တၞၚ်သဳ၊ မာတ်ချ် (၃၀)
ပ္ဍဲရးဒေသဇၞော်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန် ပ္ဍဲပွိုၚ်ဍုၚ်တၞၚ်သဳ၊ ဂၠံၚ်တၞၚ်သဳ−မံၚ်တဝ် ဗ္ဒါဲကွာန်(ချောၚ်းနှစ်ပေါက်) ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်သ္ကာတ်မြဟ်ဒၟံၚ်ရောၚ် ညးတာလျိုၚ် ပကဖ ပွိုၚ်ဍုၚ်တၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀) ပြၚ်ပါဂှ်ဝွံ ပ္ဍဲကဵုဂိတုမာတ်ချ် (၂၈) ဇိုၚ်သဝ်တ္ၚဲဂှ် ဟိုတ်နူလုပ်စိုပ်ကၠုၚ် အပ္ဍဲကွာန်(ချောၚ်းနှစ်ပေါက်)တုဲ နူကဵုဗ္တိုက်ဗ္တိုဟ်မာၚ်ဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
ပေါဲဗ္တိုက်ဏံဝွံ ဆက်သ္ကာတ်မြဟ်ဒၟံၚ် ဒဵုကဵုဂိတုမာတ်ချ် (၂၉) ဇိုၚ်သဝ်တ္ၚဲတုဲ အကာဲအရာဗွဲလစှ်ေ ဂှ် ဟွံဂွံတီကေတ်ဏီရောၚ် သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ဍာ်ဗု ပွိုၚ်ဍုၚ်တၞၚ်သဳတံဂှ်လေဝ် ဘိုၚ်ပန်ပှော်ဒၟံၚ်ကဵု လွဟ်ဇၞော်တံ ဟွံပိုတ်သ္ကုတ်ဂှ် ဂွံတီကေတ်ရ။
ဟိုတ်နူပေါဲဗ္တိုက်တုဲ ညးဒေသ ဂၠိုၚ်ကဵုလ္ၚီ နူကဵုကွာန်(ချောၚ်းနှစ်ပေါက်) ၊ တုၚ်ဃောန် ကေုာံ အေန်ဒဝ်တံ ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်တံရောၚ်ဂှ် ညးဒေသပါဲဒဴဘဲပၞာန်တံ သ္ဂးအိုတ်ရ။
တုဲကၠုၚ် ပ္ဍဲဂိတုမာတ်ချ် (၁၉) တေံ ဂကောံဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲ(တိုးဂိတ်) ဗ္ဒါဲဒဒန်ကွာန်(ချောၚ်းနှစ်ပေါက်) ဒးဒုၚ်ဗ္တိုက်တုဲ ဇီုကပိုက်ချိုတ်တံလေဝ် နွံလဝ်ရ။
ကြဴနူလလောၚ်တြးပရေၚ်အုပ်ဓုပ်ပၞာန် ပွိုၚ်ဍုၚ်တၞၚ်သဳ အပ္ဍဲဂိတုဖေဖဝ်ဝါရဳ (၂) တုဲကၠုၚ်တေံတုဲဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံစဵုဒၞါညးဍုၚ်ကွာန်တံ က္တဵုဒှ်ကၠုၚ် ပေါဲဗ္တိုက် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ