နေဗျဳဒဝ်၊ မာတ်ချ် (၁၈)
ကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကံၚ်ဇြဳပၞာန် (NSPNC) ဂှ်ကဵု ဂကောံဒေါအ်ပန်ပှော် မထ္ပက်လဝ်စၟတ်တဲ ပ္ဍဲလိက်ကသုက် NCA (၇) ဂကောံတံဝွံ ပ္ဍဲဂိတုမာတ်ချ် (၂၈) ကဵု (၂၉) ကၠုၚ်စိုပ်ဏံ ဆဵုဂဗသဳကၠဳအာ ဗွဲပလးရောၚ်ဂှ် ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒေါအ်ပန်ပှော် (၇) ဂကောံဝွံ တိုန်စိုပ်သဳကၠဳလဝ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက်ဂှ် (၃) ဝါတုဲ တုဲကၠုၚ် ပ္ဍဲဂိတုနဝ်ဝေမ်ဗာတေံ သွက်သ္ဂောံဂွံအခေါၚ်သဳကၠဳဗွဲပလး စပ္တိတ်ကၠုၚ်ဇြဟတ်ဂှ် အခါလၟုဟ် အလန်ကိုပ်ကၠာအိုတ် သွက်ဂွံဆဵုဂဗသဳကၠဳဗွဲပလး ပ္ဍဲနေဗျဳဒဝ်တေံဂှ် နွံဒၟံၚ်ရ။
သွက်သ္ဂောံဂွံအခေါၚ်ဆဵုဂဗ ကုကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကံၚ်ဇြဳပၞာန် (NSPNC) ဗွဲပလးဂှ် ဒက်ပ္တန်လဝ် ဂကောံပ္ညဳပ္ညပ်သဳကၠဳဗွဲပလး ဂကောံဒေါအ်ပန်ပှော် (၇) ဂကောံတံ နကဵုကောန်ကမ္မတဳ (၇) တၠရ။
ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံ သ္ကိုပ်ဗိုလ်ဇၞော် သဝ်ကျဝ်ညောအ်ဂှ် ပ္ဍဲကဵုပရေၚ်ဆဵုဂဗဗွဲပလးဏံဂှ် စဳဇန်လဝ် သွက်ဂွံသဳကၠဳအာ ညံၚ်ပေါဲသဳကၠဳပရေၚ်ဍုၚ်ကွာန် သီုညးဖအိုတ်ပါလုပ် ဂွံဒှ်ဂှ်ကီု သီုကဵုပရူပရာ သီုၜါလ္ပာ် မသ္ဂောံပြေပြံၚ်တံရောၚ်ဂှ် ဟီုရ။
“အဓိကဂှ်တှ်ေ ကိစ္စပရေၚ်ၜိုဟ်လလမ် အပ္ဍဲဒေသပိုယ်တံ ပါဏောၚ်။ တုဲတှ်ေ ကိစ္စပရေၚ်ၜိုဟ်လလမ်ကၟိန်ဍုၚ် ပိုယ်တံမဟီုဒၟံၚ်တံ ပါဏောၚ်။ တုဲပၠန် သွက်ဂွံထ္မံက်ရုပ်ရဴ အကာဲအရာဆဵုဂဗပရေၚ်ဍုၚ်ကွာန် ညးမဆေၚ်စပ်အိုဿီုမပါလုပ်တံဂွံဒှ်ဂှ် ပိုယ်တံ နကဵုဗီုပြၚ်လဵုဂွံစရောဟီုဂှ် တၚ်သဳကၠဳပ္ညဳပ္ညပ်ဂှ်လေဝ် ပိုယ်တံ ကၠောန်မာန်ဏောၚ်မဒှ်တုဲ ကိစ္စပရေၚ်ဒက်ပ္တန်ကၟိန်ဍုၚ်ဖေဝ်ဒရာဒဳမဝ်ကရေဇြဳတံလေဝ် ပါလုပ်ဏောၚ်ဂှ် ပိုယ်တံ (၇) ဂကောံ ချပ်လဝ်တံ နွံ” ဂှ် ညးသ္ဂးရ။
ပ္ဍဲကဵုဂကောံ EAOs ဒေါအ်ပန်ပှော် (၇) ဂကောံ မသဳကၠဳအာကုကံၚ်ဇြဳပၞာန် ဗွဲပလးတံဂှ် ဗော်ဍုၚ်မန်တၟိ (NMSP) ၊ ဗော်ဗၠးၜးရးရခေၚ် (ALP) ၊ ဒပ်ပၞာန်ဒတုဲဖဵုဒဳမဝ်ကဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ် (KNU/KNLA-PC) ၊ ဗော်သွးဒဳမဝ်ကရေတ်တေတ်လာဟူ (LDU) ၊ ဌာန်ဂအုပ်ဗၠးၜးကောန်ဂကူပအိုဝ် (PNLO) ကေုာံ ကံၚ်ဇြဳကလေၚ်ဒက်ပ္တန်ရးသေံ (RCSS) တံ ပါလုပ်ရ။
သၞာံတုဲကၠုၚ် ပ္ဍဲဂိတုဒဳဇြေမ်ဗာ (၇) တေံ ဂကောံရပ်လွဟ် (၇) ဂကောံ ရန်တၟံ သွက်ဂွံဒက်ပ္တန်ပရေၚ်ၜိုဟ်လလမ် မတန်တဴအာဍာ်ဇမၠိၚ်မာန်ဂှ်တုဲ သွက်သ္ဂောံဂွံတၚ်တုပ်စိုတ် ကေုာံ လစွံစိုတ် သီုၜါလ္ပာ်မဒုၚ်တဲမာန်တံဂှ် ပလံၚ်ဗစိုပ်လဝ်လိက် ကုကံၚ်ဇြဳပၞာန် သွက်ဂွံဆဵုဂဗသဳကၠဳ ဗွဲပလးမာန်တံဂှ်ရ။
လ္တူလိက်ပလံၚ်ဗစိုပ်ဂှ် ၜိုန်ရပွမသ္ပစၟတ်သမ္တီ မွဲလ္ပာ်ကုမွဲလ္ပာ်တံ နွံကီုလေဝ် ဟိုတ်နူအကာဲအရာပရေၚ်ဍုၚ်ကွာန်လၟုဟ်တုဲ လ္ပာ်ကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကံၚ်ဇြဳပၞာန် (NSPNC) သွက်ဂွံဆဵုဂဗဗွဲပလးဂှ် ပ္ဍဲဂိတုဒဳဇြေမ်ဗာ (၉) တေံ ကယျာန်ပါဲလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI