ်ညေခူဂှ် (၃)မ ဒတုံပြဟ်ခတိုဟ် အာလဝ်တုဲ ကောန်ကွာန်ဒဝ်ညေခူ မၞိဟ်တြုံ (၂)တၠ ကေုာံမၞိဟ်ဗြဴ မွဲတၠ ဂွံလဝ်ဘဲဝပ်တုဲ ပ္ဍဲကဵုမၞိဟ်ဂွံလဝ်ဘဲဝပ်တအ်ဂှ် မၞိဟ်အာယုက်ဇၞော် (၇၅)သၞာံ ဃောပလံၚ်ဏာဒၟံၚ်ရုၚ်ဂဥုဲမွဲတၠ ဒးချိုတ်အာလဝ် အကြာဂၠံၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် M-120 နူကဵုဗျူဟာပၞာန် ဖျေံသ္ဇိုၚ်ဗဝ်လခေဝ် ပ္ဍဲလ္ပာ်ဒဳမအ်ဇြော သ္ကုတ်ဗၟံက်ဏီရ။
ဟိုတ်နူဒပ်ကံၚ်ဇြဳပၞာန်ဖျေံသ္ဇိုၚ်ဖေဝ်ခုမ် ပန်ပှော်လဝ်လွဟ်ဇၞော်ဂှ်ရ လွဟ်ဇၞော်စှ်ေလဝ် ပ္ဍဲကွာန်လ္ပာ်ပလိုတ်မိုဝ်ဗျာ၊ ဖေဝ်ခုမ်တအ်တုဲ မၞိဟ်တြုံအာယုက်(၂၇)သၞာံမွဲတၠကဵု မၞိဟ်ဗြဴအာယုက်(၄၇)သၞာံမွဲတၠ ဇီုကပိုက်ဂွံလဝ်ဘဲဝပ်ရဂှ် PDF မိုဝ်ဗျာ လလောၚ်တြးလဝ် နကဵုစၟတ်တ္ၚဲ တ္ၚဲဏံရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲဂှ် ပွမဗတိုက်ပန်ပှော် ပ္ဍဲကဵုတွဵုရးကရေၚ်ဍာဲ နကဵုက္ၜၚ်ကျာ၊ ထ္ပက်ကရောၚ်ပၞာန် ပသောၚ်သ္အးတိဍာ် ကေုာံ ပရေၚ်ပန်ပှော်လွဟ်ဇၞော်တုဲ ပရေၚ်ညးပါဲဘဲပၞာန် ကေုာံ ကောန်အရာပ်တအ် ဒးချိုတ်လဝ် (၄၃၀) တၠ နွံကၠုၚ်ဒၟံၚ်ရဂှ် ဂကောံဇြဟတ်တဴတက်ကရေၚ်ဍာဲ လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ