တၚ်ဆက်စၠောံသၟာန်သွဟ်လဝ်ကဵု ညးလုပ်ဂကောံ ပရေၚ်ပညာအောန်လာၚ် Burma Academy ကိုဝ်မေန်ခကျဝ်လေန်။
ပ္ဍဲကဵုဘာပုဂ္ဂလိကတဂှ် ဒၟာနူဗ္တောန်ကဵုဒၟံၚ် ယေန်သၞာၚ်ဒဳမဝ်ကရေဇြဳကၟိန်ဍုၚ်ပလိုတ်ဂှ်ရ သွက်ဂွံပ္တိတ်စေဝ်ပၞောန်၊ ဥပဒေ ဆေၚ်စပ်ကဵုဘာပုဂ္ဂလိကဂှ် ဌာနဝန်ဇၞော်ပရေၚ်ပညာကံၚ်ဇြဳပၞာန် ကဵုကၠုၚ်တၚ်စၞောန် ကုသ္ကိုပ်လျိုၚ်ပရေၚ်ပညာခရိုၚ်၊ တွဵုရးကရေၚ် သီုဖအိုတ် ပ္ဍဲကဵုဂိတုဖေဖဝ်ဝါရဳ စၟတ်တ္ၚဲ (၁၇)ဂှ်ရ။
ပ္ဍဲတၚ်စၞောန်ဂှ် ယဝ်ရချူဓဇက် သၞောဝ်ဥပဒေပရေၚ်ပညာပုဂ္ဂလိကတုဲမ္ဂး စဵုဒၞာအာ ကေတ်အရေဝ် ရေၚ်တၠုၚ်အာ ပရေၚ်ဗ္တောန်ကဵုဒၟံၚ် ယေန်သၞာၚ်ဒဳမဝ်ကရေဇြဳ ကၟိန်ဍုၚ်ပလိုတ်ကီု သီုကဵုအရာဟၟဲပၟိက်ဗ္တောန်ကဵုဒၟံၚ်ပေၚ်ၚ်မာန်ရောၚ်ဂှ် ဟီုသ္ဂးလဝ်ရ၊ မုဟိုတ်ကံၚ်ဇြဳပၞာန် ဂွံစဵုဒၞာကၟာတ်လဒဵုဒၟံၚ် ပရေၚ်ဗ္တောန်ကဵု ဒဳမဝ်ကရေဇြဳရော။ ပရေၚ်တာဒၞာဏံဂှ် ပါဲနူကဵုဘာပုဂ္ဂလိကတအ်တုဲ ပ္ဍဲလတူဘာ သ္ပသ္ဇိုၚ်ကဵုဘာသာကောန်ဍုၚ်အရၚ် ကေုာံကဝ်လိက်တအ်ဂှ် ဇီုကပိုက်ဒးမာန်ဟာ။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ကိုဝ်မေန်ခကျဝ် ညးလုပ်ဂကောံပရေၚ်ပညာအောန်လာၚ် Burma Academy ရ။
-အလန်ကိုပ်ကၠာအိုတ်ဏံ ကံၚ်ဇြဳပၞာန်ဟီုသ္ဂးဒၟံၚ်”ယေန်သၞာၚ်ဍုၚ်ပလိုတ်ဟီုဂှ်” မုမိက်ဂွံသ္ဂးရော၊ ပရေၚ်ဍုၚ်ကွာန်ကဵုပရေၚ်ယေန်သၞာၚ်ပြံနှဴလဝ်ဟာ။ သ္ၚဳဂၠိပ်ထ္ၜးကဵုညိ။
ယွံဍာံမံၚ်ရအဓိကဂှ်တှ်ေ၊ ပ္ဍဲကဵုဇုတ်ဓရံၚ်လိက်ဗၟာပိုဲတှ်ေ စာရိတ္တကဵုနဳတိညးဍုၚ်ကွာန်ရ။ ပ္ဍဲကဵုကၟိန်ဍုၚ်ဒဳမဝ်ကရေဇြဳဂှ်တှ်ေ ဇုတ်ဓရံၚ်ဗ္တောန် သ္ပကဵုလဝ်စၟတ်သမ္တီရ။ မၞိဟ်ကဵုမၞိဟ် ညံၚ်ဂွံဆာန်ကၟိန်လေပ်၊ ယေန်သၞာၚ်ဒဳမဝ်ကရေဇြဳဟီုဂှ် မုရော။ အခေါၚ်အရာမၞိဟ်ဟီုဂှ် မုရော။ သ္ပအဓိကတုဲ လ္ပာ်ဍေံတအ်ဂှ် စွံကၠုၚ်လဝ်ဗီုဏံရ။ ယေန်သၞာၚ်ဒဳမဝ်ကရေဇြဳဍုၚ်ပလိုတ် ဍေံတအ်ဟီုဒၟံၚ်ဂှ် အရာဏံဂှ် ကံၚ်ဇြဳပၞာန် စောတ်စောဲ ဟီုဂးဒၟံၚ်ရ။ ဍေံတအ်ဂှ် အတိုၚ်က္ဍုဟ်မၠေံဒၟံၚ် ဂကောံဍုၚ်ပလိုတ်ဂှ်ရ။ ဒဳမဝ်ကရေဇြဳဟီုဂှ် ကၠုၚ်နူဂကောံဍုၚ်ပလိုတ်ရ။ ဍေံတအ်ထေၚ်ကေတ်လဝ်ရ။ မုဒှ်ရောတှ်ေ အလဵုဍေံတအ်ဂှ် ဒှ်ဒၟံၚ်ဖေတ်သေတ်ရ။ ပိုဲသ္ၚဳဂၠိပ်ကေတ်ဗီုဏံရ။ အရာပါလုပ်ဒၟံၚ် ပ္ဍဲဇုတ်ဓရံၚ်ဗ္တောန်ကဵုတအ်ဏံဂှ် စွံအဓိကကဵုဒဳမဝ်ကရေဇြဳတုဲ ဗ္တောန်ကဵုဒၟံၚ်ရဂှ် ဟီုစမာန်ရ။
-ဌာနဝန်ဇၞော်ပရေၚ်ပညာ သၟဝ်တဲကံၚ်ဇြဳပၞာန်ဂှ် မုဟိုတ်ဂွံလလောၚ်တြး ကဵုကၠုၚ်တၚ်စၞောန် ကဵုဘာပုဂ္ဂလိကတအ်ဗီုဏံရော။ မိက်ဂွံအုပ်ဓလီု ဘာပုဂ္ဂလိက အလဵုအသဳဟွံသေၚ်တအ်ဂှ်ဟာ။
ဍေံတအ်ဂှ် နူတမ်တေံရ သွက်ဂွံအုပ်ဓလီုဘာပုဂ္ဂလိကဂှ် ပ္တိတ်ကၠုၚ်ဒၟံၚ်ဇြဟတ် လအ်ဒၟံၚ်ယျ။ အလဵုဘာပုဂ္ဂလိကတအ်လေဝ် ဘာပံၚ်တောဲကဵုဍေံတအ်လေဝ် နွံဗွဲမဂၠိုၚ်ရ။ ယဝ်ရဒးဟီုတှ်ေ ဘာပုဂ္ဂလိက ပံၚ်တောဲကဵုဌာနပရေၚ်ပညာဒပ်ပၞာန်တုဲ ကၠောန်ဒၟံၚ်လေဝ် နွံဒၟံၚ်ရ။ လ္ၚဵုဂှ်ပံၚ်တောဲတုဲၜိုန်ရဟွံမိက်ကၠောန်လေဝ် ၜိုတ်သ္ပမာန်ဂှ် ပါဲဒၟံၚ်လေဝ်နွံရ။ ဆ္ဂးဂှ် အလဵုဇကဍေံတအ်ဂှ်တှ်ေ တအ်ဏံဂှ် ဒှ်ဘာ နွံဒၟံၚ်သၟဝ်တဲဍေံတအ်ရဏောၚ်ဂှ် စၟတ်သမ္တီလဝ်တုဲ သွက်ဂွံအုပ်ဓုပ်ပလှ်ေကဝါ်ဂှ် ဍေံတအ်ဂ္စာန်ဒၟံၚ် လအ်လရ။ ယဝ်ရဒးဟီုတှ်ေ ကၠာတေံဂှ် အခိၚ်ညးဍုၚ်ကွာန်ပိုဲ နွံဒၟံၚ်ပ္ဍဲဂၠံၚ်ဂှ် ၜိုန်ရထိၚ်ဒဝ်ဟွံမာန်ကီုလေဝ် အခိၚ်ဂှ် ဘာနွံဒၟံၚ် ပ္ဍဲတိဍာ်ဍေံတအ်ထိၚ်ဒဝ်လဝ်ဂှ်တှ်ေ ၜိုတ်သ္ပမာန်ထိၚ်ဒဝ်လဝ်တုဲ မိက်ဂွံကၠောန်မံၚ်ဂှ် လအ်ဒၟံၚ်ယျ။ တအ်ဏံဂှ် ဒှ်လက္ချဏ်ဒ္ဂေတ်စရိုတ်ပညာဍိက်ဂၠုဲပၞာန်ရ။
-ပွကမၠောန်ဏံဂှ် ဒှ်ဒၟံၚ်ညံၚ်ရဴ ဟွံမိက်ကဵုသၞောတ်ဒဳမဝ်ကရေဇြဳ၊ အေန်သတဳဂျုတ်ယှေန် ဆေၚ်စပ်ကဵုဒဳမဝ်ကရေဇြဳတအ် ဟွံမိက်ကဵုဂဵုလဟဵု ပ္ဍဲကၟိန်ဍုၚ်ဗၟာဟာ။ ဗီုလဵုညာတ်ကေတ်ရော။
ဒပ်ပၞာန်ဂှ် ဗီုကဵုဟီုလဝ်နူကၠာဂှ်ရ။ ဍေံတအ်က္ဍုဟ်မၠေံဒၟံၚ် ဂကောံကၟိန်ဍုၚ်ပလိုတ်ရ။ က္ဍုဟ်မၠေံဒၟံၚ် ဒဳမဝ်ကရေဇြဳရ၊ ပရေၚ်က္ဍုဟ်မၠေံ ဂကောံဍုၚ်ပလိုတ်ကဵု က္ဍုဟ်မၠေံဒဳမဝ်ကရေဇြဳဂှ် ဍေံဟွံတုပ်ရ။ က္ဍုဟ်မၠေံဒဳမဝ်ကရေဇြဳဂှ် အလဵုဍေံတအ်ဂှ် ဒှ်ဒၟံၚ်ဖေသေတ်ရ။ အလဵုဇကုဍေံတအ်ဂှ် ဒၟာနူမိက်ဂွံဒ္ဂေတ်ဗက်ဒၟံၚ် သၞောတ်တၠအဝဵုပၞာန်ဂှ်ရ အရာဒဳမဝ်ကရေဇြဳဂဵုလဟဵုကၠုၚ်ဏံဂှ် ဒှ်ပြသၞာ သွက်ဍေံတအ်ဏောၚ် ဍေံတအ်ထေၚ်ခယျကေတ်လဝ်ရ။ ဟိုတ်ဂှ်ရ ဍေံတအ်ထေၚ်ခယျလဝ်ဗီုဂှ်ရ။ ဂကောံကၟိန်ဍုၚ်ပလိုတ်ဂှ်တှ်ေ ဒၟာနူဒှ်ဒၟံၚ် ဂကောံဟွံထံက်ဂလာန်ကဵုဍေံတအ်ဂှ်ရ ဍေံတအ်က္ဍုဟ်ဒၟံၚ် ဗီုဏံဟီုစမာန်ရ။ ဟီုတှ်ေ ယဝ်ရဒးကလေၚ်ဆက်ပၠန်တှ်ေ နကဵုဍေံတအ်ဂှ် သီုကဵုၜါဂှ်ပံၚ်တုဲ ၜိုန်ရဓဇက်ဖျေံဒၟံၚ်ကီုလေဝ် အလဵုဍေံတအ်ဖေက်ဒၟံၚ်ဂှ် ပ္ဍဲကၟိန်ဍုၚ်ဗၟာ ခေတ်အဆက်က် ပရေၚ်ချဳဒရာၚ်ကွးဘာ ပရေၚ်ချဳဒရာၚ်ကွးဘာ သွက်ဂွံဒစဵုဒစးကဵုဒပ်ပၞာန်ဂှ် ဒှ်ကၠုၚ်လဝ်ဂၠိုၚ်အိုတ်ရ ဒၟာနူဂှ်ရဍေံတအ်လကိုတ်ဒၟံၚ်ရ။ ပ္ဍဲကဵုကွးဘာတအ် စိုတ်ဓာတ်ဗီုဏံ ဒှ်ကၠုၚ်၊ တီကၠုၚ်သၞောတ်ဗ္ၜတ် ဒဳမဝ်ကရေဇြဳဂှ် ဒှ်ပရေၚ်ဘပဠ ဍေံတအ်ဏောၚ်ဂှ် ဓမံက်ထ္ၜးဒၟံၚ်ရဂှ် ဟီုစမာန်ရ။
-အလန်လကြဴအိုတ်ဏံ ကမၠောန်လၟုဟ်ဂှ် ပါဲနူကဵုဘာပုဂ္ဂလိက အလဵုအသဳဟွံသေၚ်တအ်တုဲ ဘာဒုၚ်သ္ဇိုၚ်ကဵု ဘာသာကောန်ဍုၚ်အရၚ် ကောန်ဍုၚ်အရၚ်တအ် ပံက်လဝ်ကီု သီုကဵုပ္ဍဲလတူဘာကဝ်လိက်တအ် ပရေၚ်ဇီုကပိုက် နွံကၠုၚ်မာန်ဟာ။
အတိုၚ်စရိုတ်လက္ချဏ်ပရေၚ်ပညာဍိက်ဂၠုဲပၞာန်ဂှ်တှ်ေ အရာတအ်ဏံ ဒှ်ကၠုၚ်တွဵုရ။ ယဝ်ရဒးဟီုတှ်ေ ပရေၚ်ဇီုပိုက်ဒး ဇၞော်ဇၞော် နွံမာန်ဒၟံၚ်ရ။ သွက်ဘာဟွံပံၚ်တောဲကဵု ဒပ်ပၞာန်ဂှ်တှ်ေ ဂွံဒးဂွိၚ်ဟၟဲပုဟ်။ ဘာနွံဒၟံၚ် ပ္ဍဲတိဍာ်ဗၠးၜးတအ်ဂှ် နူတမ်တေံရ ဘာသွက်ဂွံဒးပံၚ်တောဲကဵု အတိုၚ်အေန်စတဳကျူယှေန်ဟၟဲတအ်ဂှ်တှ်ေ ၜိုန်ရပြေပြံၚ်မာန်ဒၟံၚ်ကီုလေဝ် ပံၚ်တောဲကဵုဒပ်ပၞာန်တုဲ သွက်ဂွံကၠောန်ကမၠောန် ဘာဒှ်ဒၟံၚ်အကာဲအရာဗီုဏံဂှ်တှ်ေ ပရေၚ်ဇီုကပိုက်ဒး ဇၞော်ကဵုဇြဟတ်နွံမာန်ရ။ သွက်ညးတအ်ဂှ်တှ်ေ သွက်ဒးဒှ်ဂဝိၚ် နွံဗွဲမဂၠိုၚ်ရ။ ပါဲနူဏံပၠန် ပရေၚ်ရပ်စပ်ကၠေၚ်ဒက်လေဝ် နွံကၠုၚ်မာန်ဏောၚ်။ ဟိုတ်ဂှ်ရ ပရေၚ်ဍဵုဍိုက်ပရေၚ်ပညာလေဝ် ပိုဲစၟတ်ကေတ်လဝ်ရ။
ပိုဲဂှ်တှ်ေ ဟွံမိက်ကဵုကၠောန် သၞောတ်ပရေၚ်ပညာ နွံဒၟံၚ်သၟဝ်ကံၚ်ဇြဳပၞာန်ရ။ ပိုဲတှ်ေ ကွးဘာတအ်လေဝ် မိက်ဂွံကဵုသ္ပ CDM ကီု ဘာပုဂ္ဂလိကတအ်လေဝ် ၜိုတ်သ္ပမာန်စပ်ကဵုပရေၚ်ပံၚ်တောဲကဵု ဒပ်ပၞာန်ဂှ် ၜိုတ်ပါဲမာန် ဗီုပြၚ်လဵုဂွံပါဲရောဂှ် ထေက်ကဵု ဒးချပ်ဗ္စာရဏာဏောၚ် မိက်ဂွံဗတိုက်ဖ္အောဝ်ဏာရ။