ဟဏဳ၊ မာတ်ချ် (၁၈)
ဍုၚ်ဝေဒ်နာမ် မဒှ်ဍုၚ်အာယှဒိုဟ်အဂၞဲ သွက်ဂွံတံၚ်ဂြဲ ကၟုဲအာတရဴဍုၚ်သ္အာၚ်တံမာန် သွက်ဂွံဖအောန်ဖျေံကဵု တၚ်နွံပၟိက်ဝဳဇြာလ္ၚဵုတံဂှ် သၟိၚ်တၠအဝဵုတံ စၞောန်ပ္ညုၚ်လဝ်ရောၚ် သ္ကိုပ်ဝန်ဇၞော်ဝေဒ်နာမ် ဝှာမ်မေန်ချေန် ဟီုရ။
အတိုၚ်ဂလာန် မဳဒဳယျာအပ္ဍဲဍုၚ်တံဂှ်မ္ဂး ကြဴနူအခိၚ်ကာလဘဲကပ်တုဲ နကဵုကၟိန်ဍုၚ် သွက်ဂွံကလေၚ်ကော် ကၟုဲအာတရဴဍုၚ်သ္အာၚ်ဂမၠိုၚ် တၚ်အဓိကမဒးရုန်ဂ္စါန်ဒၟံၚ်ဂှ် ဟိုတ်နူအခက်အခုဲ သ္ဂောံဂွံဝဳဇြာတံရောၚ်ဂှ် ဂွံတီကေတ်ရ။
စၞစအခိုက်ကၞာဝေဒ်နာမ်၊ ရေၚ်ၜဳ မၞုံပြၚ်ဗ္တဳတံ ကေုာံ ပ္ၚံက်ၜဳဟလံၚ် မဒှ်အာဲကၟာဲဂၠးတိယူနက်သကိုဝ်တံဒှ်တမ် အရာတံဏံဂှ် ၜိုန်ရဒှ်အရာတံၚ်ဂြဲ ညးအာတရဴတံကီုလေဝ် ကၟုဲအာတရဴဍုၚ်သ္အာၚ် မလုပ်စိုပ်ကၠုၚ်ဍုၚ် ပ္ဍဲသၞာံ ၂၀၂၂ တံဂှ်ဝွံ ဒှ်ဒၟံၚ်ပမာဏ အောန်နူကဵု (၃ ဒဿမ ၇) မဳလဳယာန်ရ။
အတိုၚ်ဂလာန် သ္ကိုပ်ဝန်ဇၞော်ဝေဒ်နာမ်ဂှ်မ္ဂး မူဝါဒမဆေၚ်စပ်ကဵု နဲကဲအခိုက်အလိုက် ပရေၚ်မၞိဟ်လုပ်တံဂှ် သွက်ဂွံပလေဝ် အတိုၚ်အစဳဇန် အခေါၚ်သ္ကဵုဗၠးနူဝဳဇြာ၊ သွက်ပရေၚ်ပပဵုပ္တိုန်အာယုက်ဝဳဇြာ နကဵုၚုဟ်ဒးဒး၊ အစဳဇန် E Visa တံဂှ် စၞောန်ပ္ညုၚ်လဝ် ဂကောံအလဵုအသဳတံရောၚ်ဂှ်လေဝ် ဂွံတီကေတ်ရ။
ဝေဒ်နာမ်ဝွံ သွက်ဍုၚ်ယူရောပ် (၁၁) ဍုၚ်ကဵု သွက်ဍုၚ်အာယှ (၂) ဍုၚ်ဂှ် ဖအောန်ဖျေံကဵုလဝ် အခေါၚ်ဟွံဒးကေတ်ဝဳဇြာ အပ္ဍဲဍုၚ် ပွိုၚ် (၁၅) တ္ၚဲရ။
အာဇြဳယာန် (၉) ဍုၚ်ဂှ် မံၚ်တန်တဴအပ္ဍဲဍုၚ် ပွိုၚ် (၃၀) တ္ၚဲမာန်တုဲ ဍုၚ် (၈၀) ဍုၚ်ဂှ် ကဵုလဝ်အခေါၚ်အာတ်ပ္တိုန် E Visa ဂှ် ဂွံတီကေတ် အတိုၚ်တၚ်နၚ် ပရေၚ်ကောပ်ကာဲပရေၚ်မၞိဟ်လုပ်တံရ။
ဌာနဝန်ဇၞော် ကမၠောန်အာတရဴ၊ ဝေၚ်ဇြဟတ် ကေုာံ အခိုက်ကၞာ ဍုၚ်ဝေဒ်နာမ်ဂှ် မူဝါဒဝဳဇြာဝွံ သွက်ဂွံတံၚ်ဂြဲ ညးအာတရဴဍုၚ်သ္အာၚ်တံဂှ် ဒှ်ကောန်ဍေၚ်အဓိကရောၚ်ဂှ်လေဝ် ဟီုဂးလဝ်ရ။
Ref: The Straits Times