မတ်မလီု၊ မာတ်ချ်(၁၈)
ကောံဓရီုကဝ်မတဳပ္ညဳပ္ညပ် ပရေၚ်ဍုၚ်ကွာန်ကၟိန်ဍုၚ် (FPNCC) ဂှ် ကၠောန်ဗဒှ်လဝ် ပ္ဍဲဂိတုမာတ်ချ် စၟတ်တ္ၚဲ(၁၅)ကေုာံ စၟတ်တ္ၚဲ(၁၆) ပွိုၚ်ၜါတ္ၚဲတုဲ အခိၚ်ကောံဓရီုတုဲဂှ် ဒုၚ်ဒၟံၚ်တၠုၚ် ပရေၚ်ကြုက်လုပ်ရေၚ်တၠုၚ် အကြာပရေၚ်အပ္ဍဲကၟိန်ဍုၚ်ဗၟာရဂှ် လလောၚ်တြးကၠုၚ်လဝ်ရ။
ကောံဓရီုဂှ် က္ဍိုပ်သ္ကိုပ် ဗော်ညဳသၟဟ်ဍုၚ်ဝ(UWSP)၊ ဒပ်ပၞာန်ဗၠးၜးကောန်ဂကူကချေၚ်(KIO)၊ ကဝ်မတဳပရေၚ်ၜိုဟ်လလံ ကေုာံပရေၚ်ညဳသၟဟ်ဒေသတၟေၚ်(၄)သေံဗၟံက်(PSC)၊ ဗော်တဴတက်ကောန်ဂကူသေံ (SSPP)၊ ဂကောံကောန်ဂကူရခေၚ် (AA)၊ ဗော်ကောန်ဂကူဓဝ်ဍာံ ကေုာံဗဗွဲဓဝ် ကၟိန်ဍုၚ်ဗၟာ (MNTJP)၊ ဒပ်ပၠတရဴပရေၚ်ဗၠးၜးတွဵုရးပလံၚ် (PSLF)၊ ကိုဝ်က(MNDAA)၊ ကေုာံ မိုၚ်ဠာ(NDAA) မဒှ်ဂကောံရပ်လွဟ်ကောန်ဍုၚ်အရၚ် မဟာမိတ်သၟဝ်ကျာတအ် တိုန်စိုပ်လဝ်ရဂှ် ဂွံတီကေတ်ရ။
အခိၚ်ကောံဓရီုတုဲဂှ် FPNCC လလောၚ်တြးပ္တိတ်လဝ် တၚ်လလောၚ်တြးပါလုပ် (၇)တၚ်တုဲ ပ္ဍဲကဵုဂှ် ဇၟာပ်ဂကောံပါလုပ် ပ္ဍဲဂကောံမဟာမိတ် (၇)ဂကောံတအ်ဂှ် ဒဒှ်ရတၚ်ဂုဏ်ကဵု အလဵုအသဳကၟိန်ဍုၚ်ကြုက် ရီုဗၚ်ကဵုလဝ်အခက်ခုဲ ပ္ဍဲမွဲကာလဂိုဝ်ဝေတ် -၁၉ကီု ဒုၚ်ဒၟံၚ်တၠုၚ် ပရေၚ်ကၟိန်ဍုၚ်ကြုက် လုပ်အကြာရေၚ်တၠုၚ်ကဵု သွက်ပဋိပက္ခ က္တဵုဒှ်ဒၟံၚ် ပ္ဍဲကၟိန်ဍုုၚ်ဗၟာ ညံၚ်ဂွံၜိုဟ်လလံအာရဂှ် ချူဓမံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲကဏ္ဍစုၚ် မပါလုပ်သီုပရေၚ်ၜိုဟ်လလံဒေသပယျဵုဂှ် ပံၚ်တောဲကဵု အလဵုအသဳကြုက်တုဲ ကၠောန်ရေၚ်တၠုၚ်အာရောၚ်ဂှ်လေဝ် ဟီုသ္ဂးလဝ်ရ။
စပ်ကဵု ပရေၚ်ပ္ဍဲဍုၚ်ကၟိန်ဍုၚ်ဗၟာတုဲ ကောန်ဂကူကောန်ဍုၚ်အရၚ် လၟိဟ်အောန် မၞုံပ္ဍဲဒေသပယျဵုတအ်ကီု သီုကဵုကောန်ဂကူ မၞုံလ္တူဍုၚ်ဇၞော် အလုံသီုဖအိုတ်တအ်ဂှ် ဒက်ပ္တန်ပရေၚ်ၜိုဟ်လလံတုဲ ညံၚ်ဂွံဒက်ပ္တန်အာ ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳဂှ် သုၚ်စောဲအာ အစောန်ဇြဟတ်ဇကုဇကုရောၚ်ဂှ် ဟီုသ္ဂးလဝ်ရ။
ကောံဓရီုဂှ် ကၠောန်ဗဒှ်လဝ် ပ္ဍဲဍုၚ်ပါန်သာန် တွဵုရးဝ ဒၞာဲဌာန်ဂအုပ် UWSA မၞုံတန်တဴဒၟံၚ်ဂှ်တုဲ အခိၚ်ကောံဓရီုတုဲဂှ် က္ဍိုပ်သ္ကိုပ် FPNCC ဂမၠိုၚ် သွက်ဂွံအာဆဵုဂဗကဵု က္ဍိုပ်သ္ကိုပ်အလဵုအသဳကြုက် ပ္ဍဲဍုၚ်ကူမေန် ကၟိန်ဍုၚ်ကြုက် နွံဒၟံၚ်ရဂှ်လေဝ် ပရိုၚ်တိတ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-FPNCC