သလေန် -မာတ်ချ်(၃၀)
ရးဒေသမဂွေ၊ ပ္ဍဲပွိုၚ်ဍုၚ်သလေန်ဂှ် ဟိုတ်နူကံၚ်ဇြဳပၞာန် စံၚ်ပလီုလဝ်ကွာန်ကေန်ပေါန်ချုမ် သီုအလုံမွဲကွာန်တုဲ ညးဍုၚ်ကွာန် ဗွိုၚ်(၃၀၀)တၠ ဒးဂြိပ်ဒးပါဲဓလေတ်ဒၟံၚ်ရဂှ် ညးဒေသတအ် ဟီုသ္ဂးလဝ်ရ။
ဂိတုမာတ်ချ် တုဲကၠုၚ် စၟတ်တ္ၚဲ(၂၈) သ္ပတံနူ အခိၚ်နူဂယးပြဟ်တုဲ စဵုကဵုစိုပ်အခိၚ်ဒေါဝ်တ္ၚဲ ကြဴနူကံၚ်ဇြဳပၞာန်ကဵု ဒပ်စဵုညးဍုၚ်ကွာန်တအ် ဒှ်လဝ်ပေါဲဗတိုက်တုဲဂှ် လ္ပာ်ကံၚ်ဇြဳပၞာန်စံၚ်ပလီုလဝ်ကွာန် ညးဍုၚ်ကွာန်တအ်ရ။
လၟုဟ်ဂှ် ဒှ်ဒၟံၚ်အကာဲအရာ ၜိုတ်ကဝက်ကွာန်ကေန်ပွောန်ချုမ် ကံၚ်ဇြဳပၞာန် စံၚ်ပလီုဏာလဝ်ဂှ် ပါလုပ်အာ ပ္ဍဲပၟတ်ရဂှ် ညးဒေသမွဲတၠ ဟီုသ္ဂးလဝ်ရ။
ဟိုတ်နူပေါဲဗတိုက်ကံၚ်ဇြဳပၞာန်ကဵု ဒပ်စဵုဒၞာဒေသတအ်တုဲ သွက်ကောန်ဒေသ ဒးဂြိပ်ဒဴဒၟံၚ်တအ်ဂှ် နွံဒၟံၚ်ပၟိက်ကဵုအရီုဗၚ်ကာတၟေၚ် ပါလုပ်သီုဇွောံမစၞစရဂှ် Defence Force Salin လလောၚ်လဝ် ပရိုၚ်ရ။
ကရောၚ်ပၞာန်ကံၚ်ဇြဳ ဇြဟတ်ပါလုပ် (၂၀၀)တၠပြၚ်ဂှ် တံဒပ်သလေန် စၟတ်(၁) ခရိုၚ်မေန်ဘူ၊ တံဒပ်သဝ် (၃)၊ ပ.က.ဖ ပွိဖျူ၊ ပ.က.ဖ မေန်ဘူ၊ တံဒပ်ဇြေတုတ္တရာ (၃)တအ် ပံၚ်တောဲဗတိုက်လဝ်ရ။
ဟိုတ်နူပေါဲဗတိုက်တုဲ အကာဲအရာဇီုကပိုက်ချိုတ်ဂျိုၚ်ၜါလ္ပာ်ဂှ် ဟွံဂွံလလောၚ်တြးလဝ်ဏီရ။
ပရိုၚ်- သြၚ်လောန်တိုၚ်(မ်)
ဗီုရုပ် – People Defence Force Salin