လဂုၚ်၊ မာတ်ချ်(၁၇)
ဇြေမ်ကာဒ်ဖုၚ်မိုဝ်ဗိုၚ် ဟွံဂွံပ္တိုန်လဝ်စၟတ်သမ္တီ နတၚ်ဂၞၚ်တၞးကာဒ်ကောန်ဍုၚ်ဍာံဍာံတအ်ဂှ် ပ္ဍဲပွိုၚ်(၉၀)တ္ၚဲ ကၟာတ်သီအာပေၚ်ၚ် ဏောၚ်ဂှ် ဌာနက္ဍိုက်က္ဍိုပ်စၞောန်ပ္ညုၚ်ပရေၚ်ဆက်စၠောံ ကံၚ်ဇြဳပၞာန် လလောၚ်တြးလဝ်ရ။
အခိၚ်ပ္တိုန်စၟတ်သမ္တီဇြေမ်ကာဒ်မိုဝ်ဗိုၚ်ဖုၚ်တအ်ဂှ် တၚ်ဂၞၚ်မပ္တံကဵု ယၟုဒးဗပေၚ်စုတ်၊ စၟတ်တၞးကာဒ်ကောန်ဍုၚ်(မဂၞန်တၞးကာဒ်ကောန်ဍုၚ်) တအ်ဂှ် တေက်ပ္ကိတ်ဒၟံၚ်ကဵု တၚ်ဂၞၚ် မၞုံပ္ဍဲ National Database ဌာနဝန်ဇၞော်ကောပ်ကာဲပရေၚ်မၞိဟ်လုပ်တိတ် ကေုာံဇြဟတ်ညးဍုၚ်ကွာန်ရဂှ် ဟီုသ္ဂးလဝ်ရ။
ဇရေၚ်ညးသုၚ်စောဲဒၟံၚ်ဇြေမ်ကာဒ်ဖုၚ် ပ္တိုန်လဝ်စၟတ်သမ္တီ နတၞးကာဒ်ကောန်ဍုၚ် တၚ်ဂၞၚ်ဟွံဍာံစၟတ်တအ်ဂှ် ပ္ဍဲပွိုၚ်(၃၀)တ္ၚဲ သွက်ဂွံကလေၚ်ပ္တိုန်စၟတ်သမ္တီ နကဵုတၚ်ဂၞၚ်မဍာံပြဂှ် ပလံၚ်ဗစိုပ် ကဵုအာသမ္တီ နကဵု(SMS) ရောၚ်ဂှ် ဟီုသ္ဂးလဝ်ရ။
က္လိဂွံ SMS တုဲ ဇြေမ်ကာဒ်ဖုၚ် ဟွံက္လေၚ်ပ္တိုန်တၚ်ဂၞၚ် အတိုၚ်တၞးကာဒ်ကောန်ဍုၚ်ဍာံပြတအ်ဂှ် ကၠောန်သ္ပအာ One Way Block ပရေၚ်ဒေါံဇူ ပွမကော်ဖုၚ်၊ ပွမပလံၚ်လိက်ထိုၚ် ကေုာံ ပွမသုၚ်စောဲဒေတာတအ်ရောၚ် ကံၚ်ဇြဳပၞာန်ကဵုကၠုၚ်လဝ်သမ္တီရ။
စတမ်နူကၠောန်ရေၚ်တၠုၚ် One Way Block ဏံတုဲ ပ္ဍဲပွိုၚ်(၉၀)တ္ၚဲ ဇြေမ်ကာဒ်ဖုၚ် ဟွံကၠုၚ်ပ္တိုန်စၟတ်သမ္တီ နကဵုတၚ်ဂၞၚ် အတိုၚ်မၞုံပ္ဍဲတၞးကာဒ်ကောန်ဍုၚ်ဂှ် ကၟာတ်သီအာ ပေၚ်ၚ်ရောၚ်ဂှ် လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၁၄)တေံရ။
ကမၠောန်ပြဝကံၚ်ဇြဳပၞာန်ဂှ် ဒှ်ပရေၚ်ပ္တိတ်ဒၟံၚ်ဇြဟတ် သွက်ဂွံကေတ်တၚ်ဂၞၚ် ညးပါလုပ်ဒၟံၚ် ပ္ဍဲပရေၚ်ပၠန်ဂတးရဂှ် ညးစိစောန်နဲကဲကွတ်ပညာတအ် သ္ၚဳဂၠိပ်လဝ်အိုတ်ရ။
အတိုၚ်အဝ်ပရေတာပရေၚ်ဆက်စၠောံပ္ဍဲဍုၚ် လလောၚ်တြးလဝ်မ္ဂး ပ္ဍဲကၟိန်ဍုၚ်ဗၟာ ညးသုၚ်စောဲဒၟံၚ် SIM Card ဂကူစုၚ် မၞုံဒၟံၚ် (၆၃)ပြကောဋိကိုတ်ပြၚ်ရဂှ် ဂွံတီကေတ်တုဲ အခိၚ်လၟုဟ်ဏံမ္ဂး ကံၚ်ဇြဳပၞာန်ထိၚ်ဒဝ်လဝ် အဝ်ပရေတာဖုၚ်ပ္ဍဲဍုၚ်တအ်ဂှ်ရ။
ဂိတုနဝ်ဝေမ်ဗာ သၞာံတုဲကၠုၚ်တေံလေဝ် ညးမသုၚ်စောဲဇြေမ်ကာဒ်ဖုၚ်ဂမၠိုၚ်တအ်ဂှ် စဵုကဵုဂိတုဂျာန္နဝါရဳ သၞာံ ၂၀၂၃ တေက်ပ္ကိတ်စၟဳစၟတ်ရံၚ် ပ္တိုန်လဝ်စၟတ်သမ္တီ နွံ၊ ဟၟဲတုဲ သွက်ဂွံပလေဝ်ပလေတ်ကီု ဇြေမ်ကာဒ်ဖုၚ် ဟွံကလေၚ်ပလေဝ်ပလေတ်လဝ်တအ်ဂှ် ကၟာတ်သီရုပ်အာ ပေၚ်ၚ်ရောၚ် လလောၚ်တြးလဝ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ်- Reuters