မတ်မလီု-မာတ်ချ်(၂)
ပရေၚ်ဆက်ဆောံ ကေုာံကၟိန်ဍုၚ်ကြုက် ကၟိန်ဍုၚ်ဇိုၚ်ဝုတ်ဒိုဟ်လေဝ်ဒှ်၊ ကၟိန်ဍုၚ်ဇြဟတ်ဇၞော်လေဝ်ဒှ်ဂှ် ညံၚ်ဂွံနွံကဵုပရေၚ်ညဳသၟဟ်မွဲ ချပ်စန်စာတုဲ သွက်ဂွံဒက်ပ္တန်အာ ပရေၚ်ဆက်ဆောံ နွံဒၟံၚ်ပၟိက်ရဂှ် သ္ကိုပ်ဝန်ဇၞော်အလဵုအသဳပရေၚ်ညဳသၟဟ်ကောန်ဂကူ မာန်ဝေန်ခိုၚ်တာန် ဟီုသ္ဂးလဝ်ရ။
ပ္ဍဲကောံဓရီုအလဵုအသဳပရေၚ်ညဳသၟဟ်ကောန်ဂကူ မရနုက်ကဵု(၈)ဝါ ကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၈)ဂှ် ဟီုသ္ဂးလဝ်သာ်ဏံရ။
“ဇြဟတ်ပရေၚ်ပၠန်ဂတးဍာံဍာံဇေတ်တ်ဂှ် ၜိုန်ရနွံဒၟံၚ် ပ္ဍဲဍုၚ်ကီုလေဝ် အကာဲအရာပရေၚ်ပၞာန် ပ္ဍဲဍုၚ်၊ အကာဲအရာပရေၚ်ဍုၚ်ကွာန်ဟေၚ် ဟွံသေၚ်တုဲ ပရေၚ်ထံက်ပၚ် နူဍုၚ်သ္အာၚ်၊ ပရေၚ်တပ်ဒဏ်ကၟာတ်လဒဵု၊ ဂၠံၚ်တရဴ သွက်အရီုဗၚ်ထံက်ပၚ်ပရေၚ်မၞိဟ် တတ်ကၠောံပယျဵုဒၞက်တအ် မပ္တံဗီုဏံ ကဏ္ဍဂွံက္လိဂွံမာန်ဂှ်လေဝ် ပြံၚ်သၠာဲကဵု သၠဒကေဝ်ပရေၚ်ပၠန်ဂတးမာန်ဒၟံၚ်ဂှ်ရ ဒှ်ကဏ္ဍဒးပ္တိတ်ဇြဟတ်ဏောၚ်” ဂှ် သ္ကိုပ်ဝန်ဇၞော် အလဵုအသဳညဳသၟဟ်ကောန်ဂကူ မာန်ဝေန်ခိုၚ်တာန်ဟီုသ္ဂးလဝ်ရ။
သ္အာၚ်နူဂှ်ပၠန် ဟိုတ်နူပရေၚ်ဖံက်ပ္ကဝ်အခေါၚ်အရာမၞိဟ်ကံၚ်ဇြဳပၞာန်တုဲ သွက်ဂွံဆက်မံၚ်တန်တဴအာ ပ္ဍဲကၟိန်ဍုၚ် ဒှ်ဟွံမာန်ဂှ်ရ သွက်သၟာပရေၚ်ပၠန်ဂတးချဳဒရာၚ်ကတိုက်ကၟဟ် စိုပ်ကၠုၚ်ဒၟံၚ် ပ္ဍဲပယျဵုဒၞက်ကေုာံ CDM တအ်ဂှ် ညံၚ်ဂွံက္လိဂွံအခေါၚ်မံၚ်စံၚ် ဂီုကၠီုၜိုတ်ထေက်ကြိုက်မာန် ဒးဘိုၚ်ပ္တိတ်ကဵုဇြဟတ်ရောၚ်ဂှ် ဗတိုက်ဖ္အောဝ်လဝ် ဂကောံအလဵုအသဳရ။
အလဵုအသဳပရေၚ်ညဳသၟဟ်ကောန်ဂကူဂှ် ဟိုတ်နူဒှ်အလဵုအသဳပၠန်ဂတးဂှ်ရ အရာဒးစဳမာန်ရေၚ်တၠုၚ် တၚ်နွံပၟိက်ပရေၚ်ပၠန်ဂတးတအ်ဂှ် ဟွံကဵုထောၚ်ပြိုဟ်အာတုဲ မွဲလပါ်ဂှ်လေဝ် ညံၚ်ယန္တရာအလဵုအသဳမွဲ ဂွံဂေတ်အာပေၚ်ၚ်မာန် သွက်ဂွံဘိုၚ်ရေၚ်တၠုၚ်ကဵုဂှ် ဟီုသ္ဂးလဝ်ရ။
ကြဴနူဂှ် ဌာနဝန်ဇၞော်ပရေၚ်ညးဗြဴ၊ သၟတ်ကေုာံသၟတ်ကောန်ၚာ်ဂှ် စပ်ကဵုမူဝါဒကဵုပရေၚ်စဵုဒၞာဆေၚ်စပ်ကဵုပရေၚ်ပလာပ်ပထုဲ၊ ပ္တိတ်ပရဲ၊ ပ္ကီုပရာပ်လိၚ်တုဲ ပတိုန်ထ္ၜးသဳကၠဳကၠုၚ်လဝ် နွံရ။
ကောံဓရီု ဂကောံအလဵုအသဳညဳသၟဟ်ကောန်ဂကူဂှ် သမ္မတယာယဳဒူဝါလယှဳလ၊ သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန်ကီု သီုကဵုဝန်ဇၞော်ကၟိန်ဍုၚ်၊ ဒုတိယဝန်ဇၞော်ကၟိန်ဍုၚ်ဂမၠိုၚ် ကေုာံညးတာလျိုၚ်ဂမၠိုၚ် တိုန်စိုပ်လဝ်ရ။
ပရိုၚ်-သြၚ်လောန်တိုၚ်(မ်)