ဗဝ်လခေဝ် – မာတ်ချ် (၃၀)
ဗ္ဒပ် BP-11 မဒှ်ဗ္ဒပ်ကံၚ်ဇြဳပၞာန် ဖျေံသ္ဇိုၚ်ပယျဵု သေံ – ဗၟာ မၞုံသ္ကုတ်ဗၟံၚ်က္ၜဳသြၚ်လောန်၊ တွဵုရးကရေၚ်ဍာဲ သီကေတ်မာန်လဝ်ရဂှ် ဒပ်ပၞာန်ကရေၚ်ဍာဲ KA တံဒပ် စၟတ်-၅ လလောၚ်လဝ်ပရိုၚ် ပ္ဍဲဂိတုမာတ်ချ် စၟတ်တ္ၚဲ(၂၈)ဏံရ။
ပ္ဍဲဂိတုမာတ်ချ် စၟတ်တ္ၚဲ (၂၄) တုဲကၠုၚ်ဏံ တံဒပ် KA စၟတ် (၅) ကေုာံဒပ်ပံၚ်ကောံတအ် ဗတိုက်သီကေတ်လဝ် ဗ္ဒပ်ကံၚ်ဇြဳပၞာန်တုဲ ပ္ဍဲပေါဲဗတိုက်ဂှ် လွဟ်မကမ်တအ်လေဝ် သီဂွံလဝ်ရဂှ် ဂွံတီကေတ်ရ။
ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် (၃)တၠ ဒးချိုတ်လဝ်တုဲ သီဂွံလဝ် ၆၀-မမ မွဲဒကိုအ်ကေုာံ လွဟ်သၟတ်(၆)ဒကိုအ်ရဂှ် KA ဟီုသ္ဂးလဝ်ရ။
မ္ၚးနူဂှ်ပၠန် ဂိတုမာတ်ချ် စၟတ်တ္ၚဲ(၁၆)တေံလေဝ် ဗ္ဒပ်ဟွောန်ဟိုၚ်ကံၚ်ဇြဳပၞာန် မဒှ်ဗ္ဒပ်ပယျဵု မၞုံသ္ကုတ်ဗၟံက်က္ၜဳသြၚ်လောန်ဂှ် ၜိုန်ရဗတိုက်သီကေတ် မာန်လဝ်ကီုလေဝ် ဟိုတ်နူကၠုၚ်ပန်လဝ်ကဵုက္ၜၚ်ကျာတုဲ ဒးက္လေၚ်ဆုတ်တိတ်လဝ်ရဂှ် ဂွံတီကေတ်ရ။
သ္ပတံနူဂိတုမာတ်ချ် သ္ကုတ်ကၠာတုဲ ဟိုတ်နူကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံဗပေၚ်ဇြဟတ်ဒပ် ကေုာံဇွောံမ ပ္ဍဲဗ္ဒပ်တွဵုရးကရေၚ်ဍာဲ ကေုာံဗ္ဒပ်ပယျဵုသေံတအ်တုဲ ဒပ်ပၞာန်ကရေၚ်ဍာဲကေုာံဒပ်ပံၚ်ကောံတအ် ကြတ်ဗတိုက်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KA