ဝါယှေန်တာန်၊ မာတ်ချ် (၁၇)
ဒပ်ပၞာန်ကိုဝ်ရဳယျာသၟဝ်ကျာ သုၚ်စောဲလွဟ်လက်နက်နျူကလဳယျာမ္ဂး အတိုၚ်တၚ်ကဵုသတိကၠာတေံရ ပ္တဝ်အာက္ဍိုပ် ကုပရေၚ်အုပ်ကၠေံနိဂီုကၟိန်ဍုၚ်ရောၚ်ဂှ် အမေရိကာန်ဝွံ ဒတူလိုၚ်ဒၟံၚ်တုဲ ညးမၞုံအခေါၚ်ဟီုဂး နူကဵုဌာနစဵုဒၞါအမေရိကာန်ဂှ် ဟီုဂးလဝ် ပွမဘပဠ မဖအိုတ်ကၠေံ အလဵုအသဳဂြောဝ်ဂတာကေမ်တံဂှ်ရ။
“ကိုဝ်ရဳယျာသၟဝ်ကျာဂှ် စိုပ်ကဵုသုၚ်စောဲလွဟ်လက်နက်နျူကလဳယျာတံဂှ်တုဲ ပိုယ်တံ တီလဝ် သောၚ်ၚ်ကၠးကၠးတုဲယျ ထေၚ်ကေတ်ရ။ ညအ်ဂှ် ဒှ်နိဂီု ပရေၚ်အုပ်ဓုပ်အလဵုအသဳကိုဝ်ရဳယျာသၟဝ်ကျာရောၚ်ဂှ် အဲထေၚ်ရ” သာ်ဝွံ သ္ကိုပ်ဗိုလ်ဇၞော် ပါတ်ထရေတ်ရိုၚ်ဒါ ဟီုဂးလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုမာတ်ချ် (၁၄) တ္ၚဲအၚါတေံရ။
သ္အာၚ်နူဂှ်ပၠန် သွက်ဂွံတာဒၞါ ပွမဂၠါဲသၞကိုဝ်ရဳယျာသၟဝ်ကျာတံဂှ်ကီု၊ သွက်ဂွံထိၚ်ဒက် ပရေၚ်ဂီုကၠီု ကေုာံ ပရေၚ်ညိၚ်ဝတ်အပ္ဍဲဒေသတံဂှ်ကီုဂှ် ကၠောန်ဒၟံၚ် ကရောံညးကၠောန်ကလောန်မွဲစွံ အပ္ဍဲဒေသတံ ကြပ်ပ်ရောၚ်ဂှ် ဟီုဂးလဝ်တုဲ ဣဏံဝွံ ဒှ်ကၠုၚ် ပရေၚ်အမေရိကာန်တံ သ္ပအရီုရောၚ်ဂှ် ရိုၚ်ဒါ ဆက်ဟီုဂးလဝ်ရ။
မူဝါဒဏံဝွံ သီုကဵုဒှ်တၚ်ဒတူလိုၚ် ရုၚ်က္ဍိုက်ပ်ပရေၚ်စဵုဒၞါ မထ္မံက်ထ္ၜးလဝ် ပ္ဍဲမဟာဗျူဟာ ပရေၚ်စဵုဒၞါကောန်ဂကူတေံရ။
“အမေရိကာန် ဟွံသေၚ်မ္ဂး မဟာမိတ်ညးတံ ကေုာံ ပွံၚ်ပွါညးတံဂှ် ပရေၚ်ဗ္တိုက်နျူကလဳယျာ ကိုဝ်ရဳယျာသၟဝ်ကျာ သာ်လဵုဟွံဟီု ဒုၚ်အာတဲဟွံသေၚ်တုဲ သ္ကဵုဒှ်ကၠေံ တၚ်သ္ဂုတ်သွာတ်အုပ်ကၠေံနိဂီုညးတံဏောၚ်” ဂှ် သၞာံတုဲကၠုၚ် ဂိတုအံက်တဝ်ဗာတေံ ဌာနပရေၚ်စဵုဒၞါ ဟီုလဝ်ရ။
ပ္ဍဲဂိတုလောန်ကၠုၚ်တေံလေဝ် က္ဍိုပ်သ္ကိုပ်ကိုဝ်ရဳယျာသၟဝ်ကျာဂမၠိုၚ် ကလေၚ်ခၠေဝ်အာ ကုပွပ္ကတ်ပ္ကေၚ်ပရေၚ်ပၞာန် အမေရိကာန်−ကိုဝ်ရဳယျာသၠုၚ်ကျာတံဏောၚ်ဂှ် ဘပဠလဝ်တုဲ ဌာနဝန်ဇၞော်ကာစဵုဒၞါ ကိုဝ်ရဳယျာသၟဝ်ကျာ လလောၚ်ပ္တိတ်လဝ် တၚ်လလောၚ်တြး မသ္ကာတ်မြဟ်ရ။
ဟိုတ်နူပြဝဂၠါဲသၞ ကေုာံ ပွဆေၚ်မုက်ဒိဓဗတ်ပရေၚ်ပၞာန်ဟွံစၚ်ခြၚ် အမေရိကာန် ကေုာံ ကောန်ဂကောံဒပ်သၟဝ်တဲဍေံတံဂှ်တုဲ ပ္ဍဲတ္ကအ်ကိုဝ်ရဳယျာ ကေုာံ အပ္ဍဲဒေသဂှ် အကာဲအရာပရေၚ်ဍုၚ်ကွာန် ကေုာံ ပရေၚ်ပၞာန်တံဝွံ စိုပ်ဒၟံၚ်ပၞောန်သာ်ဗ္ကေတ် မသ္ကာတ်မြဟ်ယျဂှ် ဌာနဝန်ဇၞော်ကာဍုၚ်သ္အာၚ် ကိုဝ်ရဳယျာသၟဝ်ကျာ လလောၚ်ပ္တိတ်လဝ်ရ။
ပ္ဍဲကဵုတၚ်လလောၚ်တြးဂှ် “သွက်နျူကလဳယျာဂှ် နျူကလဳယျာ၊ သွက်ပရေၚ်ဆေၚ်မုက်ဒိဓဗတ်ဂှ် နကဵုနိယာမ ပရေၚ်ဆေၚ်မုက်ဒိဓဗတ် သဗ္ဗအိုဿီုတံဂှ်မ္ဂး ကိုဝ်ရဳယျာသၟဝ်ကျာဝွံ ခၠေဝ်ပလန်အာ လ္တူပွဂိုတ်ဂ္စါန်ပရေၚ်ပၞာန်အမေရိကာန်တံ သ္ကာတ်မြဟ်အိုတ်ဏောၚ်” ဂှ် ထ္မံက်ထ္ၜးလဝ်ရ။
Ref: Fox News