နေဗျဳဒဝ်၊ မာတ်ချ် (၂၈)
ဂကောံရပ်လွဟ်ကောန်ဍုၚ်အရၚ် (EAOs) လ္ၚဵု မထံက်ပၚ်ဒၟံၚ် အလဵုအသဳညဳသၟဟ်ဂကူ NUG ကေုာံ ဂကောံဒပ်စဵုဒၞါညးဍုၚ်ကွာန် PDF တံဂှ် ကေတ်အာဒုဟ် ပိုတ်တ်သ္ကုတ်တ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
က္ဍိုပ်သ္ကိုပ်ပၞာန်သီအဝဵုဂှ် ဟီုလဝ် ပ္ဍဲကဵုအသေအဟာန်တ္ၚဲဒပ်ပၞာန်ဗၟာ မရနုက်ကဵု (၇၈) ဝါ ပ္ဍဲကဵုဂိတုမာတ်ချ် စၟတ်တ္ၚဲ (၂၇) ဂှ်ရ။
က္ဍိုပ်သ္ကိုပ်ပၞာန်ဂှ် ပရေၚ်ဗ္တိုက်ဂမၠိုၚ်ဝွံ ဒဒှ်ရဒှ်ပြဝပကီုပရာပ် ပလီုဍုၚ်ပလီုကွာန် NUG, PDF တံကီု သီုကဵု EAOs လ္ၚဵု မရီုဗၚ်ဒၟံၚ်ကုဍေံတံဟေင်ဂှ်တုဲ ညံၚ်ဂွံဒေါအ်ဒေၚ်အာ ဗွဲမအိုတ်သၟေဟ်ဂှ် နွံပၟိက် ဒးရေၚ်တၠုၚ်ရောၚ် ဟီုရ။
ညးအုပ်ကာ လၟိဟ် (၁) ဗော်တောတက်ကောန်ဂကူကရေၚ်ဍာဲ KNPP ခူဒါနဳယဴဂှ် နကဵုဂကောံပၞာန် စကာဒၟံၚ်အရေဝ်တံဏံ နူလက်ထက်ဥူနေဝေန်တေံရတုဲ ဟိုတ်နူမွဲဝါမှ ပလှ်ဖျေံ KNPP ဟွံမာန်ဂှ်ရ သ္ဇက်ဒးကၠောန်နွံဂှ် ဆက်ကၠောန်အာဏောၚ် ခၠေဝ်ပၠန်လဝ်ရ။
“ညအ်ဂှ် မအရေဝ်ဍေံတံ ဟီုဒၟံၚ်တွဵုရဏောၚ်။ ဟီုကၠုၚ်ဒၟံၚ် ဗီုဏံဂှ် လၟုဟ်မှ ဟွံသေၚ်ပုဟ်။ နူကဵုခေတ်ဥူနေဝေန်တေံရ မပ္တံကဵုထပိုတ်ရိုဟ်ကၞက်တံ မုတံရ။ စကာကၠုၚ်ဒၟံၚ်ဗီုဏံ လအ်ယျ။ မွဲလှ်ေမှ ပလှ်ပိုယ်ဟွံမာန်ပုဟ်။ လၟုဟ်လေဝ် ဆက်ဗ္တိုက်ဒၟံၚ်ရဏောၚ်။ ဍေံတံမုဟီုဟီု ဇကုဂှ်တှ်ေ ကမၠောန်ဇကု ဇကုကၠောန်ဏောၚ်၊ ကမၠောန်ဍေံ ဍေံကၠောန်ဏောၚ်။ နကဵုပိုယ် သ္ဇက်ဂွံဟီုတၟေၚ်ၚ်တၟဟ်ဟ် ဟွံမွဲပုဟ်” သာ်ဝွံ ညးသ္ဂးရ။
စပ်ကဵုဂလာန် က္ဍိုပ်သ္ကိုပ်ပၞာန် မဟီုဂးလဝ်ဂှ်တုဲ ညးဒုၚ်တာလျိုၚ် လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူဂှ် သၟာန်သၟုက် လစွံစိုတ်ကမ္မတဳဗဟဵု KIO တုဲမှဟေၚ် သှ်ကဵုဂွံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဗၠးၜးကချေၚ် (KIO) ကေုာံ ဗော်တောတက်ကောန်ဂကူကရေၚ်ဍာဲ (KNPP) တံဝွံ ကြဴနူဒပ်ပၞာန်သီဝဵုတုဲ ပ္ဍဲကဵုရးသက်ကိုၚ်ကီု သီုကဵုတွဵုရးကချေၚ် ကေုာံ တွဵုရးကရေၚ်ဍာဲတံဂှ် ပံၚ်တောဲကဵု ဂကောံဒပ်စဵုဒၞါညးဍုၚ်ကွာန် (PDF) တံတုဲ ပၠန်ဂတးတဝ်စၞေဟ် ရပ်ဒၟံၚ်လွဟ် ကုဂကောံဒပ်ကံၚ်ဇြဳပၞာန်တံရ။
ဗော်သွးကောန်ဂကူကရေၚ် KNU, ဒပ်ပၠတရဴကောန်ဂကူချေၚ် CNF, ဒပ်ပၠတရဴဒဳမဝ်ကရေတ်တေတ်ကွးဘာ စပ်ကဵုအလုံကၟိန်ဍုၚ်ဗၟာ ABSDF မထ္ပက်လဝ်စၟတ်တဲ လိက်ကသုက်ဒေါအ်ပန်ပှော်အလုံဍုၚ် NCA တံဂှ်လေဝ် ပါလုပ်ဒၟံၚ် ပ္ဍဲပၠန်ဂတးက္ဍိုပ်က္ညၚ်ဏံ က္တိုၚ်ၚ်ကၟဟ်ဟ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူဖေတာန်ဂှ် အခိၚ်အခါ အခေါၚ်အရာကောန်ဍုၚ်အရၚ်၊ အခေါၚ်အရာဒဳမဝ်ကရေဇြဳ ကေုာံ ဖေဝ်ဒရာတံ ဒှ်မံၚ်မွဲထပ်ဓဝ်ဂှ် ညံၚ် EAO ကေုာံ PDF တံ ပံၚ်တောဲဟွံဂွံဂှ် ကံၚ်ဇြဳပၞာန် ဘပဠပါ်ထ္ကးဒၟံၚ်ဆီရောၚ်ဂှ် သ္ၚဳဂၠိပ်လဝ်ရ။
“ပ္ဍဲအခိၚ်ကာလဒှ်မံၚ်မွဲထပ်ဓဝ်သာ်ဏံဂှ် ကောန်ဍုၚ်အရၚ်တံဝွံလေဝ် ပရေၚ်ဒဳမဝ်ကရေဇြဳကီု၊ ပရေၚ်ဖေဝ်ဒရာကီု သီုဖအိုတ်ဂှ် အခိၚ်အခါညးတံ မစွံတဴၚုဟ်မးဂှ် စိုပ်ဒၟံၚ်ယျ။ ဟိုတ်ဂှ်ရ ပါ်ခြာသာ်ဏံဂှ် အံၚ်ဇၞးဟွံမာန်ပုဟ်။ ကောန်ဍုၚ်အရၚ်တံဂှ်လေဝ် ညံၚ်ဇြဟတ်ဍေံတံဂွံနွံ ပံၚ်တောဲညးသ္ကအ်တွဵုဏောၚ်။ ဍာံဍာံဂှ် ဟီုဗီုဏံဂှ်ဝွံ အတိုၚ်တၚ်ရန်တၟံဍေံတံ ညံၚ်ပံၚ်တောဲလွာဲလွာဲဂှ် ဟွံဂွံဂှ် ကၠောန်လဝ်ရဏောၚ်။ အကြာ PDF ကဵု ဂကောံရပ်လွဟ်ကောန်ဍုၚ်အရၚ်တံ ညံၚ်ဂွိုအ်ပံၚ်တောဲအာဂှ် ဒှ်အရေဝ်ဘပဠပါ်ထ္ကးဆီရောၚ် အဲမိက်ဂွံဟီုရ” သာ်ဝွံ ညးသ္ဂးရ။
အတိုၚ်တၚ်နၚ် ဂကောံသုတေသန ISP-Myanmar တံဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ပ္ဍဲကဵုပွိုၚ်ဍုၚ် (၁၉၀) ပြၚ်ဟွံကဂှ် ပေါဲဗ္တိုက်အပံၚ် (၈၀၀၀) ပြၚ် က္တဵုဒှ်လဝ်တုဲ ပေါဲဗ္တိုက်သီုဖအိုတ် ကဝက်ပြၚ်ဂှ်ဝွံ က္တဵုဒှ်လဝ် အကြာဒပ်ကံၚ်ဇြဳပၞာန်ကဵု ဂကောံဒပ်ရပ်လွဟ်ကောန်ဍုၚ်အရၚ်တံရောၚ်ဂှ် လလောၚ်ပ္တိတ်လဝ်ရ။
က္ဍိုပ်သ္ကိုပ်ပၞာန်ဂှ် နကဵုဒပ်ပၞာန် ဒဒှ်ရပံက်လဝ်ကဵုတြၚ်လၟိုန် ကုဂကောံရပ်လွဟ်ကောန်ဍုၚ်အရၚ်တံ ညံၚ်ဂွံကၠုၚ်စိုပ် လ္တူဝိုၚ်ခုၚ်တက်ကျာပရေၚ်ၜိုဟ်လလမ်ဂွံမာန်ဂှ်တုဲ ညံၚ်ပရေၚ်ဗ္တိုက် NUG ကေုာံ PDF တံ ဂွံဒေါအ်ဒေၚ်အာပေၚ်ၚ်ဂှ် နွံပၟိက်ဒးရေၚ်တၠုၚ်ရောၚ်ဂှ် သ္ဂးရ။
သ္အာၚ်နူဂှ်ပၠန် သွက်ဂွံရေၚ်တၠုၚ်ပေါဲရုဲမာဲ ဒၞါဲသှ်ေဟွံမွဲ ဗွဲမပြဟ်မာန်ဂှ် ပရေၚ်ညိၚ်ဝတ်ၜိုဟ်သြိုဟ်ဝွံ ဒှ်တၚ်နွံပၟိက်အဓိကဂှ်ရ ကၠောန်ဆဆဵုဟွံဂွံပုဟ်ဂှ် ဟီုလဝ်ရ။
သီုအလဵုအသဳညဳသၟဟ်ဂကူ NUG ပါလုပ်ကီု သီုကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် ကေုာံ ဂကောံဇြဟတ်ပၠန်ဂတးတံဂှ် ပေါဲရုဲမာဲကံၚ်ဇြဳပၞာန် မကၠောန်ဗဒှ်ဂှ်ဝွံ ဒှ်ဆအလီပတောံရဂှ်တုဲ ဒုၚ်အာတဲဟွံသေၚ်ပုဟ်ဂှ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI