မတ်မလီု၊ မာတ်ချ်(၁၈)
ဌာန်ဂအုပ်ရးပၞာန်ဒိုဟ်အဂၞဲ ဖျေံသ္ဇိုၚ်ဍုၚ်မတ်မလီု၊ တွဵုရးဍုၚ်မန်ဂှ် ပ္ဍဲဂိတုမာတ်ချ် စၟတ်တ္ၚဲ (၁၆) တ္ၚဲတုဲကၠုၚ် အခိၚ်ဗ္တံဂှ် ဒးဒုၚ်ဗတိုက်လဝ် နကဵုဒရုမ်ရဂှ် တမ်ရိုဟ်တၚ်ဂၞၚ်ပရိုၚ် ပ္ဍဲဒပ်ပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဌာန်ဂအုပ်ရးပၞာန်ဒိုဟ်အဂၞဲ ကံၚ်ဇြဳပၞာန် မ္ၚးနူဂီုကၠီုရးပၞာန်တုဲ သုၚ်စောဲလဝ် သၞောတ်ကုတ်ဗပိုတ်ဒရုမ် ဗွဲမဂၠိုၚ် ပ္ဍဲတ္ၚဲတုဲကၠုၚ်တေံ အခိၚ်ဗ္တံ (၁၀)နာဍဳဂှ် ထောံဖျေံလဝ်ဗုမ် (၃) မ နကဵုရုမ်တုဲ ဒးဒုၚ်ဗတိုက်လဝ်ရ။
ဟိုတ်နူဒးဒုၚ်ဗတိုက်လဝ် နကဵုဒရုမ်တုဲ စမြိုၚ်မွဲမ ဇီုကပိုက်ဒးလီုလာ်လဝ်ကီု မၞိဟ်ဇီုကပိုက်ဒးလဝ်ဟၟဲရဂှ် ဟီုသ္ဂးလဝ်ရ။
အတိုၚ်ပရိုၚ်တိတ်ကၠုၚ် နူဒပ်ပၞာန်မ္ဂး ပရေၚ်ဗတိုက်ပန်ပှော်ဏံဂှ် ၜိုန်ပ္တဝ်လဝ်ကဵု စမြိုၚ်စွံက္ၜၚ်ကျာသၞေၚ်ဝဲတုဲ ဗတိုက်လဝ်ကီုလေဝ် ဟိုတ်နူဗ္ဂပ်စုတ်လဝ် သၞောတ်ကုတ်ဗပိုတ်ဒရုမ်ဂှ်ရ ဟွံဒးလဝ်ရဂှ် ဟီုသ္ဂးလဝ်ရ။
ညးဍုၚ်ကွာန် နွံဒၟံၚ်ဗ္ဒာဲဌာန်ဂအုပ်ရးပၞာန်ဒိုဟ်အဂၞဲ မွဲတၠဂှ်မ္ဂး ကြဴနူပရေၚ်ပါ်ခတိုဟ် က္တဵုဒှ်လဝ် ပ္ဍဲရးပၞာန်ဂှ်တုဲ က္လေၚ်ပန်ပှ်ောလဝ် ၜိုန်ရဟွံဂွံမိၚ်ကေတ်ကီုလေဝ် တ္ၚဲဏံပတေၚ်ဂြတ်လဝ် ပရေၚ်ဂီုကၠီုကီု ကောန်ဒပ်ကံၚ်ဇြဳပၞာန်တအ် ဇိုၚ်ကၠေတ်ဒၟံၚ်ကီုရဂှ် ဟီုသ္ဂးလဝ်ရ။
ဌာန်ဂအုပ်ရးပၞာန်ဒိုဟ်အဂၞဲကံၚ်ဇြဳပၞာန်ဂှ် နူကဵုအခိၚ်စခၞံပ္တန် ဌာန်ဂအုပ်ပၞာန်တုဲ ဒးဒုၚ်ဗတိုက်လဝ်ဏံ ဒှ်အလန်ကိုပ်ကၠာအိုတ်တုဲ ပရေၚ်ဗတိုက်ဏံဂှ် နူဂကောံလဵု ကၠောန်သ္ပလဝ်ရောဂှ် စဵုအခိၚ်လၟုဟ် လလောၚ်တြးကၠုၚ်လဝ် ဟွံဂွံဆဵုညာတ်ကေတ်ဏီရ။
ဌာန်ဂအုပ်ရးပၞာန်ဒိုဟ်အဂၞဲ ကံၚ်ဇြဳပၞာန်ဖျေံသ္ဇိုၚ်ဍုၚ်မတ်မလီုဂှ် ဌာန်ဂအုပ်ပၞာန်စဳမာန်ကောပ်ကာဲ ကိစ္စဆေၚ်စပ်ကဵုပရေၚ်ဂီုကၠီု၊ ပရေၚ်စဵုဒၞာ ကေုာံပရေၚ်ပၞာန် တွဵုရးဍုၚ်မန် ကေုာံတွဵုရးကရေၚ်လေဝ် ဒှ်ရ။
ပရိုၚ်-သြၚ်လောန်တိုၚ်(မ်)
ဗီုဓာတ်− CINCDS