မတ်မလီု- မာတ်ချ်(၃၀)
ဗော်ပရေၚ်ဍုၚ်ကွာန်ဟွံပတိုန်စၟတ်သမ္တီ ပ္ဍဲပေါဲရုဲမာဲပ္တောံကံၚ်ဇြဳပၞာန်သီအဝဵု ဟွံသ္ပစၟတ်သမ္တီကဵု ပေါဲရုဲမာဲသီုဖအိုတ်တအ်ဂှ် သ္ပဏာရှ်ေသှ်ေ ပတိုန်ဏာဂုဏ်စရာဲရဂှ် သမ္မတအလဵုအသဳပရေၚ်ညဳသၟဟ်ကောန်ဂကူယာယဳ ဒူဝါလယှဳလ ဟီုသ္ဂးလဝ်ရ။
ပ္ဍဲကောံဓရီု ဂကောံအလဵုအသဳ မရနုက်ကဵု (၁၂)ဝါ အလဵုအသဳပရေၚ်ညဳသၟဟ်ကောန်ဂကူ ကၠောန်ဗဒှ်လဝ် ပ္ဍဲဂိတုမာတ်ချ် စၟတ်တ္ၚဲ(၂၈) တ္ၚဲဏံ ဟီုသ္ဂးလဝ်သာ်ဏံရ။
ကောံဓရီု ဂကောံအလဵုအသဳပရေၚ်ညဳသၟဟ်ကောန်ဂကူဂှ် သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန်ကီု သီုကဵုညးတာလျိုၚ် ဂကောံအလဵုအသဳဂမၠိုၚ် တိုန်စိုပ်လဝ်ရဂှ် ဂွံတီကေတ်ရ။
“ဗော်ပရေၚ်ဍုၚ်ကွာန် ဟွံပ္တိုန်စၟတ်သမ္တီပ္ဍဲပေါဲရုဲမာဲပ္တောံဒပ်ပၞာန်ပ္ကီုပရာပ်၊ ဟွံသ္ပစၟတ်သမ္တီကဵု ပေါဲရုဲမာဲသီုဖအိုတ်ဂှ်လေဝ် ဒဒှ်ရသ္ပဏာရှ်ေသှ်ေ ပတိုန်ဏာဂုဏ်စရာဲဂှ် မိက်ဂွံဟီုဏာ နူဒၞာဲဏံရ” ဂှ် သမ္မတယာယဳ ဒူဝါလယှဳလ ဟီုသ္ဂးလဝ်ရ။
မ္ၚးနူဂှ်ပၠန် က္ဍိုပ်သ္ကိုပ်ပၞာန်ဂှ် မ္ၚးနူဂွံထိၚ်ဒက် ဂကောံရပ်လွဟ်သၟဝ်တဲညးတံမာန်ဂှ် နတဲလေဝ် ဖေက်ဂၟံက်ဒၟံၚ် ပရေၚ်အလဵုအသဳညဳသၟဟ်ကောန်ဂကူ ကေုာံဒပ်စဵုဒၞာညးဍုၚ်ကွာန်တအ် အုပ်ဓုပ်တိဍာ်ရဂှ် ဟီုသ္ဂးလဝ်ဏီရ။
ဂလာန်က္ဍိုပ်သ္ကိုပ်ပၞာန် ဟီုသ္ဂးလဝ် ပ္ဍဲဂိတုမာတ်ချ် စၟတ်တ္ၚဲ (၂၇) ဗတိုက်သရိုဟ်ဗပိုတ်ရိုဟ် ဂကောံဇြဟတ်ပၠန်ဂတးတအ်ဏောၚ်ဂှ် ဓမံက်ထ္ၜးဒၟံၚ် စိုတ်ဖေက်ဂကောံပၞာန်ရဂှ် သမ္မတယာယဳ ဒူဝါလယှဳလ ဟီုသ္ဂးလဝ်ရ။
ကဝ်မယှေန်ပေါဲရုဲမာဲကၟိန်ဍုၚ် သၟဝ်တဲကံၚ်ဇြဳပၞာန်ဂှ် လလောၚ်တြးလဝ် ဒဒှ်ရသီပလီုကၠုၚ် ဗော်ပရေၚ်ဍုၚ်ကွာန် (၄၀)ဗော် ပါလုပ်သီုဗော် NLD နူကဵုဒဒှ်ဗော်ပရေၚ်ဍုၚ်ကွာန်ရဂှ် လလောၚ်တြးလဝ် ပ္ဍဲတ္ၚဲဏံရ။
ပရိုၚ်-သြၚ်လောန်တိုၚ်(မ်)
ဗီုရုပ် – NUG