နျူယျံက် – မာတ်ချ်(၁၈)
ပရေၚ်ဒပ်ပၞာန်သီအဝဵု က္လိကလောန်ဒၟံၚ် ပရေၚ်ပြိုက်ဂစိုတ်မၞိဟ် ဗွဝ်ကဵုဗွဝ်ဂှ် ဒှ်အယာံမာတ် ဖံက်ပ္ကဝ်ဒၟံၚ်အခေါၚ်အရာမၞိဟ် သက်က်ဟေၚ် ဟွံသေၚ်တုဲ ဖံက်ပ္ကဝ်ဒၟံၚ် သၞောဝ်ဥပဒေ ကၟိန်ဍုၚ်နာနာဂှ်ရ ဒှ်ဒုဟ်ရာဇဝတ်က္လိလောန်ဒၟံၚ် ပ္ဍဲလတူကောန်ဂကူမၞိဟ်ရဂှ် ဥူကျဝ်မိုဝ်ထောန် ဟီုသ္ဂးလဝ်ရ။
ပ္ဍဲကောံဓရီု ညးစၞးတၟေၚ်ညးအုပ်ကာနာနာကုလသမဂ္ဂ ဆေၚ်ရာကဵုကၟိန်ဍုၚ်ဗၟာ ဗွဲပလးစပ်ကဵုအကာဲအရာရိုဝ်ဟေန်ဂျာ နူကၟိန်ဍုၚ်ဗၟာ ကၠောန်ဗဒှ်လဝ် ပ္ဍဲဂိတုမာတ် စၟတ်တ္ၚဲ(၁၆) ဂှ် ဟီုသ္ဂးလဝ်သာ်ဏံရ။
ကံၚ်ဇြဳပၞာန် က္လိလောန်လဝ်ပရေၚ်ပြိုက်ဂစိုတ်မၞိဟ် ဗွဝ်ကဵုဗွဝ် ပ္ဍဲဂိတုမာတ်ချ် ရးသေတ်ဂါၚ်၊ ပွိုၚ်ဍုၚ်မျေန်မူ ကွာန်တာတိုၚ် ကေုာံပွိုၚ်ဍုၚ်သေံဇၞော် ပွိုၚ်ဍုၚ်ပေန်လံၚ် ကွာန်ဏာမ်နုၚ်တအ်ရဂှ် ဥူကျဝ်မိုဝ်ထောန် ဟီုသ္ဂးလဝ်ရ။
ပ္ဍဲအခိၚ်ဒးဒုၚ်သီအဝ်အလဝဵု ပွိုၚ်(၂)သၞာံဏံ ညးဍုၚ်ကွာန်တအ် ဒးဒုၚ်ဆေၚ်ဒၟံၚ်မုက်ကဵု အကာဲအရာပရေံဝါတ်ဂါတ်အိုတ်တုဲ ဒဒိုက်ညးဍုၚ်ကွာန်ကၟိန်ဍုၚ်ဗၟာ သီုရိုဝ်ဟေန်ဂျာတအ် ဒးဒုၚ်ဆေၚ်ဒၟံၚ်မုက်ဂှ် ဟွံအောန်ယအ်နူ အကာဲအရာက္တဵုဒှ်ဒၟံၚ် ပ္ဍဲဒေသတၞဟ်ရဂှ် ဟီုသ္ဂးလဝ်ရ။
ပွမကုတ်ဗပိုတ်ကဵု ဇၟောဝ်လွဟ်လက်နက်၊ ပရေၚ်သွံကဵုဒၟံၚ် ကၠေၚ်က္ၜၚ်ကျာ ကေုာံဇၟောဝ်သြန်ဘဏ္ဍာ ဇွောဝ်လုပ်ဒၟံၚ်ပ္ဍဲသ္ကေံတဲကံၚ်ဇြဳပၞာန် က္လိလောန်ဒၟံၚ်လတူညးဍုၚ်ကွာန် ယုတ်ပရေံကီု၊ ပရေၚ်ထံက်ပၚ်ကဵု အရီုဗၚ်ထ္ၜလဘာ်ပရေၚ်မၞိဟ် ဇရေၚ်ညးဍုၚ်ကွာန်ကီု၊ ကောန်ကၟိန်ဍုၚ်ဗၟာ ကေုာံ ညးက္တဵုဒှ်ဒဒိုက်ကောန်ကၟိန်ဍုၚ်ဗၟာ အာတ်မိက်လဝ် အခေါၚ်ဇူဗ္ဒာဲပရေၚ်ဍုၚ်ကွာန်ကီု သီုညးဟၟဲကဵုအရီုဗၚ်တအ်ဂှ်လေဝ် သွက်ဂွံစဵုဒၞာကဵု ပ္ဍဲကၟိန်ဍုၚ်မဆေၚ်စပ်ဂှ် အာတ်မိက်လဝ် ကၟိန်ဍုၚ်နာနာရ။
သ္အာၚ်နူဏံပၠန် ညံၚ်ဂွံကေတ်အရေဝ် ကုဒပ်ပၞာန်ဗၠးတိတ်ဒၟံၚ် နူပရေၚ်ဒးဒုၚ်ကေတ်ဒုဟ်ဒဏ်ဂှ်ကီု သီုကဵုသွက်ဂွံပတိုန်ဂဗုတ် ကုညးက္လိလောန်လဝ် ဒုဟ်ဒဏ်ကၟိန်ဍုၚ်နာနာ ဇၞော်ကဵုဇြဟတ် ပ္ဍဲရုၚ်သၞောဝ်ဓဝ်ရာဇဝတ်ကၟိန်ဍုၚ်နာနာ ကေုာံ ဒက်ပ္တိုန်ရုၚ်သၞောဝ်ဓဝ်ယာယဳတုဲ သွက်ဂွံဖျေံအာဒုဟ်ဒဏ်ဂှ် ဥူကျဝ်မိုဝ်ထောန် အာတ်မိက်လဝ်ရ။
အခိၚ်လၟုဟ်ဏံမ္ဂး ကံၚ်ဇြဳပၞာန်က္လိလောန်လဝ် ဒုဟ်ပြိုက်ဂစိုတ်ညးဍုၚ်ကွာန် ဗွဝ်ကဵုဗွဝ် (၆၄)ဝါတုဲ ဟိုတ်နူပရေၚ်ပရောတအ်ဏအ်ဂှ် ညးဍုၚ်ကွာန်(၇၆၆)တၠ ဒးချိုတ်အာလဝ်ရဂှ် ဌာနဝန်ဇၞော်အခေါၚ်အရာမၞိဟ် NUG လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)