နျူယျံက်၊ မာတ်ချ် (၂၉)
ပ္ဍဲဍုၚ်မာန်ဟက်တာန် မဒှ်ခရိုၚ်မွဲ ပ္ဍဲကဵုခရိုၚ်(၅) ဍုၚ်နျူယျံက်ဂှ် သမ္မတတြေံ ဒဝ်နေဝ်ထြာပ် မဒးဒုၚ်စောဲဂဗုတ်မာန်ဂှ် သွက်ဂွံကလေၚ်ဒုၚ်ရုဲစှ် ပ္ဍဲသ္ၚိဗုဂှ် ကောန်ဍုၚ်အမေရိကာန်ဗွဲမဂၠိုၚ် ဟွံမွဲပၟိက်အိုတ်ပုဟ်ဂှ် ထ္မံက်ထ္ၜးလဝ် ပ္ဍဲလိက်ကံက်ကပှ်တၚ်နၚ်မွဲရ။
အတိုၚ်လိက်ကပှ်တၚ်နၚ် မၞုံယၟုမာရေတ် (Marist) မလလောၚ်ပ္တိတ်လဝ် ပ္ဍဲတ္ၚဲစန် ဂိတုမာတ်ချ် (၂၇) တေံဂှ်မ္ဂး မၞိဟ်ဟီု မိက်ဂွံကဵုထြာပ် အာယုက်မၞုံ (၇၆) သၞာံ ထပ်သ္ဂောံကလေၚ်ဒှ်သမ္မတ (၄) သၞာံပၠန်ဂှ် နွံ (၃၈) တၟံကၠံဓဝ်တုဲ မၞိဟ်အယဲစိုပ်တုဲ ဗ္ဒါဲ (၆၁) တၟံကၠံဝွံ ဟွံမိက်ကဵုထြာပ်ဒှ် သမ္မတမွဲဝါပၠန်ပုဟ်ဂှ် သ္ဂးအိုတ်ရ။
စပ်ကဵုပရေၚ် သမ္မတတြေံထြာပ် ကဵုကေတ်ဒဝ်ဠာ မွဲကိုဋ်ပိဠက် ၚုဟ်ကၟာတ်ပရိုၚ် ကုညးဗြဴဖောန်သတာဂှ်တုဲ အခိၚ်ဒးဒုၚ်စောဲဂဗုတ်မာန် ကုညးရေၚ်တၠုၚ်ဂဗုတ် ခရိုၚ်မာန်ဟက်တာန် အေဝ်လ်ဗေန်ဗရာတ်ယှ်ဂှ် ကံက်လဝ်စရၚ်ဆန္ဒမာဲဏံ နူဂိတုမာတ်ချ် (၂၀) စဵုကဵု (၂၃) အပ္ဍဲမွဲသတ္တာဟရ။
အတိုၚ်စရၚ်မကံက်ကပှ်လဝ်ဂှ်မ္ဂး ပ္ဍဲကဵုမၞိဟ်အယဲစိုပ်တုဲ (၅၆) တၟံကၠံဂှ်ဝွံ မ္ၚးနူကိစ္စပရေၚ် ညးရေၚ်တၠုၚ်ဂဗုတ်ခရိုၚ်ဂှ် သီုကဵုပရေၚ်ဂၠိုက်ဂၠါဲစၟဳစၟတ် စပ်ကဵုလုပ်စိုပ်ပလာပ်ပထုဲပေါဲရုဲမာဲ ပ္ဍဲဂျဝ်ဂျဳယာတေံဂှ်ကီု၊ ပရေၚ်ဂၠိုက်ဂၠါဲစၟဳစၟတ်ဖေဝ်ဒရာ ကေုာံ ရပ်စပ်သောၚ်ကလး ကုလိက်စၟတ်သမ္တီ ညးမပါလုပ်လဝ် ပ္ဍဲအဓိကိုရ်စမြိုၚ် ကာပဳတိုဝ် ပ္ဍဲသၞာံ ၂၀၂၁ ဂိတုဂျာန္နဝါရဳ (၆) တေံဂှ်ဝွံ ဗဗွဲဒၟံၚ်ကဵုသၞောဝ်ရဂှ် သ္ဂးလဝ်ရ။
အတိုၚ်စရၚ်မကံက်ကပှ်လဝ်ဂှ်မ္ဂး (၄၆) တၟံကၠံဂှ် ထေၚ်ဒၟံၚ် ထြာပ်ဝွံ ကၠောန်ဒၟံၚ်ဟွံလုပ်သၞောဝ်တုဲ ၂၉ တၟံကၠံဂှ် ၜိုန်ရသိက္ခာဟွံမွဲကီုလေဝ် ဟွံလုပ်သၞောဝ်ဟွံသေၚ်ပုဟ်ဂှ် ထေၚ်ခယျအိုတ်တုဲ ၂၃ တၟံကၠံဂှ် ညးမုမှကၠောန်လဝ်ဗၠေတ်တ်ဟွံမွဲပုဟ်ဂှ် ထ္မံက်ထ္ၜးလဝ်ရ။
ကောန်ဗော်ဒဳမဝ်ကရေတ်တေတ် ဗွဲမဂၠိုၚ် မပၠောပ်လဝ်စရၚ် (၈၉) တၟံကၠံဂှ်ကဵု ညးဟွံသေၚ်ကဵုဗော် ရဲဗၠးၜးဗွဲမဂၠိုၚ် (၆၄) တၟံကၠံ မကံက်ကပှ်လဝ်စရၚ်တံဂှ် ပရေၚ်ထြာပ်ဒှ်သမ္မတဂှ် ကယျာန်ပါဲလဝ်အိုတ်တုဲ ပ္ဍဲကဵုရဳပါတ်ပလေတ်ကာန်ဗွဲမဂၠိုၚ် (၇၆) တၟံကၠံဂှ် ပ္ဍဲသၞာံ ၂၀၂၄ ဏံ သွက်ဂွံထပ်ဒုၚ်ရုဲစှ်ဂှ် ဒဒှ်ရဆန္ဒမၞုံဂှ် ဟီုဂးလဝ်ရ။
တၠဆန္ဒမာဲထြာပ် ကၠာတေံ (၈၁) တၟံကၠံဂှ်လေဝ် ညးဝွံ ၜိုန်ရဒးဒုၚ်စောဲဂဗုတ်မာန်ကီုလေဝ် ဒဒှ်ရထံက်ဒၟံၚ်ဂလာန် နဒဒှ်သမ္မတ မရနုက်ကဵု(၄၅) သၞာံ ၂၀၂၄ တေံဂှ် သှ်ကဵုလဝ်ရ။
အတိုၚ်တၚ်ထ္မံက်ထ္ၜး ပ္ဍဲစရၚ်ကံက်ကပှ်တၚ်နၚ် (Marist) ဂှ်မ္ဂး ထြာပ်ဝွံ နူကလိဂွံလဝ် ပွမခၠေဝ်ပလန် မသ္ကာတ်မြဟ် နူဇရေၚ်ခရေတ်ယာန် အဳဝေန်ဂေလိ ဂကူမၞိဟ်ဗုတံဂှ်တုဲ ပၞောဝ်ကဵုဏံဂမၠိုၚ် ၄၁ တၟံကၠံဂှ်ဝွံ ဒဒှ်ရဒစဵုဒစး ကုထြာပ်ဂှ် စၞောန်ထ္ၜးလဝ်ရ။
ပ္ဍဲကဵုစရၚ်ဆန္ဒမာဲဏံဂှ် ကံက်ကပှ်လဝ် မၞိဟ်အယဲစိုပ်တုဲတံ (၁၃၂၇) တၠတုဲ ပ္ဍဲကဵုဂှ် (၁၂၂၆) တၠဝွံ ဒှ်တၠဆန္ဒမာဲ မပ္တိုန်လဝ်စရၚ်တံရောၚ်ဂှ် ဂွံတီကေတ်ရ။
Ref: New York Post