လံၚ်လုၚ်- မာတ်ချ်(၁၉)
ရးဒေသဇၞော်တၞၚ်သဳ၊ ပွိုၚ်ဍုၚ်လံၚ်လုၚ် ကွာန်ကဒေတ်ဂျဳဂှ် ကံၚ်ဇြဳပၞာန်လုပ်ကၠုၚ်တုဲ ဗက်ဂၠာဲဒၟံၚ်ကောန်ဒပ်စဵုညးဍုၚ်ကွာန်ဂှ်ရ သ္ၚိဌာန်ညးဍုၚ်ကွာန်ဂှ်လေဝ် ဂၟာဲဂၠာဲပလီုပလာ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမာတ်ချ် စၟတ်တ္ၚဲ (၁၇) တုဲကၠုၚ်တေံ ကရောၚ်ပၞာန်ကံၚ်ဇြဳ ဇြဟတ်မၞုံ (၅၀)ပြၚ်ၚ်ဂှ် ကၠောန်သ္ပလဝ် ပရေၚ်ဂၟာဲဂၠာဲ သ္ၚိဌာန်ညးဍုၚ်ကွာန်ပိုၚ် မၞိဟ်ဟၟဲတအ်ဂှ်ရ။
“နူတနေံတေံ ဃောတတ်ကၠုၚ်ယျတုၚ် ဂကောံရပ်နၚ်လဝ် ညးပါဲဘဲပၞာန်ဂှ် စိုပ်ကၠုၚ်ကဒေတ်ဂျဳရ။ အခိၚ်ဗ္တံဂှ် လုပ်ဂၠာဲလဝ် သ္ၚိမၞိဟ်ဟွံမံၚ် ပိပန်သ္ၚိရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုမာတ်ချ် စၟတ်တ္ၚဲ (၁၈) အခိၚ်နူဂယးဂှ်လေဝ် ဂၟာဲဒကဵုဒၟံၚ် သ္ၚိဌာန်မၞိဟ်မံၚ်တအ်ကီု ဖျေံလဝ်ဗ္ဒပ် ပ္ဍဲမွဲဗွိုၚ်ကွာန်ဂှ် စဵုကဵုအခိၚ်ဒေါဝ်တ္ၚဲတုဲ ဂၠာဲဒၟံၚ် PDF တအ်ဂှ်ရ ညးဍုၚ်ကွာန်တအ် ဟိုတ်နူဒပ်ကံၚ်ဇြဳပၞာန် လုပ်စိုပ်ကၠုၚ်ကွာန်တုဲ ဂြိပ်ဒဴဒၟံၚ်ကီု လ္ၚဵုဂှ်လေဝ် မၚ်ရံၚ်ဒၟံၚ် အကာဲအရာရဂှ် ညးဟီုသ္ဂးလဝ်ရ။
အခိၚ်လၟုဟ်ဏံ ကရောၚ်ပၞာန်ကံၚ်ဇြဳ လုပ်စိုပ်ပလီုလာ် ဂၟာဲဂၠာဲလဝ်သ္ၚိဒၟံၚ် ဟွံအောန်နူ (၅)မနွံတုဲ ကေတ်ဏာလဝ် ကပေါတ်နွံၚုဟ်မး ပါလုပ်သီုကွဳလိုန်ဓာတ်၊ လာပ်တပ်တအ်ဂှ်ရ။
ဟိုတ်နူကရောၚ်ပၞာန်ကံၚ်ဇြဳတုဲ ညးဍုၚ်ကွာန် နူကဒေတ်ဂျဳ၊ ကဒေတ်ၚေဝ် ကေုာံဍာ်ဗုတအ် ဒးဂြိပ်ဒဴဒၟံၚ်ရဂှ် ညးဒေသဂမၠိုၚ် ဟီုသ္ဂးလဝ်ရ။
သ္အာၚ်နူဂှ်ပၠန် ညးဍုၚ်ကွာန် ဒးဒုၚ်ရပ်ဏာလဝ် (ပဝ်တာ) နူကွာန်ယျတုၚ် (၃၀)တၠပြၚ်ဂှ်လေဝ် စဵုကဵုတ္ၚဲဏံ အခိၚ်နူဂယး ဟွံဂွံဗလးကဵုလဝ်ဏီတုဲ စကာကဵုယိုက်ဒၟံၚ် ဇွောံမ သီုလွဟ်၊ မကမ်ဒပ်ကံၚ်ဇြဳပၞာန်ရဂှ် ဂွံတီကေတ်ရ။
ဂိတုမာတ်ချ် စၟတ်တ္ၚဲ (၁၀)ဂှ်လေဝ် ဒပ်ကံၚ်ဇြဳပၞာန် လုပ်စိုပ်ကၠုၚ် ကွာန်ပညေတ်တုဲ စံၚ်ပလီုလဝ် သ္ၚိညးဍုၚ်ကွာန်ပိုၚ် ဟွံအောန်နူ(၅)မ သီုဟိုတ်ဟၟဲမွဲသာ်ဂှ်ရ ညးဒေသ ဗ္ဒာဲ (၇၀၀)တၠ ဂြိပ်ဒဴပါဲဓလေတ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ