မတ်မလီု – မာတ်ချ်(၁)
သွက်ဂွံသၠုၚ်ပ္တိုန်အသိၚ်ပရေၚ်ပၠန်ဂတးက္ညၚ် ဗတိုက်သရိုဟ်ပ္တိတ်ဒၟံၚ် တၠအဝဵုပၞာန်ဂှ် သမ္မတယာယဳ အလဵုအသဳညဳသၟဟ်ကောန်ဂကူ ဒူဝါလယှဳလ ဗတိုက်ဖ္အောဝ်လဝ် ဂကောံအလဵုအသဳတအ်ရ။
ပ္ဍဲကောံဓရီုဂကောံအလဵုညဳသၟဟ်ကောန်ဂကူ မရနုက်ကဵု (၈)ဝါ ကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၈) ဂှ် ဟီုသ္ဂးကၠုၚ်လဝ် သာ်ဏံရ။
“အလုံညးဍုၚ်ကွာန်တအ်သီုဖအိုတ် က္ဍုဟ်မၠေံဒၟံၚ် ပွဂကောံကံၚ်ဇြဳပၞာန် ဓဇန်ကြာန်တအ်ရ။ ဟွံယှအ်တဲ ဟွံဒုၚ်ကျ ဂကောံပၞာန်တုဲ သွက်ဂွံလုပ်အာပေါဲဗတိုက် စဵုကဵုတုဲဒှ် ဒဵုစိုပ်ဒတုဲဂှ် ပၟိက်ဆန္ဒ ဃောသ္ကာတ်မြဟ်ဒၟံၚ်ဖိုဟ်ဏီရ။ နကဵုအလဵုအသဳ ညးလုပ်ဂကောံကာတ်ဗိနေတ်ပိုဲလေဝ် အတိုၚ်အသိၚ်အာဒၟံၚ်လၟုဟ်ဏံ ဟွံကဵုယအ်အောန်စှ်ေတုဲ ဆက်ဂိုတ်ဂစာန် ဒးသၠုၚ်ပ္တိုန်အာ အသိၚ်ဏောၚ်” ဂှ် သမ္မ NUG ယာယဳ ဒူဝါလယှဳလ ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲသၟဝ်တဲတၠအဝဵုပၞာန်ဂှ် ပၞော်တိတ်/ဂၠံၚ်တရဴ ပရေၚ်တဴတက် ကၟိန်ဍုၚ် ကေုာံ ညးဍုၚ်ကွာန်တအ်ဟၟဲကီု အခိၚ်လၟုဟ်ဏံမ္ဂး အလဵုအသဳညဳသၟဟ်ကောန်ဂကူဂှ် ဒက်ပ္တန်လဝ် နကဵုကောန်ဂကူကောန်ဍုၚ်အရၚ် စုၚ်လေၚ်တုဲ သွက်ဂွံသၠဲတြးပ္တိတ်အာဂှ်လေဝ် ပၟိက်ဆန္ဒ နွံဒၟံၚ်ကီု NUG ဟေၚ် ဒုၚ်ကဵုလျိုၚ် ပရေၚ်ဍုၚ်ကွာန်ညိၚ်ဝတ် ကေုာံ ဒုၚ်ကဵုလျိုၚ် ပရေၚ်ဓလိုက်တမ်ရိုဟ် နူကၟိန်ဍုၚ်နာနာမာန်ရဂှ် ညးဟီုသ္ဂးလဝ်ဏီရ။
ဟိုတ်ဂှ်ရ နကဵုကၟိန်ဍုၚ်ဇိုၚ်ဝိုတ်ဒိုဟ်ဂမၠိုၚ် ဟိုတ်နူပရေၚ်သီအဝဵု ကေုာံပရေၚ်ပ္ကီုပရာပ်အရိုဟ်ဒဒှ်တ္ၚဲတုဲ ဒပ်ပၞာန်ထံက်ရံၚ်ကဵု တၚ်ကော်ချဴကောန်ဍုၚ်အရၚ် ညးဍုၚ်ကွာန်ကောန်ကၟိန်ဍုၚ်ဗၟာတအ် ဒးဒုၚ်ကော်ဒၟံၚ်ချဴဂှ်တုဲ သွက်ဂွံဒတူလာၚ်ကဵုဂှ် အာတ်မိက်လဝ်ဏီရ။
ပ္ဍဲကၟိန်ဍုၚ်ဗၟာလၟုဟ်ဏံဂှ် ဟိုတ်နူဂကောံပၞာန်တုဲ ညးဍုၚ်ကွာန်ဂမၠိုၚ်ကဵုကိုတ် ဒးထောံလသာလဝ်သ္ၚိဌာန် ဒးဂြိပ်ဒဴဒၟံၚ်တုဲ ဒးမံၚ်ဒၟံၚ်နဒဒှ် သၟာဒဒိုက်ဂြိပ်ဒဴဘဲပၞာန်ကီု ဂကောံဒပ်ပၞာန်ဂှ် ပ္ကီုပရာပ်ဒၟံၚ်ညးဍုၚ်ကွာန် ဟၟဲကဵုဒုဟ်ဒဏ်တအ်တုဲ ပြိုက်ဂစိုတ်ဒၟံၚ် အရိုဟ်ဒဒှ်တ္ၚဲကီု ကလိလောန်ဒၟံၚ် ပွပ္ကီုပရာပ် အိုတ်ဒၟံၚ်ဍာ်အှော်ရဂှ် သမ္မတယာယဳ ဟီုသ္ဂးလဝ် ပ္ဍဲကောံဓရီုဂှ်ရ။
ကောံဓရီုအလဵုအသဳညဳသၟဟ်ကောန်ဂကူဂှ် သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန်ကီု သီုကဵုဝန်ဇၞော်ကၟိန်ဍုၚ်၊ ဒုဝန်ဇၞော်ဂမၠိုၚ် တိုန်စိုပ်လဝ်ရ။
ပရိုၚ်-သြၚ်လောန်တိုၚ်(မ်)