မတ်မလီု၊ မာတ်ချ် (၂၉)
ဟိုတ်နူပေါဲဗ္တိုက် မက္တဵုဒှ်ဒၟံၚ် မွဲဒမြိပ်ဂၠံၚ်ဇၞော်အာယှ တွဵုရးကရေၚ်ဂှ်တုဲ ပရေၚ်ကူသာန်သွံရာန် သေံ−ဗၟာၜါဍုၚ် ဒှ်ကၠုၚ်ကြပ်ဒးဒေါအ်ဒေၚ်တုဲ ပရေၚ်သွံရာန်ဟွံလုပ်သၞောဝ် ညိညဓဝ်ဟေၚ် သှ်ေဒၟံၚ်ရဂှ် သၟာဗၞိက်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုမာတ်ချ် (၂၅) တုဲကၠုၚ်တေံတုဲ မွဲဒမြိပ်ဂၠံၚ်ဇၞော်အာယှ ကအ်ကြိက်၊ ဍုၚ်ကြုၚ်ဒဵု ကေုာံ ပ္ဍဲကဵုဒၞါဲဒေသအပိုၚ်အခြာသွံရာန်ဗၞိက်တံဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ဗွဲမသ္ကာတ်မြဟ်တုဲ ဒဵုကဵုအခိၚ်လၟုဟ်ဝွံလေဝ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။
ဟိုတ်နူအကာဲအရာ ပရေၚ်ဂီုကၠီုပရေၚ်ပၞာန် ပြဟ်ဟ်ဏံ ယှုက်ထုဲဒၟံၚ်ဂှ်ရ စနူဂိတုမာတ်ချ် (၂၅) ဂှ်တုဲ နူကဵုဍုၚ်ကြုၚ်ဒဵု ဒဵုကဵုဍုၚ်ဗြဝတဳ နကဵုဂၠံၚ်ဍာန်နဲကဲလဵုမှ ပွမကၠောန်သ္ပ တတ်ကၠောံအာကၠုၚ်တံ လ္ပကၠောန်သ္ပအိုတ်ညိဂှ် ကရောၚ်ပၞာန်ကၠဗု ဒုၚ်လဝ်ဂုဏ်ရ။
ဟိုတ်နူပေါဲဗ္တိုက်ဂမၠိုၚ်တုဲ ပရေၚ်ကူသာန်သွံရာန်ဗၞိက်မလုပ်သၞောဝ်ဂှ် ကြပ်ဒေါအ်ဒေၚ်အာပေၚ်ၚ်တုဲ ၜိုတ်ပရေၚ်သွံရာန် မပလံၚ်ပ္တိုန်ဒၟံၚ် ကပေါတ်ဗၞိက် နူကဵုဂၠံၚ်တရဴဟွံလုပ်သၞောဝ်တံ (၁၀) တၟံကၠံဟေၚ်ရ သှ်ေဒၟံၚ်ဂှ် သၟာဗၞိက်ပယျဵုမွဲတၠ ဟီုရ။
“လၟုဟ်ဂှ် လုပ်ကၠုၚ် နူကဵုဂၠံၚ်တရဴဟွံလုပ်သၞောဝ်တံသၟးရဏောၚ်။ နူကဵုဂၠံၚ်တရဴ (ထို့ကိုကိုး) ဂှ်တှ်ေ အရာမ္ဒးစသုၚ် ဟွံဒေါအ်ဟွံဂွံ နူကဵုဂၠံၚ်တရဴ ဗြဝတဳ−ဘာအၚ်တံဂှ် ၚုဟ်ဗၞိက်တံ တိုန်အာညိညရ၊ ကၠာတေံမ္ဂး တရဴဒးအာၜိုတ်မွဲနာဍဳဂှ် လၟုဟ်မ္ဂး ဒးအာၜိုတ် (၄) နာဍဳ။ ဂၠံၚ်ဒဵုဂှ်တှ်ေ ဂၠံၚ်ဂှ် ၜိုတ် (၄၀) တၟံကၠံဂှ် ခိုဟ်ဒၟံၚ်ရ။ တိုန်စှ်ေ ဒးအာကဵုဂၠုၚ်တံမုတံတုဲ ခက်ခုဲအာရ။ ဂၠံၚ်တရဴမလုပ်သၞောဝ်ဂှ် ကွဳစက်တံ အာဟွံဂွံတုဲ သီုဖအိုတ် ဒေါအ်ဒေၚ်အာအိုတ်ရ။ ကပေါတ်ဗၞိက်ဂေတ်ဂြိပ်ဂှ် ဒှ်အာၜိုတ်သုညရ။ ၜိုတ်မလုပ်ကၠုၚ် နူကဵုဂၠံၚ်တရဴဟွံလုပ်သၞောဝ်တံဓဝ်ဂှ်ရ အာဂွံ။ ၜိုတ်(၉၀) တၟံကၠံဂှ် ညံၚ်ကဵုဒေါအ်ဒေၚ်အာယျဏောၚ်၊ သွက်ဒေသ ဂွံရပ်စပ်သၟးရတှ်ေ နွံစ ၜိုတ် (၁၀) တၟံကၠံရ” သာ်ဝွံ သ္ဂးရ။
ဂၠံၚ်ဇၞော်အာယှ ဟိုတ်နူပေါဲဗ္တိုက်တံ က္တဵုဒှ်ဒၟံၚ်ဂှ်တုဲ ဒးအာဒၟံၚ် နူကဵုဂၠံၚ် (ထို့ကိုကိုး) ဂှ်ရ အခိၚ်လအ်တုဲ ခရိတ်အိုတ်နာနာ အိုတ်ဂၠိုၚ်တုဲ ကပေါတ်ဗၞိက်တံလေဝ် ၜိုတ်နွံပၟိက် ပၠောပ်ပ္တိုန်ဟွံဂွံဂှ်ရ ကပေါတ်ဗၞိက်သေံ ၚုဟ်တိုန်ကၠုၚ်ညိညဂှ် ဂွံတီကေတ်ရ။
အခိၚ်လၟုဟ်ဂှ်လေဝ် ဟိုတ်နူဒေသအပိုၚ်အခြာပရေၚ်သွံရာန်တံ ကၟာတ်လဝ်ဂှ်ရ ကပေါတ်ဗၞိက်တိတ်နူဒေသတံဂှ် ပွမပလံၚ်ပ္တိုန် ဍုၚ်မွဲလ္ပာ်တေံ ဒေါအ်ဒေၚ်အာလးလးတုဲ သွက်ဂွံပၠောပ် ကပေါတ်ဗၞိက်တံဂှ်လေဝ် ခက်ခုဲကၠုၚ်ဂှ်ရ အခိၚ်တ္ၚဲကၟာတ်လအ်ကၠုၚ်ဗက် ၚုဟ်ကပေါတ်ဗၞိက်ဍုၚ်သေံ သၠုၚ်တိုန်ကၠုၚ် တီတီဒှ်ဒှ်မာန်ရောၚ်ဂှ် သၟာဗၞိက်ဂမၠိုၚ် သ္ၚဳဂၠိပ်လဝ်ရ။
ညးသွံတြး ကပေါတ်ဗၞိက်သေံမွဲတၠဂှ်လေဝ် ဟိုတ်နူကွဳစက်ဖ္ဍိုက်ကပေါတ်ဗၞိက်တံ စှ်ေဟွံဂွံဂှ်ရ ရဲကပေါတ်သေံသၟေဟ်တံဂှ် ဟိုတ်နူကော်သၠုၚ်ပ္တိုန်ကၠုၚ်ၚုဟ်တုဲ ၚုဟ်သၠုၚ်တိုန်ကၠုၚ် ညိညဂှ် ဟီုရ။
“ကွဳစက်စှ်ေဟွံဂွံတုဲ (ၚုဟ်ဖျာ) ဂှ်တိုန်။ ဂၠံၚ်လီုတုဲ ကွဳစက်တံဂှ် စှ်ေဟွံဂွံပုဟ်။ ဒးဒေါအ်ဇူဒၟံၚ် သီုဖအိုတ်ရ။ ဟိုတ်နူဍေံတံဗ္ကန်လဝ် ကွဳစက်တံဂှ် လ္ပတိုန်၊ လ္ပအာကၠုၚ်တုဲ မၞိဟ်နွံဂှ်တှ်ေ ပ္တိုန်ၚုဟ်တုဲ သွံ။ ညအ်ဂှ် ဒှ်ဒၟံၚ်တွဵုရဏောၚ်။ ဗွဝ်ဖျာဗြဝတဳ−မတ်မလီုဂှ် ကော်ဒၟံၚ်ၚုဟ် ဗီုဏံရ။ ကေတ်ကပေါတ်ဟွံလောဲတုဲ ကော်သၠုၚ်ပ္တိုန်ၚုဟ်အိုတ်ရ။ ၜိုတ် (၂၀၀) (၃၀၀) ရ။ ဂၠံၚ် (ထို့ကိုကိုး) ဂှ်တှ်ေ ကွဳစက်ဖ္ဍိုက်ဗၞိက်ဂှ် ဟွံဂွံပုဟ်။ ကွဳစက်ဍောတ်တ်ရဂွံ ဇၞော်ဇၞော်ဂှ် ဟွံဂွံပုဟ်။ ပရိုဝ်ဗံက်ဂွံဏောၚ်၊ ဒိုၚ်နာဂွံဏောၚ်၊ ဍေံဂှ် ဒးကၠောံဖံၚ်တံမုတံဂှ် ဟွံပြေပြံၚ်ပုဟ်၊ ဂၠံၚ်ဍာ်ဂှ်နွံ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာပလံၚ်ဗစိုပ်ကပေါတ်ဗၞိက်သေံတံဂှ် ဟိုတ်နူပေါဲဗ္တိုက်တံကဵု အခက်အခုဲဂၠံၚ်တရဴတံဂှ်ရ ယဝ်ရကပေါတ်ဗၞိက်သေံတံဟီုမ္ဂး တန်တဴကဵုဂကူအဇာတုဲ နူပွဳပွူ (၂၀၀) ဒ္ကေဝ် စဵုကဵုပွဳပွူ (၁၀၀၀) ဒ္ကေဝ် ၚုဟ်သၠုၚ်တိုန်ကၠုၚ်ညိညဂှ် ဂွံတီကေတ်ရ။
ကၟိန်ဍုၚ်ဗၟာဝွံ နူကဵုအပိုၚ်အခြာဒေသသွံရာန်ဗၞိက်ဗြဝတဳဂှ် ပလံၚ်ပ္တိုန်ဒၟံၚ် အပ္ဍဲဍုၚ်သေံ သတ်တဵုလွဳတိတ်နူဒေသတံတုဲ ဍုၚ်သေံဂှ် ပၠောပ်ပ္တိုန်ဒၟံၚ် အပ္ဍဲဍုၚ်ဗၟာ ဗၞိက်စၞစသ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ်၊ ကပေါတ်ဗၞိက်အပြောံ အရပ်စပ်ပရေၚ်သိုၚ်ခၞံတံကီု သီုကဵုကပေါတ်ဗၞိက်အရပ်စပ်နာနာတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ