ကအ်သံၚ်၊ မာတ်ချ်(၁)
ပ္ဍဲပေါဲဗ္တိုက်ကွာန်ဝိုၚ်ဒေန်၊ ပွိုၚ်ဍုၚ်ကအ်သံၚ်၊ ရးဒေသဇၞော်တၞၚ်သဳဂှ် ကောန်ဒပ်ကံၚ်ဇြဳပၞာန် (၄) တၠ ချိုတ်အာလဝ်ရောၚ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကအ်သံၚ် ဗိုလ်မုၚ်တိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဖေဖဝ်ဝါရဳ (၂၇) အခိၚ်ပယျာံဂယး ၜိုတ် (၁၁) နာဍဳဂှ် ဒပ်ပံၚ်ကောံ KTLA ကေုာံ တမ်ဒပ်(၁) ခရိုၚ်ကအ်သံၚ်တံ နူကဵုအာစိုပ်ဗ္တိုက်လဝ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ဝိုၚ်ဒေန်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော် မွဲလ္ပာ်ကုမွဲလ္ပာ်တံ က္တဵုဒှ်လဝ် လလအ်ဗ္ဒါဲကဵုနာဍဳတုဲ ကောန်သ္ဂံၚ်ပဳဒဳအာဖ်မွဲတၠ နူလ္ပာ်ဂကောံဒပ်ပံၚ်ကောံစဵုဒၞါညးဍုၚ်ကွာန်တံ ကလိဂွံလဝ်ဝပ် ဟွံဒးဂွိၚ်ဂှ် ညးဒုၚ်တာလျိုၚ် ဗိုလ်မုၚ်တိုၚ် သ္ဂးရ။
ကြဴနူပေါဲဗ္တိုက်တုဲ စဵုကဵုဖေဖဝ်ဝါရဳ (၂၈) ပယျာံဂယးဂှ် ကံၚ်ဇြဳပၞာန်ဝွံ ပန်ပှော်ဗ္တိုက်လဝ် ကုကွာန်ပွဳပွူဗ္ဒါဲဗ္ဒါဲ ကွာန်ဝိုၚ်ဒေန်ဂမၠိုၚ် နကဵုလွဟ်ဇၞော် ဟွံပိုတ်သ္ကုတ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဖေဖဝ်ဝါရဳ (၂၁) တုဲကၠုၚ်တေံ ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲကွာန်ဝိုၚ်ဒေန် ပဳဒဳအာဖ်တံ မအုပ်ဓလီုလဝ်ဂှ်တုဲ က္တဵုဒှ်လဝ်ပေါဲဗ္တိုက်ရ။ လက္ကရဴဂှ်တုဲ ဒပ်ကံၚ်ဇြဳပၞာန်ဝွံ ဆက်ဖျေံလဝ်ဒပ် ပ္ဍဲကွာန်ဝိုၚ်ဒေန်ရ။
ဟိုတ်နူပေါဲဗ္တိုက်ဝိုၚ်ဒေန်တုဲ ညးဒေသ ဗ္ဒါဲ (၁၀၀၀) နူကဵုကွာန်ဝိုၚ်ဒေန်၊ ပါကလာပ် ကေုာံ အံၚ်သာယျာ သီုကဵုကွာန်ဗ္ဒါဲဗ္ဒါဲတံဂှ်ဝွံ ဒးဂြိပ်ဒဴပါဲဒလေတ်ဒၟံၚ် လ္ပာ်သေံတေံကဵု ပ္ဍဲဒဵုဂြိုပ်မကြပ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)