ပေါက်-မာတ်ချ်(၁၈)
ရးဒေသမဂွေ၊ ပ္ဍဲဍုၚ်ပေါက်ဂှ် ကံၚ်ဇြဳပၞာန် သုၚ်စောဲက္ၜၚ်ကျာ MI-35 Jet Fighterတုဲ ဟိုတ်နူပန်ပှ်ောဒၟံၚ်ကြာန်ကြာန် မွဲကရောံကဵု ကရောၚ်ပၞာန်ဗလးတိတုဲ ညးဒေသ မသုန်လ္ၚီတၠပြၚ် ဒးပါဲဒၟံၚ်ဘဲပၞာန်ရဂှ် ဂကောံ ပ.က.ဖ ဒေသဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုမာတ်ချ် စၟတ်တ္ၚဲ(၁၅) တုဲကၠုၚ် အခိၚ်နူဂယးဂှ် ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်တနာပ်ပေန်ဇြေန် ပွိုၚ်ဍုၚ်ပေါက်တုဲ ညးဍုၚ်ကွာန်တအ် ဒးဂြိပ်ဒဴဒၟံၚ်ရ။
“နူကဵုတ္ၚဲတနေံတေံ အခိၚ်ဗ္တံ လုပ်ကၠုၚ်ကွာန်တနာပ်ပေန်ဇြေန်တုဲ ဒကဵုဂၟာဲလဝ်ရ။ နူဂယးဏံ ပန်လဝ်ကဵုက္ၜၚ်ကျာဂှ် ဇီုကပိုက်ဒးပိုဲဟၟဲရ။ လ္ပာ်ဏံလေဝ် ပန်လဝ်ကဵုဍေံတအ်နွံရ။ ပ္ဍဲဒၞာဲလုပ်တနာပ်ပေန်ဇြေန်ဂှ်လေဝ် ဒးလဝ်မာၚ်ဗတိုက်နွံရ”ဂှ် ညးတာလျိုၚ် ဂကောံ ပ.က.ဖ ဒေသမွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် ဟိုတ်နူကံၚ်ဇြဳပၞာန် ဒးမာၚ်တုဲ ဇီုကပိုက်ချိုတ် ဂၠိုၚ်ဒၟံၚ်တုဲ ဍေံတအ်ထေၚ်ခယျဂးပါ်ကရေက်ဇြဟတ်ဍေံတအ်တုဲ ကၠုၚ်ပန်ဒၟံၚ် နကဵုက္ၜၚ်ကျာရဂှ် ညးဟီုသ္ဂးလဝ်ဏီရ။
ဟိုတ်နူကရောၚ်ပၞာန်ကံၚ်ဇြဳ ဇြဟတ်မၞုံ ဗွိုၚ်(၁၀၀)ဂှ်တုဲ ညးဍုၚ်ကွာန် နူမပ္တံကဵု တနာပ်ပေန်ဇြေန်၊ ခပျိုဝ်၊ မုမ်တဝ်၊ အေန်ယျာ၊ သူလေဝ်ကုမ်၊ အေန်ပေန်၊ လေဝ်ဗ ကေုာံသဗတအ် (၅၀၀၀)တၠပြၚ် ဒးဂြိပ်ဒဴဒၟံၚ်ရ။
“တိဍာ်လ္ပာ်ဏံ ကြံၚ်မ္ၚိုဟ်ဒၟံၚ် တၟာဂလိုၚ်ရ။ ပၞော်သြန်လုပ်ဟီုဂှ်လေဝ် ဟွံဂွံကၠောန်ကမၠောန်တၟာလအ်တုဲ ဟိုတ်နူကမၠောန်ဟၟဲဂှ်ရ ကွာန်တေံတိတ်အာလတှ်ေ ကွာန်တေံဒုၚ်ဒါန်ဗ္စကဵု၊ ကွာန်ဏံတိတ်အာတှ်ေ ကွာန်ဏံဒုၚ်ဒါန်ဗ္စဖျုၚ်ကဵု တုဲပၠန်ထ္ပက်ဒၟံၚ်ကရောၚ်ပၞာန် အတိုၚ်လၟေၚ်ကွာန်ဟီုတှ်ေ ဟွံမံၚ်ပ္ဍဲကွာန်တုဲ ဒးမံၚ်ဒၟံၚ်ပ္ဍဲဂြိုပ်တအ်ဂှ်ရ သွက်ပရေၚ်စသုၚ်ဂှ် ဝါတ်ဂါတ်ခက်ခုဲဒၟံၚ်ရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်(မ်)ရ။
အခိၚ်လၟုဟ်ဏံဂှ် ဟိုတ်နူဒှ်ဒၟံၚ်အခိၚ်က္ညၚ်တုဲ ညးပါဲဒဴပၞာန်တအ် ဒးဆဵုဂဗဒၟံၚ်ကဵု ပရေၚ်ဝါတ်ဍာ်ကီု နွံဒၟံၚ်ပၟိက်ကဵုဇွောံမစၞစ၊ ဂဥုဲဇဗ ကေုာံ ကပေါတ်သုၚ်စောဲသ္ဇိုၚ်တအ်ရဂှ် ညးကဵုဒၟံၚ်အရီုဗၚ် မၞိဟ်ပါဲဘဲပၞာန်တအ် ဟီုသ္ဂးလဝ်ရ။
အခိၚ် MI-35 Jet Fighter စိုပ်ကၠုၚ်ဂှ် ကောန်ဒပ်ကံၚ်ဇြဳပၞာန်တအ် သွက်ဂွံကဵုသမ္တီ ဒဒှ်ရဍေံတအ် နွံဒၟံၚ်ပ္ဍဲကွာန်တနာပ်ပေန်ဇြေန်ဂှ်တုဲ စံၚ်လဝ်သ္ၚိ ပ္ဍဲကွာန်ဂှ် ပိမဏီရ။
လၟုဟ်ဏံဂှ် ကောန်ဒပ်ကံၚ်ဇြဳပၞာန် နူကဵုကွာန်တနာပ်ပေန်ဇြေန်ဂှ် ကလေၚ်တိတ်အာ လ္ပာ်ကွာန်ကုက္ကိုလ်သု ကွာန်ပျူသဝ်ထဳရဂှ် ဂွံတီကေတ်ရ။
ဗွဲကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲဂှ် ကၠောန်သ္ပလဝ် ပရေၚ်ဗတိုက်ပန်ပှ်ော နကဵုက္ၜၚ်ကျာ(၅၀၀)ဝါပြၚ်ရဂှ် NUG လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ