လံၚ်လုၚ်၊ မာတ်ချ်(၁၈)
ရးဒေသဇၞော်တၞၚ်သဳ၊ ပွိုၚ်ဍုၚ်လံၚ်လုၚ်၊ ညးဍုၚ်ကွာန်ပါဲဘဲပၞာန် ကၠုၚ်ပါဲဓလေတ်ဒၟံၚ် ပ္ဍဲကွာန်ယျတုၚ် (၃၀)တၠ ဒပ်ကံၚ်ဇြဳပၞာန် ရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ဇြဟတ်မၞုံ (၁၀၀)တၠပြၚ်ဂှ် တ္ၚဲဏံ ဂိတုမာတ်ချ် စၟတ်တ္ၚဲ (၁၆) အခိၚ်ဇိုၚ်သဝ်တ္ၚဲ လုပ်စိုပ်ကၠုၚ် ပ္ဍဲကွာန်ယျတုၚ်တုဲ ရပ်ကေတ်ဏာလဝ် ညးဍုၚ်ကွာန်ပါဲဒၟံၚ်ဘဲပၞာန် ပ္ဍဲကၠအ်တအ် နဒဒှ်ဒေၚ်ဒုၚ်ဒၞာမၞိဟ်ရ။
ညးဍုၚ်ပါဲပၞာန် ဒပ်ကံၚ်ဇြဳရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်တအ်ဂှ် ဒှ်ညးကၠုၚ်ပါဲဒၟံၚ်ဘဲပၞာန် ပ္ဍဲကွာန်ယျတုၚ် နူကဵုကွာန်အောက်ကျောက်ဝါတ်တုဲ ပ္ဍဲကဵုမၞိဟ်ဒးဒုၚ်ရပ်လဝ်ဂှ် မၞိဟ်အာယုက်ဇၞော် ကောန်ၚာ်သၟတ်တအ်လေဝ် ပါလုပ်ဒၟံၚ်ရဂှ် ဂွံတီကေတ်ရ။
လၟုဟ်ဏံမ္ဂး ညးဍုၚ်ကွာန်ပါဲဘဲပၞာန် ကံၚ်ဇြဳပၞာန်ရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်တအ်ဂှ် ဒပ်ကံၚ်ဇြဳပၞာန် ရပ်စွံလဝ် ပ္ဍဲဘာလကျာ် ကွာန်ကဒေတ်ၚထုၚ်တုဲ ဒက်ဗၠန်လဝ်တဲ ညးဍုၚ်ကွာန်ပါဲပၞာန်လ္ၚဵုတအ်တုဲ ရပ်ဏာလဝ်ရဂှ် ဟီုသ္ဂးလဝ်ရ။
ကောန်ကွာန်အောက်ကျောက်ဝါတ် (၅)တၠတအ်ဂှ် ပ္ဍဲဂိတုမာတ် စၟတ်တ္ၚဲ(၄)တုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ရပ်ဒက်ပြိုက်ဂစိုတ်လဝ် ပ္ဍဲဝိုၚ်ဗဝ်ကွာန်ဂှ်ရ ညးဒေသ (၂၀၀)တၠပြၚ် ဒးဂြိပ်ဒဴဒၟံၚ် ပ္ဍဲဒၞာဲဗၠးဘဲရ။
ပ္ဍဲရးဒေသဇၞော်တၞၚ်သဳဂှ်မ္ဂး ဃောဒပ်ကံၚ်ဇြဳပၞာန် ထ္ပက်လုပ်ကရောၚ်ပၞာန် ပ္ဍဲကွာန်တအ်ဂှ် တံၚ်ဒၟံၚ်ပဝ်တာညးဍုၚ်ကွာန်ကီု၊ ရပ်သ္ပဒၟံၚ်ဒေၚ်ဒုၚ်ဒၞာမၞိဟ် ကေုာံပြိုက်ဂစိုတ်ဒၟံၚ်တအ်ဂှ် ဒပ်ကံၚ်ဇြဳပၞာန် က္လိလောန်ကၠုၚ်ဒၟံၚ် အဆက်ဆက်ရ။
အတိုၚ် Southern Monitor မဒှ်ဂကောံ သုတေသနမွဲဂကောံ ဟီုဂးလဝ်မ္ဂး ပ္ဍဲမွဲကာလပၞာန်သီအဝဵုဏံ ပ္ဍဲရးတၞၚ်သဳ ကောန်အရာပ်ဒးဒုၚ်ပြိုက်ဂစိုတ်လဝ် ဗ္ဒာဲ(၄၀၀)တၠရဂှ် လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ(၅)တေံရ။
ပရိုၚ်သြၚ်လောန်တိုၚ်(မ်)