ကအ်ကြိက်၊ မာတ်ချ် (၃၀)
လ္ပာ်ကွာန်မေဝ်ကနေဝ် မၞုံအပ္ဍဲတိဍာ် ဒပ်မဟာ (၆) ခရိုၚ်ဒူပလာယာ ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ပန်ပှော် လွဟ်ဇၞော်အဆက်က် နူကဵုဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ (၁၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်တုဲ ဒးဆေၚ်ဒၟံၚ်မုက် ကုပြသၞာအခက်အခုဲ ဇွောံမစၞစ၊ ဒၞါဲမံၚ်စံၚ် ကေုာံ ဂဥုဲဇဗတံရောၚ်ဂှ် ခရိုၚ်ဒူပလာယာ လလောၚ်ပ္တိတ်လဝ်ရ။
စနူဂိတုမာတ်ချ် (၂၅) တုဲကၠုၚ်တေံတုဲ ဟိုတ်နူဂကောံဒပ်ပံၚ်ကောံမဟာမိတ် နူကဵု KNLA မသ္ကိုပ်သ္ကတံ လုပ်စိုပ်ဗ္တိုက်လဝ် ကုသၞေဟ်ကၚ်စၟဳစၟတ်ကံၚ်ဇြဳပၞာန်တံကီု သီုကဵုအပိုၚ်အခြာဒေသသွံရာန်ဗၞိက်တံ၊ ဗ္ဒိုပ်ဗၠာဲသၟိၚ်၊ ဗ္ဒိုပ်ဒပ် ကံၚ်ဇြဳပၞာန်ဂမၠိုၚ် မၞုံလ္တူဂၠံၚ်ဇၞော် ဗြဝတဳ−တေန်ဂါန်ညဳနံၚ်−ကအ်ကြိက်−ကြုၚ်ဒဵုတံဂှ်ရ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် နူကဵုလ္ပာ်ဒပ်မၚ်ပယျဵု ကံၚ်ဇြဳပၞာန် BGF တံ ဇီုကပိုက်ချိုတ်ဂျိုၚ်ဂၠိုၚ်လဝ်တုဲ ရပ်ဒက်ဂွံလဝ် ဂျိုၚ်ၚ်တံလေဝ် နွံတုဲ ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန် မစွံပွန်လဝ် လ္တူညးဍုၚ်ကွာန်တံဂှ်တုဲ ညးဍုၚ်ကွာန်ကောန်အရာပ် ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရ။
ဒဵုကဵုအခိၚ်လၟုဟ် ပရေၚ်ပၞာန်ကြံၚ်မ္ၚိုဟ်တံ နွံဒၟံၚ်ဖိုဟ်တုဲ ဒၟါနူကဵုဒပ်ကံၚ်ဇြဳပၞာန် မဖျေံသ္ဇိုၚ်တေန်ဂါန်ညဳနံၚ်တံ ပန်ပှော်လွဟ်ဇၞော်အဆက်က်တုဲ ညးဍုၚ်ကွာန်ဒေသ (၁၀၀၀) ပြၚ် နူကဵုကွာန်မေဝ်ကနေဝ်အပ္ဍဲ၊ မေဝ်ကနေဝ်မ္ၚးတံ ဒးဂြိပ်ဒဴပါဲဒလေတ်လဝ်တုဲ ဟိုတ်နူအကာဲအရာပရေၚ်ပၞာန်တုဲ ညးဍုၚ်ကွာန်ဒေသ မၞုံဗ္ဒါဲကွာန်ကြုၚ်ဒဵုတံ ကေုာံ နူကဵုကွာန်ကမိုၚ်ကုန် မၞုံဗ္ဒါဲဍုၚ်ကအ်ကြိက် ဂၠိုၚ်ကဵုလ္ၚီတံလေဝ် ဒးဂြိပ်ဒဴပါဲဒလေတ်လဝ်ရ။
ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်တံဝွံ အခိၚ်လၟုဟ် ဒးဆေၚ်ဒၟံၚ်မုက် ကုပြသၞာအခက်အခုဲ ဂဥုဲဇဗ ကေုာံ စၞစ၊ ဒၞါဲမံၚ်စံၚ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး ခရိုၚ်ဒူပလာယာ ပ္ဍဲဂိတုမာတ်ချ် (၂၈) တေံရ။
အပ္ဍဲပေါဲဗ္တိုက်ဗြဝတဳ၊ ကအ်ကြိက်၊ ကြုၚ်ဒဵုဂှ် ညးဍုၚ်ကွာန်ကောန်အရာပ် ဟွံအောန်နူကဵု (၅) တၠ ဇီုကပိုက်ချိုတ်တံ နွံလဝ်တုဲ ဗွဲမဂၠိုၚ်ဂၠေၚ် ကလိဂွံလဝ်ဝပ်နွံတုဲ စမြိုၚ်သာသနာ ကေုာံ စမြိုၚ်သ္ၚိဌာန်တံ ဗွဲမဂၠိုၚ်ဂၠေၚ် ဇီုကပိုက်လီုလာ်လဝ်တုဲ ညးဍုၚ်ကွာန်ဂၠိုၚ်ကဵုလ္ၚီ ထောံလသာသ္ၚိဌာန်တုဲ ဒးဂြိပ်ဒဴဒၟံၚ်ရ။
ကြဴနူဒပ်ပၞာန်သီအဝဵုတုဲ အပ္ဍဲပွိုၚ် (၂) သၞာံ ပ္ဍဲတိဍာ် KNU ဂှ် ဟိုတ်နူဒးဒုၚ်ဝးပ္ကဝ်အခေါၚ်အရာမၞိဟ် နကဵုနဲကဲစုၚ်ဇဳ နူကဵုဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒၟံၚ်ကွာန်ရး ဗ္ဒါဲ (၂၀၀) ဒးချိုတ်အာလဝ်တုဲ ညးဍုၚ်ကွာန် ဗၞတ် (၅၀၀) ဇီုကပိုက်ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြး ဗော်သွးကောန်ဂကူကရေၚ် KNU ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU