မတ်မလီု-မာတ်ချ်(၁၇)
ဗော်ပရေၚ်ဍုၚ်ကွာန် ပ္တိုန်လဝ်စၟတ်သမ္တီ သၟဝ်တဲကံၚ်ဇြဳပၞာန်တအ်ဂှ် ဒုၚ်သုၚ်စောဲဒၟံၚ် အတိုၚ်ပၟိက်ကံၚ်ဇြဳပၞာန်တုဲ ကဵုဒၟံၚ်ဇြဟတ် ပရေၚ်ဍဵုဍိုက်ပြိုက်ဂစိုတ် ညးဍုၚ်ကွာန်ဂှ်ရ ဂကောံသီုဖအိုတ်ဏံ ကေတ်အာအရေဝ်ရောၚ်ဂှ် NUG ကဵုကၠုၚ်သမ္တီရ။
ပ္ဍဲဂိတုမာတ်ချ် စၟတ်တ္ၚဲ(၁၅)ဂှ် “တၚ်လလောၚ်တြး ဆေၚ်စပ်ကဵုပေါဲရုဲမာဲ ဂကောံပၞာန်ပ္ကီုပရာပ် ပလေဝ်ပလေတ်ဒၟံၚ် ပေါဲရုဲမာဲအယောၚ်အလာပတောံ ဟွံလုပ်သၞောဝ်” ဂးတုဲ ကဵုကၠုၚ်လဝ်သမ္တီရ။
ဂကောံသၟဝ်တဲကံၚ်ဇြဳပၞာန်၊ ဂကောံပၟိက်တုပ်၊ ဂကောံကဵုဇြဟတ်တအ်ဂှ် သွက်ဂွံကေတ်အာအရေဝ် ရေၚ်တၠုၚ်အာ အသၞောဝ်ဥပဒေနဲကဲအလဵုအသဳဂှ် တာလျိုၚ်နွံဒၟံၚ်ဂှ်ရ သ္ပသစ္စ ပ္ဍဲလတူပရေၚ်ပၠန်ဂတးတုဲ ဆက်ရေၚ်တၠုၚ်အာရောၚ်ဂှ် ၜိုန်ရဟီုဂးလဝ်ကီုလေဝ် ဗီုပြၚ်လဵု ကေတ်အာအရေဝ်ရောဂှ် ဓမံက်ထ္ၜးလဝ် သောဲသောဲဗြောဲဗြောဲ ဟၟဲကၠုၚ်ဏီရ။
ပွမပ္တိုန်စၟတ်သမ္တီ ဇရေၚ်ကဝ်မယှေန်ပေါဲရုဲမာဲ မဒှ်သၟဝ်တဲကံၚ်ဇြဳပၞာန် သီအဝဵုဂှ် ဒှ်ပရေၚ်ပါဲတးဆန္ဒညးဍုၚ်ကွာန်တုဲ ဒုၚ်ကေတ်လဝ်တဲ ပရေၚ်ဒဒှ်ဂကောံပၞာန် တၟးကၠးဒၟံၚ်တုဲ သ္အာၚ်နူဂှ်ပၠန်ဒုၚ်သုၚ်စောဲ အတိုၚ်ပၟိက်စိုတ် ဂကောံပၞာန်မွဲစွံတုဲ ကၠောန်သ္ပဒၟံၚ် ပရေၚ်ကဵုဇြဟတ် သွက်ဂွံဍဵုဍိုက်ပြိုက်ဂစိုတ် ညးဍုၚ်ကွာန်တအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပေါဲရုဲမာဲပတောံဟွံလုပ်သၞောတ်ဂှ် နကဵုကံၚ်ဇြဳပၞာန် ဒစဵုဒစးကဵု ပၟိက်ဆန္ဒညးဍုၚ်ကွာန်တုဲ ယဝ်ရကၠောန်ဗဒှ်ကၠုၚ် တေၚ်တေၚ်ဂြတ်တ်မ္ဂးလေဝ် ပူဂိုလ်၊ ဂကောံ မံက်တိုန်ကၠုၚ် နူပေါဲရုဲမာဲပတောံဏံမွဲကဆံၚ်တအ်ဂှ် ဒှ်ကၠုၚ်ညးစၞးကၠတ်ထဝ်၊ ကၠတ်ထဝ်၊ အလဵုအသဳ သ္ပစၞးကဵုညးဍုၚ်ကွာန်ဍာံဍာံဇေတ်တ်ဟွံသေၚ်တုဲ ဒှ်ကၠုၚ်ဆၜိုတ်ဂကောံရုပ်ပလှ်ေ ဒပ်ပၞာန်သက်က်ဟေၚ်ရဂှ် ဟီုသ္ဂးလဝ်ရ။
ကံၚ်ဇြဳပၞာန်သီအဝဵုဂှ် ယဝ်ရဟွံက္လေၚ်ပတိုန်စၟတ်သမ္တီမ္ဂး သၞောဝ်ဥပဒေပရိုဟ်ပလီု ဗော်ပရေၚ်ဍုၚ်ကွာန်တအ်ဂှ် လလောၚ်တြးကၠုၚ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ (၂၆)တေံရ။
နူကဵုဂိတုဖေဖဝ်ဝါရဳ စၟတ်တ္ၚဲ (၁) စတမ်ဂရၚ်ပ္တိုန်အာတ်မိက် အခေါၚ်ဒက်ပ္တန်ဗော် ကေုာံအခေါၚ်ပ္တိုန်စၟတ်သမ္တီဂွံတုဲ စဵုကဵုဂိတုမာတ်ချ် စၟတ်တ္ၚဲ (၁၄)ဏံ ဗော်စန္ဒက်အလုံမွဲကၟိန်ဍုၚ် (၅)ဗော် ကေုာံ ဗော်စန္ဒက် ပ္ဍဲရးဒေသဇၞော်မွဲရး ဟွံသေၚ်မ္ဂး ပ္ဍဲတွဵုရးမွဲမွဲဂှ် (၁၈) ဗော် ပ္တိုန်လဝ်အခေါၚ်စၟတ်သမ္တီရ။
ပၞောဝ်ကဵုဗော်ပရေၚ်ဍုၚ်ကွာန် ပ္တိုန်လဝ်စရၚ်တအ်ဂှ် ပ္ဍဲကဵုတွဵုရးဍုၚ်မန် ဗော်ညဳသၟဟ်မန်လေဝ် ပါဲလုပ်ဒၟံၚ်မွဲဗော်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – ဗီုဂွံညာတ်ကေတ် UEC ကေုာံ ဗော်ပရေၚ်ဍုၚ်ကွာန်ဂမၠိုၚ် ဆဵုဂဗကောံဓရီုသဳကၠဳပ္ဍဲနေပျဳတဝ်တုဲ