ယျေသဂျိုဝ် – မာတ်ချ်(၃၁)
ရးဒေသမဂွေ ပွိုၚ်ဍုၚ်ယျေသဂျိုဝ် ဗၠာဲသၟိၚ်သၟဝ်တဲကံၚ်ဇြဳပၞာန်ခေပ်ဒၟၚ်သော်တအ်ဂှ် ဟိုတ်နူဒပ်စဵုဒၞာညးဍုၚ်ကွာန်တအ် လုပ်စိုပ်ဗတိုက်လဝ်လဝ်တုဲ ညးမၞုံကဆံၚ် ဒု-သ္ကိုပ်ဗၠာဲသၟိၚ်မွဲတၠ ဒးချိုတ်အာလဝ်ရဂှ် ဒပ် Myingyan Black Tiger လလောၚ်တြးလဝ် ပရိုၚ်ရ။
ဂိတုမာတ်ချ် စၟတ်တ္ၚဲ (၂၉)တုဲကၠုၚ်ဏံ အာစိုပ်ဗတိုက်လဝ်တုဲ ကဆံၚ်ဒုသ္ကိုပ်ဗၠာဲသၟိၚ် ကေုာံ ကဆံၚ်တၞဟ်သ္အာၚ်မွဲတၠ ဇီုကပိုက် ဂွံလဝ်ဝပ်ရ။
ပရေၚ်ချဳဒရာၚ်ပၞာန်ဏံ ဒပ်လ္ပာ်မဳတောက် ဒပ်လ္ပာ်(၄) တံဒပ်ခရိုၚ်မုမ်ယွာ (၁၂) ကေုာံ ဂကောံ Myingyan Black Tiger တအ် ပံၚ်တောဲဗတိုက်လဝ်ရ။
ကောန်ဒပ်ကံၚ်ဇြဳပၞာန် ခေပ်ဒၟံၚ်သော်ရဂးတုဲ ဟိုတ်နူသတ်ပညောန် (ဖရဲသီး) ကၠုၚ်ကဵုလဝ်ပရိုၚ်ဂှ်ရ ဒပ်ကောဒေံတအ် အာစိုပ်ဗတိုက်လဝ်ရဂှ် က္ဍိုပ်သ္ကိုပ် ဂကောံ Myingyan Black Tiger ဗိုလဝ်မိုက်ခေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဗၠာဲသၟိၚ်ဒးဒုၚ်ဗတိုက်လဝ်တအ်ဂှ် စတမ်နူဂိတုမာတ်ချ် စၟတ်တ္ၚဲ (၂၉)တုဲ ဒှ်ညးလုပ်ဖျေံလဝ်ဗ္ဒပ် ပ္ဍဲဘာတိုက်ကာပ်ကျဝ် အရာပ်စၟတ်(၁) ပွိုၚ်ဍုၚ်ယျေသဂျိုဝ်ရဂှ် ဂွံတီကေတ်ရ။
ပ္ဍဲဘာတိုက်ဂှ် ဗၠာဲသၟိၚ် သၟဝ်တဲကံၚ်ဇြဳပၞာန် (၁၂)တၠ ဖျေံလဝ်ဗ္ဒပ်မံၚ်ဒၟံၚ်တုဲ အာစိုပ်ဗတိုက် ဗက်လဝ်ဂတှ်ဆီ သွက်ဗ္ဒပ်စၟဳစၟတ် Myingyan Black Tiger စၟတ်(၂) အလန်ဒုတိယရဂှ် ဗိုလ်မိုက်ခေဝ် ဟီုသ္ဂးလဝ်ရ။
ကြဴနူပေါဲဗတိုက်ဆေၚ်မုက် အကြာကရောၚ်ပၞာန်လကိုဟ်ကံၚ်ဇြဳပၞာန် ကေုာံ ဂကောံ Myingyan Black Tiger တအ် ပေါဲဗတိုက်က္တဵုဒှ်လဝ် စတမ်နူဂိတုမာတ်ချ် စၟတ်တ္ၚဲ (၁၇)တုဲဂှ် ဟိုတ်နူဇြဟတ်ဟွံသၟဟ်ညဳတုဲ ဒးဗလးထောံလဝ် ဗ္ဒပ်ဌာန်ဂအုပ်စၟတ် – ၂ တုဲ လံၚ်ချာဗ္ဂၚ်ပၞး ၜါဒကိုအ်ကီု သီုမကမ်ဂၠိုၚ်ဂၠေၚ်လေဝ် ဒးဆောံလေၚ်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ