ၜၚ်ကံက်၊ မာတ်ချ် (၄)
မၞိဟ်တြုံ (၁၅) တၠ ဟိုတ်နူဒက်က္ဍိုပ်သ္ပလဝ်အဓမ္မ ကုသၟတ်ဗြဴ အာယုက် (၁၄) သၞာံမွဲတၠဂှ်တုဲ သွက်သ္ဂောံဂွံပွဗဗွဲဓဝ်ဂှ် ဌာန်ရိုဟ်ကၞက်မၚ်မွဲကောန်ၚာ်သၟတ် ကၠောန်သ္ပစန်ဒက်ဖ္တိုက်ဖ္အောဝ်ဒၟံၚ်ရောၚ်ဂှ် ပ္ဍဲကဵုပရိုၚ်မဳဒဳယျာတံ ထ္မံက်ထ္ၜးဒၟံၚ်ရ။
ပ္ဍဲကဵုမၞိဟ်တံဏံ မၞိဟ်တြုံ (၁၁) တၠဂှ်ဝွံ ယိုက်ဂၠေၚ်ဒၟံၚ်တာလျိုၚ် နဒဒှ်သၞာဲဒဴဗၠာဲသၟိၚ်သေံတုဲ ပ္ဍဲတွဵုရးလဳယော သ္ကုတ်ဗၟံက်သၟဝ်ကျာဍုၚ်သေံဂှ် အပ္ဍဲပွိုၚ် (၂) သၞာံ သ္ပလဝ်အဓမ္မ ကုသၟတ်ဗြဴပၠိုၚ်ၚ်ဂှ် ဂၠိုၚ်ၚ်ကဵုဝါရောၚ် ချိၚ်ခယျကေတ်ရ။
ညးတာလျိုၚ် နူကဵုဌာန်ရိုဟ်ကၞက်မၚ်မွဲကောန်ၚာ်၊ ညးသၟတ် ကေုာံ ဂြောဝ်ဂတာတံဂှ်ဝွံ သွက်အမှုသၟတ်ဗြဴအာယုက် (၁၄) သၞာံ မဒးဒုၚ်သ္ပအဓမ္မကဵုဂကောံသ္ကအ်ဂှ် ညံၚ်ပရေၚ်ဗဗွဲဓဝ်သ္ဂောံနွံ ပလံၚ်ဗစိုပ်ကဵုလဝ်လိက် ဇရေၚ်ဝန်ဇၞော်ပရေၚ်သၞောဝ်ဓဝ်တံရောၚ်ဂှ် ဌာန်ပရိုၚ် KhaoSod ကေုာံ Daily News တံ ထ္မံက်ထ္ၜးလဝ်ရ။
နူသၞာံ ၂၀၂၁ ဂိတုမာတ်ချ် စဵုကဵုအပ္ဍဲသၞာံ ၂၀၂၃ ဂိတုဂျာန္နဝါရဳဂှ် မၞိဟ်တြုံ (၁၅) တၠ ဒက်က္ဍိုပ်တုဲ မသ္ပလဝ်အဓမ္မ ကုသၟတ်ဗြဴပၠိုၚ်ၚ်ဂှ်တုဲ ပ္ဍဲကဵုဍေံတံဂှ် ဗၠာဲသၟိၚ်ဨကရာဇ်သေံတံ ဟွံအောန်နူကဵု (၁၁) တၠ ပါလုပ်ဒၟံၚ်ရောၚ်ဂှ် သ္ဂးရ။
အတိုၚ်ဌာန်ပရိုၚ် KhaoSod ပလံၚ်ဗစိုပ်ကဵုလဝ်ပရိုၚ်ဂှ်မ္ဂး သၟတ်ဗြဴမ္ဒးဒုၚ်ကလိလောန်ဂှ်ဝွံ ဒၟါနူကဵုပရေၚ်သ္ပအဓမ္မကဵုဂကောံသ္ကအ်ဂှ်တုဲ ကလိဂွံလဝ်ဒၟုၚ်ဒလေၚ်ယျဂှ် ဂွံတီကေတ်ရ။
ညးမၞုံတာလျိုၚ် နူဗ္ဒိုပ်ဗၠာဲသၟိၚ်ချာဲကလောန်တံဂှ် ရပ်ဒက်လဝ် သၞာဲဒဴဗၠာဲသၟိၚ် မၞုံသံသယ (၁၁) တၠဂှ်တုဲ ပ္ဍဲကဵုညးတံ (၅) တၠဂှ် ဗလးကဵုလဝ် နကဵုလျိုၚ်ရ။ သၟေဟ်တြဴတၠဂှ် ဒးဒုၚ်ကယျာန်ပါဲလဝ် ပွမကေတ်ကဵုလျိုၚ်တံရောၚ်ဂှ် ဂွံတီကေတ်ရ။
မၞိဟ်သံသယနွံပန်တၠ ထပ်ပါလုပ်ဒၟံၚ်ရောၚ် ၜိုန်ရချိၚ်ခယျဂွံကီုလေဝ် ထ္မံက်ပ္တိတ်ဟွံမာန်ဏီတုဲ အခိၚ်လဵုရပ်ဒက်ဂွံရောဟီုဂှ်လေဝ် ဟွံဂွံတီကေတ်ဏီပုဟ်ဂှ် သ္ဂးရ။
သၞာဲဒဴကဵုကသပ် နူကဵုဌာန်ရိုဟ်ကၞက်ဂှ် သၞာဲဒဴဗၠာဲသၟိၚ် ကဆံၚ်မၞုံဒုဂအုပ်ဗၠာဲသၟိၚ်မွဲတၠဂှ်ဝွံ က္ဍိုက်လဝ်က္ဍိုပ် ကုပရေၚ်သ္ပအဓမ္မကဵုဂကောံသ္ကအ် ကရောံကောန်ရဲတဝ်ခွါညး (၁၀) တၠဟွံအောန်ဂှ်ရောၚ်ဂှ် သ္ဂးရ။
ညးမဒးဒုၚ်ကလိလောန်ဂှ်ဝွံ ၜိုန်ရဂြိပ်တိတ်အာလဝ် နူအပ္ဍဲတွဵုရးမသ္ပဒတဴဂှ်ကီုလေဝ် ဒဒှ်ရဆက်ဒးဒုၚ်ဒၟံၚ် ပွပလာပ်ပထုဲ နူဂကောံဒပ်ဗၠာဲသၟိၚ်ဏံဖိုဟ်ဂှ် သၞာဲဒဴကဵုကသပ်ဂှ် သ္ပဒတန်ဟီုဂးလဝ်ရ။
ဟိုတ်နူမၞိဟ်နွံသံသယ မဗၠးၜးကၠုၚ် ဗွဲမဂၠိုၚ်တံဂှ်တုဲ နကဵုညးမဒးဒုၚ်ကလိလောန်ဂှ် ဟွံဂီုကၠီုပုဟ်ရောၚ် ဒုၚ်ဂိုၚ်ကေတ်ဂှ်ရ သွက်ဂွံသၠုၚ်ပ္တိုန်အမှုဂှ်ဂှ် ညးမဒှ်မသကလောကောဒေံဂမၠိုၚ် ကဵုဒၟံၚ်ဇြဟတ်ဂရိုဟ် ကုသၟိၚ်တၠအဝဵုတံကီုရ။
ဂြောဝ်ဂတာသၟတ်ဗြဴ မဒးဒုၚ်ကလိလောန်ဂှ်ဝွံလေဝ် ဒှ်ညးမတ်ဟွံညာတ်တံတုဲ မိဇၞော် ကေုာံ မိယာဲ အဝဲဟွံခိုၚ်ကၠိုက်တံသၟးနွံဂှ်ရ ဂြောဝ်ဂတာဂှ်ဝွံ ဒဒှ်ရအန္တရာယ်နွံဒၟံၚ်ဂှ် ဌာန်ရိုဟ်ကၞက်ဂှ် ဟီုရ။
နကဵုဌာန်ရိုဟ်ကၞက်ကောန်ၚာ်ဂှ် မ္ၚးနူကဵုအာတ်မိက် သွက်ပရေၚ်ဂီုကၠီုဂြောဝ်ဂတာတံကဵု သွက်ပွဗဗွဲဓဝ်တံဂှ် ရပ်စပ်အာအမှုဏံ နဒဒှ်ပရေၚ်လ္ၚတ်ဒဒှ်ဍာံတုဲ သွက်သ္ဂောံစိုပ်တရဴ သာခိုဟ်တိုန်ဂှ် ကၠောန်လဝ်ဏီရ။
နကဵုဌာန်ရိုဟ်ကၞက်ဂှ် ပ္ဍဲကဵုလၟေၚ်ကမၠောန်ပရေၚ်စဳရေၚ်ဂဗုတ် ဌာနဝန်ဇၞော်ဂှ် သွက်ဂွံဂၠိုက်ဂၠါဲကဵု တၚ်ဍိုန်လျကဵု တၚ်ဂွံဇြဟတ်တံဂှ် ဆက်ပံက်လဝ်ဂဗုတ် ဇရေၚ်ဌာနဝန်ဇၞော်ပရေၚ်သၞောဝ်ဓဝ် နကဵုတၚ်အာတ်မိက် (၃) တၚ်ရ။
ဂဗုတ်ဏံဝွံ တုပ်ဒၟံၚ်ကဵု လၟေၚ်ဒဒှ်သ္ပအဓမ္မကဵုဂကောံသ္ကအ် ကုကောန်ၚာ်သၟတ် အာယုက် (၁၄) သၞာံ လအာတုပ်သာ်ဏံ နူသၞာံ ၂၀၁၆ ပ္ဍဲခရိုၚ်ဖာန်ၚ ဗွဲမလောန်ရောၚ်ဂှ် ဟီုဂးလဝ်တုဲ မၞိဟ်သံသယနွံ (၄၀) ပြၚ်ဂှ် ထ္မံက်ပ္တိတ်မာန်လဝ်ရ။
မၞိဟ်တြုံတံဏံဝွံ တက်လဝ်ဗဳဒဳယော ကုအမှုသ္ပအဓမ္မဂှ်တုဲ သုၚ်စောဲဗဳဒဳယောဖိုၚ်ဏံတုဲ သွက်ဂွံဆက်ဆောံလိၚ် အနိၚ်အထက် ကုကောန်ၚာ်ဂှ် ဘပဠဟီုဂးလဝ်ရ။ လအ်ဂွံၜါသၞာံတုဲဂှ် ဒးဒုၚ်ဖျေံစၟတ်လဝ်ဒုဟ်ဒဏ်မသ္ကာတ်မြဟ် နကဵုအမှုသ္ပအဓမ္မကဵုဂကောံသ္ကအ် ကုကောန်ၚာ်ပၠိုၚ်ၚ်ဂှ်ရ။
လအာတုပ်သာ်ဂှ်ကီု ပ္ဍဲသၞာံ ၂၀၂၀ ဂှ်လေဝ် ဟိုတ်နူဒးဒုၚ်သ္ပအဓမ္မနကဵုဂကောံသ္ကအ် မၞိဟ်တြဴတၠဂှ်တုဲ သၟတ်ဗြဴဍောတ်မၞုံကဵုဒၟုၚ်ဒလေၚ် အာယုက် (၁၃) သၞာံဝွံ ဆၚ်စှ်ေ နူကဵုစမြိုၚ် နွံဍုၚ်ၜၚ်ကံက်မွဲဂှ်တုဲ ပရေၚ်ဂစိုတ်လဝ်ဇကုဇကု က္တဵုဒှ်လဝ်ရ။
Ref: The Thaiger