ပေန်လံၚ်-မာတ်ချ်(၁၇)
တွဵုရးသေံဇၞော်သၠုၚ်ကျာ၊ ပွိုၚ်ဍုၚ်ပေန်လံၚ် ပ္ဍဲပရေၚ်ပရော က္တဵုဒှ်လဝ်ပ္ဍဲကွာန်ဏာမ်နုၚ် ညးဍုၚ်ကွာန်ဒးချိုတ်လဝ်တအ် ကံၚ်ဇြဳပၞာန် ပန်လဝ်နကဵုလွဟ်ပန်အဆက်က် စၟဳစၟတ်ဂွံညာတ်ကေတ်ရဂှ် ညးတာလျိုၚ်ပရေၚ်ထတ်ယိုတ် တွဵုရးကရောၚ်ဍာဲ မစၟဳစၟတ်လဝ်ညးချိုတ်အာဂမၠိုၚ် ဟီုသ္ဂးလဝ်ရ။
ပ္ဍဲပေါဲသောၚ်ကလးပရိုၚ် ပရေၚ်ဒဒှ်ပြိုက်ဂစိုတ်လဝ်ဗွဝ်ကဵုဗွဝ် ကံၚ်ဇြဳပၞာန်က္လိလောန်လဝ် ပ္ဍဲကွာန်ဏာမ်နုၚ် မကၠောန်ဗဒှ်ကၠုၚ် ပ္ဍဲဂိတုမာတ်ချ် စၟတ်တ္ၚဲ (၁၆)တ္ၚဲဏံဂှ် ဟီုသ္ဂးလဝ်သာ်ဏံရ။
ခ.မ.ရ – ၅၁၈ သၟဝ်တဲကံၚ်ဇြဳပၞာန် ပ္ဍဲဂိတုမာတ်ချ် သ္ကုတ်ကၠာတေံ ဖျေံလဝ်ဗ္ဒပ် လ္ပာ်ဗၟံက်ကွာန်ဏာမ်နုၚ် ပ္ဍဲဒဵုကျာ်စေတဳနာ်တုဲ နူကဵုဒၞာဲဂှ် ပ္ဍဲဂိတုမာတ်ချ် စၟတ်တ္ၚဲ (၁၁) အခိၚ်နူဂယးဂှ် ထ္ပက်ကၠုၚ်ကရောၚ်ပၞာန် ပ္ဍဲကွာန်ဏာမ်နုၚ်တုဲ ပြိုက်ဂစိုတ်လဝ် ညးဍုၚ်ကွာန်တအ် ဗွဝ်ကဵုဗွဝ်ရ။
“အခိၚ်စၟဳစၟတ်ရံၚ် ဇွတအ်ဂှ် အတိုၚ်ဂွံညာတ်ကေတ် ပ္ဍဲဗီုရုပ်ဂှ်ရ ပ္ဍဲဗ္ဒၚ်တအ် ပၞော်ပထောၚ်နွံဒၟံၚ်ဟွံအောန်။ အရာဏံဂှ် မကမ်ဖံက်ကလိုဟ်ဏာမၞိဟ်တုဲမှ ဂွံဒးလဝ်ဗ္ဒၚ်ဂှ်ရ။ ရံၚ်ကေတ်ဗီုဏံတှ်ေ ကံၚ်ဇြဳပၞာန် သုၚ်စောဲလဝ် လွဟ်သေနာတ်ပန်အဆက်က်ဂှ် ပြာကတ်ဒၟံၚ်ရ။ တုဲပၠန် မွဲဂှ် ဒၟာနူကံၚ်ဇြဳပၞာန်ပန်လဝ်မၞိဟ် ကြပ်ပ်ဂှ်ရ ပၞေတ်ဂွံသှ်ေဒၟံၚ် ပ္ဍဲဗ္ဒၚ်ဂၠိုၚ်ဒၟံၚ်ရ။” ဂှ် ဒံက်တာယျေဝ်ဇြဝ် ညးတာလျိုၚ်ပရေၚ်ထတ်ယိုတ် တွဵုရးကရေၚ်ဍာဲ ဟီုသ္ဂးလဝ်ရ။
မ္ၚးနူဏံပၠန် ညးချိုတ်အာလဝ်တအ်ဂှ် ကၠာဟွံဂွံချိုတ်ဏီ ဂွံညာတ်ကေတ်လဝ်လက္ချဏ် ဒးဒုၚ်ပျဲပျာံလဝ်တုဲ ဒးဒုၚ်ထ္ပက်လဝ်ကဵု သတ္တုဃိုတ်ဃိုတ်၊ ကေက်ကေက်ကီု၊ ဒးဒုၚ်သိက်စုတ်လဝ် ပၠံၚ်လွဟ်ပ္ဍဲပါၚ်တုဲ ပန်လဝ်ကီု၊ ဒးဒုၚ်စံၚ်လဝ်ကဵုပၟတ်ၜံက်ကီုတအ်ဂှ် စၟဳစၟတ် ဂွံညာတ်ကေတ်လဝ်ရဂှ် ညးဟီုသ္ဂးလဝ်ဏီရ။
ဂကောံဒပ်ဗၠာဲသၟိၚ်ကရေၚ်ဍာဲလေဝ် ပ္ဍဲကဵုဒၞာဲပရေၚ်ပရောက္တဵုဒှ်ဂှ် ဂွံညာတ်ကေတ်လဝ် ခၞော်မကမ် မလိက် ကံၚ်ဇြဳပၞာန် က.ပ.စ ကၠောန်ပ္တိတ် ၅.၅၆ ကီု ပ္ဍဲကဵုဇကုညးဒးချိုတ်အာလဝ်ဂှ်လေဝ် စၟဳစၟတ်ဂွံညာတ်လဝ် က္ဍိုပ်မကမ် ၅.၅၆ ရဂှ် ဟီုလဝ်ရ။
သွက်ဂွံကၠုၚ်ကေတ်ဇွ ညးဒးဒုၚ်ပြိုက်ဂစိုတ်လဝ်ကဵု ကံၚ်ဇြဳပၞာန်ဗွဝ်ဗွဝ်တအ်ဂှ် ၜိုန်ရ KNDF ကဵုလဝ်ပရိုၚ် ကုညးလုပ်ဂကောံကၟိန်အိန်ထံၚ်ညးတအ်ကီုလေဝ် ဒၟာနူကံၚ်ဇြဳပၞာန်ဟွံကဵုတတ်ကၠောံ သၞေဟ်ကၚ်စၟဳစၟတ်ကံၚ်ဇြဳပၞာန်တုဲ ကေတ်ဟွံဂွံရဂှ် KNDF ဟီုလဝ်ရ။
ညးတၠဒုဟ်အဓိက ပြိုက်ဂစိုတ်လဝ် ညးဍုၚ်ကွာန် ပ္ဍဲကွာန်ဏာမ်နုၚ်ဂှ် ဒှ်တံဒပ် ခ.မ.ရ – ၅၁၈ သၟဝ်တဲဌာန်ဂအုပ်ကောပ်ကာဲပရေၚ်ချဳဒရာၚ်ပၞာန် (စ.က.ခ) စၟတ်(၂) သၟဝ်တဲ ဌာန်ဂအုပ်ရးပၞာန် ဒိုဟ်ဗၟံက်သ္ကုတ်လ္ဒောဝ်ကံၚ်ဇြဳပၞာန်ရဂှ် ကိုဝ်မျေတ်မှာန် ညးတာလျိုၚ်လလောၚ်ပရိုၚ် KNDF ဟီုသ္ဂးလဝ်ရ။
“ကံၚ်ဇြဳပၞာန်ဂှ် ဟိုတ်နူက္လိလောန်လဝ်ဒုဟ်ရာဇဝတ်ဂှ်ရ ထ္ၜးဗီုပြၚ် PDF တအ်တုဲ တြးဒၟံၚ်ပရိုၚ်ဗၠေတ်မှာတုဲ ဂတကြဴ ညံၚ်ဟွံဂွံကိတ်ညဳဂှ် အလဵုသ္ကိုပ်ဗိုလ်ဇြဝ်မေန်ထောန် ဒုၚ်လဝ်ဝန်ရ။ KNDF ပိုဲ နွံဒၟံၚ်ကရေက်လ္ပာ်ဏံ ဒပ်စဵုဒၞာညးဍုၚ်ကွာန်တအ်ဂှ် ဟိုတ်နူဗတိုက်ဒၟံၚ် ဒပ်ပၞာန်သီအဝဵု ကဵုအသိၚ်ခိုဟ်ဟ် ညံၚ်ဂွံဒးဂိဂိဂှ်ရ ညံၚ်မၞိဟ်တအ်ဏံ သၞိၚ်ရုပ်ဂွံသဝ်စှ်ေ ဗလးပ္တိတ်ပရိုၚ်ဗၠေတ်တ်တုဲ ဗ္ဂပ်စုတ် ပ္ဍဲပရေၚ်ပရောဏံဏောၚ် အဲမိက်ဂွံဟီုရ”ဂှ် ညးသ္ဂးလဝ်ရ။
စပ်ကဵုပရေၚ်ပရောဏံတုဲ ပရေၚ်ဟီုဂးပါဲတးကယျာန်ဓဝါတ် နွံဒၟံၚ်တုဲ ကံၚ်ဇြဳပၞာန် ကေုာံ ဂကောံ PNA ပၞာန်ညးဍုၚ်ကွာန် သၟဝ်တဲကံၚ်ဇြဳပၞာန် ကၠောန်သ္ပဒၟံၚ် ပရေၚ်တြးပရိုၚ်ဗၠေတ်မှာ ကေုာံတြးဝါဒ ပ္ဍဲဒေသပအိုဝ်ရဂှ် ညးဟီုသ္ဂးလဝ်ဏီရ။
ဂိတုမာတ်ချ် စၟတ်တ္ၚဲ (၁၅)ဂှ်လေဝ် ပ္ဍဲဍုၚ်တံၚ်ဂျဳ PNA က္ဍိုက်က္ဍိုပ်တုဲ မွဲကရောံကဵုညးဒေသပအိုဝ်တအ်ဂှ် KNDF တိတ်အာ နူတိဍာ်ပအိုဝ်ညိဂးတုဲ ကၠောန်လဝ်ပရေၚ်ထ္ၜးဆန္ဒရ။
နူကဵုသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁) ဒပ်ပၞာန်သီအဝဵုကၟိန်ဍုၚ်ဗၟာတုဲ စဵုကဵုသၞာံ ၂၀၂၃ ဂိတုမာတ်ချ် စၟတ်တ္ၚဲ (၁၃)ဏံ ဒပ်ပၞာန်က္လိလောန်လဝ် ဂဗုတ်ပြိုက်ဂစိုတ် ဗွဝ်ကဵုဗွဝ် စဵုကဵု (၆၄)ဝါနွံတုဲ ဟိုတ်နူပရေၚ်ပရောတအ်ဂှ် ညးဍုၚ်ကွာန် (၇၆၆)တၠ ဒးချိုတ်အာလဝ်ရဂှ် ဌာနဝန်ဇၞော်အခေါၚ်အရာမၞိဟ် NUG လလောၚ်တြးလဝ် ပရိုၚ်ရ။
စပ်ကဵုပရေၚ်ပရောဏံတုဲ နကဵုဌာနဝန်ဇၞော်အခေါၚ်အရာမၞိဟ် NUG ပ္တိတ်ဇြဟတ်ရေၚ်တၠုၚ်ဒၟံၚ် ညံၚ်ဂွံကေတ်အရေဝ် ကဵုအာဒုဟ်ဒဏ် ကုဂကောံပၞာန် က္လိလောန်လဝ် ဒုဟ်ရာဇဝတ်ကၟိန်ဍုၚ်နာနာရဂှ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)