တယျေတ်ချောၚ်၊ မာတ်ချ်(၁၉)
ရးဒေသဇၞော်တၞၚ်သဳ၊ ပွိုၚ်ဍုၚ်တယျေတ်ချောၚ်၊ ကိုဝ်ဝေန်ထိုက် ကောန်ကွာန်ရၚေဝ် ပ္ဍဲပြၚ်က္ၜဳပေဝ်ဝ မၞုံပ္ဍဲကွာန်ပေဝ်ဒေတ်ဂှ် ဂကောံကံၚ်ဇြဳပၞာန်ကဵု ဂကောံပၞာန်ညးဍုၚ်ကွာန်တအ် ရပ်ဒက်ပြိုက်ဂစိုတ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမာတ် စၟတ်တ္ၚဲ (၁၇) အခိၚ်နူဂယး ၜိုတ်(၉)နာဍဳဂှ် ကိုဝ်ဝေန်ထိုက် ကောန်ကွာန်ယျၚေဝ် ဃောတိတ်အာ လ္ပာ်ကွာန်ပေဝ်ဒေတ် သွက်ဂွံသွံဖျာဂှ် ဒးဒုၚ်ရပ်လဝ်ကဵု ကံၚ်ဇြဳပၞာန် ကေုာံပၞာန်ညးဍုၚ်ကွာန်တအ်တုဲ ကၠေံအာလဝ်ရ။
ဇွကိုဝ်ဝေန်ထိုက်ကၠေံဒၟံၚ်ဂှ် ပ္ဍဲတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ်(၄)နာဍဳ ညးဒေသတအ် ဂွံဆဵုကေတ် ပ္ဍဲပြၚ်က္ၜဳပေဝ်ဝ သီုချိုတ်ဒၟံၚ်ရ။
ကိုဝ်ဝေန်ထိုက် ဒးဒုၚ်ရပ်ဒက်ပြိုက်ဂစိုတ်လဝ်ဂှ် ကံၚ်ဇြဳပၞာန်ကဵု ဂကောံပၞာန်ညးဍုၚ်ကွာန်တအ် ရပ်ဒက်ၜုၚ်တက် ပျဲပျာံလဝ်တုဲ ပန်ဂစိုတ်လဝ်ဂှ်ရ ပ္ဍဲသြိုဟ်၊ ကအ်၊ မုက်မတ်တအ်ဂှ် ဘဲဝပ်ပဍူတာဲဒၟံၚ်၊ ဒးချိုတ်လဝ် နကဵုဘဲဝပ်မကမ် ထ္ပက်လုပ်လဝ်ပ္ဍဲသြိုဟ်ရဂှ် ဂွံတီကေတ်ရ။
အတိုၚ်ညးဒေသတအ်ဟီုဂးလဝ်မ္ဂး ကိုဝ်ဝေန်ထိုက် ကောန်ကွာန်ယျၚေဝ် ညးမဒှ်ဗၠာဲဇၞော်ဂှ် ဒှ်ညးဂေတ်ကြေဝ် သွံဒၟံၚ်ခၞေဝ်ကေဝ် ပ္ဍဲကွာန်မွဲတၠတုဲ ပ္ဍဲညးဒးဒုၚ်ချိုတ်လဝ် အပါညးမတ်ဟွံညာတ်နွံ ဒၟံၚ်ရဂှ် ဟီုသ္ဂးလဝ်ရ။
ဇွကိုဝေန်ထိုက် ဒးဒုၚ်ဂစိုတ်လဝ်ဂှ် စဵုကဵုဂိတုမာတ်ချ် စၟတ်တ္ၚဲ (၁၈) အခိၚ်နူဂယးဏံ ညးလဵုဟွံဂွံသီကပှ်ကေတ်ဏီဂှ်ရ နွံဒၟံၚ် ပ္ဍဲပြၚ်က္ၜဳပေဝ်ဝ အတိုၚ်တြေံဏီရဂှ် ဟီုသ္ဂးလဝ်ရ။
ပ္ဍဲကဵုအကံက်တေဝ်လဳဂရာမ် လဝ်ဗဳဒပ်ပၞာန်တအ်မ္ဂး ကိုဝ်ဝေန်ထိုက်ဂှ် ဟိုတ်နူထံက်ပလံၚ်ဒၟံၚ်ကဵု ဂကောံဒပ်စဵုဒၞာညးဍုၚ်ကွာန်တအ်ဂှ်ရ ရပ်ဒက်ပြိုက်ဂစိုတ်လဝ်ရဂှ် ချူတြးဒၟံၚ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၇) တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ရပ်ဒက်ပြိုက်ဂစိုတ်လဝ် ကောန်ကွာန်ယျၚေဝ် ညးဒေသဂှ် (၂)တၠဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ