ဘာပန်၊ မာတ်ချ် (၂၉)
ပ္ဍဲဂိတုမာတ်ချ် (၂၈) အခိၚ်နူဂယး ဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်သီလဝ် ဗ္ဒိုပ်ဒပ်မေဝ်ကထာ ကံၚ်ဇြဳပၞာန် မၞုံဗ္ဒါဲပယျဵုသေံ−ဗၟာ ခရိုၚ်ဘာပန် ဗော်သွးကောန်ဂကူကရေၚ် KNU ဂှ်ရောၚ် ညးမၞုံအခေါၚ်ဟီုဂး ဒပ်မဟာ (၅) ကေုာံ ဂကောံဒပ်ပံၚ်ကောံတံ ဟီုဂးသ္ပဒတန်လဝ်ရ။
ဗ္ဒိုပ်ဒပ်မေဝ်ကထာ ကံၚ်ဇြဳပၞာန် မဒှ်ဗ္ဒိုပ်အာယုက်ဂၠိၚ်အိုတ်မွဲ မၞုံဗ္ဒါဲၜဳသြၚ်လောန် ပယျဵုသေံ−ဗၟာ ခရိုၚ်ဘာပန် တွဵုရးကရေၚ်ဂှ် ပ္ဍဲဂိတုမာတ်ချ် (၂၈) ၜိုတ်အခိၚ်နူဂယး (၅) နာဍဳဂှ် ဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်လဝ်ရ။
ပ္ဍဲပေါဲဗ္တိုက်သီဗ္ဒိုပ်ဂှ် ကြဴနူပရေၚ်ဆေၚ်မုက်ဒိဓဗတ် လလအ်ဗ္ဒါဲ (၁) နာဍဳ က္တဵုဒှ်တုဲဂှ် နူကဵုဂကောံမဟာမိတ် KNLA ဗ္တိုက်သီစံၚ်ပလီုပလာ်လဝ် ဗ္ဒိုပ်ဒပ်မေဝ်ကထာ ကံၚ်ဇြဳပၞာန်ရ။
အပ္ဍဲပေါဲဗ္တိုက်သီဗ္ဒိုပ်ဂှ် သီဂွံလဝ် သီုလွဟ်လက်နက်မကမ်တံတုဲ လ္ပာ်ကံၚ်ဇြဳပၞာန် ၜိုန်ရဇီုကပိုက်ပြဟ်လလုဲဂၠိုၚ်ကီုလေဝ် လၟိဟ်ဂၞန်ချိုတ်တ်ပၠိုတ်တ်ဂှ် ဟွံဂွံတီကေတ်ဏီရောၚ် Force for Federal Democracy-FFC လလောၚ်ပ္တိတ်လဝ်ရ။
အတိုၚ်တၚ်လလောၚ်တြး FFC ဂှ်မ္ဂး ပ္ဍဲပေါဲဗ္တိုက်သီဗ္ဒိုပ်ဂှ် ရပ်စပ်စကာလဝ် ဇြဟတ်ဒရုၚ်ဗွဲမဂၠိုၚ်ဂၠေၚ်တုဲ ဗ္တိုက်သီမာန်လဝ်ကီုလေဝ် နူလ္ပာ်ဂကောံဒပ်ပံၚ်ကောံဂှ် ကောန်သ္ဂံၚ် (၁) တၠ ပြဟ်လလုဲတုဲ (၃) တၠ ကလိဂွံလဝ်ဝပ်ဂှ် သ္ဂးရ။
ဟိုတ်နူပေါဲဗ္တိုက်သီဗ္ဒိုပ်မေဝ်ကထာဂှ်တုဲ ညးဒေသဂမၠိုၚ် ဒးဂြိပ်ဒဴပါဲဒလေတ်ဒၟံၚ်တုဲ ကြဴနူဗ္ဒိုပ် ဒးဒုၚ်စံၚ်ပလီုတုဲဂှ် က္ၜၚ်ကျာလ္ပာ်ကံၚ်ဇြဳပၞာန်တံ ကၠုၚ်ဒၟံၚ်အဆက်က်ရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ