ကျာ်ထဝ်၊ မာတ်ချ် (၂၉)
ဟိုတ်နူပရေၚ်ဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်မေဝ်ယုၚ်လေဝ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ်တုဲ ညးဒေသ (၂) တၠ ချိုတ်တုဲ (၂) တၠ ကလိဂွံလဝ်ဝပ်ဂှ် ညးဒုၚ်တာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ်ချ် (၂၇) အခိၚ်ဗ္တံၜိုတ် (၉) နာဍဳဂှ် ဂကောံဒပ်ကံၚ်ဇြဳပၞာန် မဖျေံလဝ်ဒပ် အပ္ဍဲကွာန်မယာန်ချံၚ်ဂှ် ပန်ပှော်လဝ် လွဟ်ဇၞော် အပ္ဍဲကွာန်မေဝ်ယုၚ်လေဝ် နကဵု ၆၀ မမရ။
ကမ်လွဟ်ဇၞော် နူကဵုဒပ်ကံၚ်ဇြဳပၞာန်တံ မပန်ပှော်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် အပ္ဍဲကၠအ်တဵုလွဳ ကွာန်မေဝ်ယုၚ်ဂှ်ရ မာၚ်ယှာန်ထိတ်အံၚ် အာယုက်မၞုံ ၂၄ သၞာံ မဒှ်ညးဒေသဂှ် ချိုတ်အာလွာဲဂှ်တုဲ သဝ်နံၚ်ဥူ အာယုက် (၂၄) သၞာံဂှ်လေဝ် ချိုတ်အာလဝ် ပ္ဍဲရုၚ်ဂဥုဲရောၚ်ဂှ် သ္ဂးရ။
သ္အာၚ်နူဂှ်ပၠန် ဥူမိုၚ်ဝေန်ဌေ၊ ဥူဝေန်မျေတ် မကလိဂွံလဝ်ဝပ် ကမ်လွဟ်ဇၞော်တံဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ခရိုၚ်သဓီုဂှ် ဂွံတီကေတ်ရ။
တုဲကၠုၚ် ပ္ဍဲဂိတုမာတ်ချ် (၁၇) ဂှ်လေဝ် ဟိုတ်နူဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲသုသာန်ကွာန်အၚ်္ဂဗိုဝ် ပွိုၚ်ဍုၚ်ကျာ်ထဝ်တံ ပန်ပှော်လွဟ်ဇၞော်ဂှ်တုဲ မၞိဟ်တြုံမွဲတၠ မဒှ်ညးဒေသကွာန်ဇြဳပျံၚ် ဇီုကပိုက်ကလိဂွံလဝ်ဝပ်ဏီရ။
ပ္ဍဲပွိုၚ်ဍုၚ်ကျာ်ထဝ် တိဍာ်ခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU ဂှ် လၟေၚ်ဒဒှ်တ္ၚဲ ဟိုတ်နူပန်ပှော်ဒၟံၚ်ဂှ်ရ ကောန်အရာပ်ဇီုကပိုက်ချိုတ်တံ ဆက်နွံဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ