နေဗျဳဒဝ်၊ မာတ်ချ် (၃၁)
ကရောံတၚ်သၞောတ်ဗ္ၜတ် စပ်ကဵုပရေၚ်သွံရာန် ကံၚ်ဇြဳပၞာန်သီအဝဵုဂှ် ကမၠောန် MSMEs အပ္ဍဲဍုၚ် ဂွံဖောအ်ဗြေဝ်ကၠုၚ် ရေၚ်တၠုၚ်ဟွံမာန်မွဲသာ် ဟိုတ်နူပတေၚ်ဂြတ်ကၠုၚ် ပရေၚ်ပၠောပ်ပ္တိုန်ကပေါတ်ဗၞိက်တံဂှ်ရ အပ္ဍဲကာလကၠုၚ်စိုပ်ဏံ ဒးဂဗကၠုၚ်ကဵု ကပေါတ်ဗၞိက်အောန်ကြဳတံမာန်ရောၚ်ဂှ် တၠကမၠောန်ပရေၚ်ပိုန်ဒြပ်တံ သ္ၚဳဂၠိပ်လဝ်ရ။
ဒုက္ဍိုပ်သ္ကိုပ်ပၞာန်သီအဝဵု ဒုသ္ကိုပ်ပၞာန်ဇၞော်သဵုဝေန်ဂှ် ဟိုတ်နူပရေၚ်သွံရာန်ဟွံလုပ်သၞောဝ်တံတုဲ ကမၠောန်အဇာဍောတ်၊ အဇာဒေါဝ် (MSMEs) ဂမၠိုၚ် သွက်ဂွံတောတက် ဒှ်ဒၟံၚ်အရာမတာဒၞါတံရောၚ်ဂှ် ဟီုဂးလဝ် ပ္ဍဲကောံဓရီုပ္ညဳပ္ညပ်ကမၠောန် ကမ္မတဳသ္ကိုပ်သ္က ပရေၚ်ဗ္တိုက်ပလီုသွံရာန်ဗၞိက်ဟွံလုပ်သၞောဝ် မကၠောန်ဗဒှ်လဝ် ပ္ဍဲဂိတုမာတ်ချ် (၂၉) တေံရ။
ဟိုတ်ဂှ်ရ သွက်ကမၠောန် MSMEs အပ္ဍဲဍုၚ်တံ ဂွံဖောအ်ဗြေဝ်တိုန်ဂှ် သွက်ဂွံစၟဳစၟတ်တာဒၞါ ကပေါတ်ဗၞိက် မပၠောပ်ပ္တိုန်နၚ် မသက္ကုၚုဟ် နူကဵုဍုၚ်သ္အာၚ်တံ တေၚ်ၚ်ဂြတ်တ်ဂှ်တုဲ သွက်ဂွံကေတ်ဒုဟ်ရေၚ်တၠုၚ်အာ နကဵုသၞောဝ် ဗွဲမစိုပ်တရဴဂှ် ဟီုဂးကၠုၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ကပေါတ်ဗၞိက်ပၠောပ်ပ္တိုန်နၚ် နူကဵုဍုၚ်သ္အာၚ်တံဂှ်လေဝ် ပ္ဍဲကဵုဒေသအပိုၚ်အခြာကူသာန်သွံရာန်ဗၞိက်ပယျဵုတံဂှ် ကပေါတ်ဗၞိက်မလုပ်သၞောဝ် ဍာံ၊ ဟွံဍာံဂှ် စၟဳစၟတ်ဒၟံၚ် ဗွဲမတေၚ်ဂြတ်တုဲ ဂကူအဇာဗၠေတ်အာညိဂှ်ဗက် မ္ၚးနူဂိုၚ်သီထောံဂှ် သီုကဵုကေတ်ဒုဟ်တပ်ဒဏ်တံလေဝ် ကၠောန်ၜိုတ်ဒၟံၚ်ရ။
တၠကမၠောန်ပရေၚ်ပိုန်ဒြပ်မွဲတၠဂှ် အပ္ဍဲဍုၚ်ဂှ် ဟိုတ်နူကၠောန်ပ္တိတ် ကပေါတ်ဗၞိက်တံဟွံမာန်ဂှ်ရ ဒၟါနူကဵုလ္ပာ်ကံၚ်ဇြဳပၞာန်တံ တာဒၞါဒၟံၚ် ပရေၚ်ကပေါတ်ဗၞိက်လုပ်စိုပ်တံဂှ်ရ ကပေါတ်ဗၞိက်အောန်စှ်ေတုဲ သာကြေပ်ဂြတ်ကၠုၚ်မာန်ရောၚ်ဂှ် သ္ၚဳဂၠိပ်လဝ်ရ။
“ပ္ဍဲဍုၚ်ပိုယ်တံဂှ် ကပေါတ်လ္ၚဵုတံဂှ်တှ်ေ အပ္ဍဲဍုၚ်နွံဒၟံၚ်ရဏောၚ်။ သွက်ဂွံစသုၚ်ဟီုတှ်ေ ဟွံဒးဗ္ဒဗ္ဒါဲ ကုဍုၚ်သ္အာၚ်ပုဟ်။ ကပေါတ်အရပ်စပ်မၞိဟ်၊ ဂဥုဲဇဗတံ၊ ကပေါတ်အထံက်အရီု ပရေၚ်ထတ်ယိုတ်တံ ကပေါတ်အရပ်စပ် ပရေၚ်သိုၚ်ခၞံတံသၟးရ ဒးသ္ပပဓာန်ဒၟံၚ်ညိည။ ဟီုမ္ဂး ကပေါတ်နွံပၟိက်ကာမံက်တိုန်လ္ၚဵုတံဟီုမ္ဂး အပ္ဍဲဍုၚ်ဂှ် နကဵုတၠကမၠောန်ဂမၠိုၚ် လ္တူနူကဵုသွက်ဂွံပၠောပ်နၚ် နူကဵုဍုၚ်သ္အာၚ်တံဂှ် ပ္ဍဲဍုၚ်ဇကု ပံၚ်တောဲကဵု တၠပညာတံတုဲ ပ္တိတ်ကပေါတ်ဇကုတံ ၜိုတ်မာန်ကဵုမာန်တံဂှ်တှ်ေ ပဵုခိုဟ်ဏောၚ်။ ဟွံသေၚ်မ္ဂး ခက်ဒၟံၚ်ဏောၚ်။ လက္ကရဴဏံ သွက်ဂွံကြေပ်ကၠုၚ်ရနွံ။ သွက်ဂွံထိၚ်ဒက် ပရေၚ်သွံရာန်ဗၞိက်တံ၊ ဗွဝ်ဖျာသြန်လှုဲ မဟွံညိၚ်ဝတ်ဒၟံၚ်တံ၊ ပရေၚ်သွံရာန်ဗၞိက် မဟွံသၟဟ်တး ဒှ်ဒၟံၚ်သာ်ဏံတံ ဗွဲမဂၠိုၚ်ဟီုတှ်ေ ဒးဟီုမ္ဂး နကဵုပဝ်လသဳမ္ဂး ဇြဟတ်ဍုၚ်ဂှ် နွံအပ္ဍဲဍုၚ်ရဏောၚ်။ အေ ဂှ်တှ်ေ နကဵုတၠကမၠောန်ဂမၠိုၚ် စၞးဒးပၠောပ်နၚ် နူကဵုဍုၚ်ညးတၞဟ်ဂှ် အပ္ဍဲကဵုဍုၚ်ဇကုဏံရ ကပေါတ်လ္ၚဵုလ္ၚဵုတံ ညံၚ်ဂွံပ္တိတ် ကပေါတ်မၞုံပၟိက် လ္ၚဵုလ္ၚဵုတံမာန်။ တုဲတှ်ေ လ္တူနူဗွဝ်ဖျာဍုၚ်သ္အာၚ်ဂှ် သွက်ဂွံစွံအဓိကကဵု ဗွဝ်ဖျာအပ္ဍဲဍုၚ် အေဗီုတံဏံ ဒးကလေၚ်သၠာဲဗီုပြၚ်တံဏောၚ်ထေၚ်ရ” သာ်ဝွံ သ္ဂးရ။
လ္ဂောံကဵုအကာဲအရာလၟုဟ်မ္ဂး ကပေါတ်ဗၞိက် မပ္တိတ်နူအပ္ဍဲဍုၚ်တံဂှ် ဟွံရုမ်ဂပ်တုဲ အပ္ဍဲဗွဝ်ဖျာဂှ်လေဝ် သၠဲသၠဲလးလးဟွံမွဲဒၟံၚ်ဂှ် ယဝ်ရပတေၚ်ဂြတ်ကၠုၚ် ကပေါတ်ဗၞိက် မ္ဒးပၠောပ်နၚ်နူကဵုဍုၚ်သ္အာၚ်တံဂှ်မ္ဂး နကဵုညးဍုၚ်ကွာန်တံ ဒးဒုၚ်စသိုၚ် ဘဲဒဏ်ၚုဟ်ဖျာဇၞော်သၠုၚ်တံ ဇၞော်ကဵုဇြဟတ်မာန်ဂှ် သ္ဂးရ။
ကံၚ်ဇြဳပၞာန်ဂှ် အပ္ဍဲဍုၚ်ဂှ် ပၟတ်ဓာတ်လလဳရ ညံၚ်ဂွံမှာန် ကဵုဟွံမာန်ဏီတုဲ ဒေသမွဲ သွက်ဂွံပ္တိတ်ဗၞိက်မွဲ ကေုာံ သွက်ဂွံရေၚ်တၠုၚ် ညံၚ်ကမၠောန် MSMEs တံ ဂွံဖောအ်ဗြေဝ်ကၠုၚ်ဂှ် ဖ္တိုက်ဖ္အောဝ်ဒၟံၚ်လၟိုန်ရ။
တၠကမၠောန် MSME မွဲတၠဂှ် ဟိုတ်နူပၟတ်ဓာတ်လလဳ ဟွံမှာန်တုဲ ဒးဆေၚ်ဒၟံၚ်မုက် ကုကမၠောန်လဇုဲလဇတံကီု သီုကဵုခရိတ်အိုတ်နာနာ ဇၞော်သၠုၚ်တံဂှ်တုဲ ဒးဂဗဒၟံၚ်ကဵု ပွမဒးဂိဇီုကပိုက်တံ အဆက်က်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခိၚ်ပၟတ်ပၠိုတ်တှ်ေ ကမၠောန်ဂှ် လဇုဲလဇအာရ။ ပၟတ်စက်ဂှ်တှ်ေ ဒးသုၚ်စောဲဒၟံၚ် နဒဒှ်အရန်ရ။ ဟီုမ္ဂး ကမၠောန်ဂှ် လအ်လဒၟံၚ်ညိ။ ဍေံဇြိုၚ်အာညိညရ။ အခါသုၚ်စောဲ ပၟတ်စက်ဂှ်တှ်ေ ပိုယ်တံဂှ် ကၠေၚ်အိုတ်ဏောၚ်လေဝ်။ ကမၠောန်တုဲလဇုဲ၊ ပၟတ်ဟွံကၠုၚ်တှ်ေ ကမၠောန်လဇုဲလဇအာရ။ ပိုယ်တံဂှ် ပတှ်ေပၟတ်တုဲ ဒးကၠောန်ဒၟံၚ်ကမၠောန်ဂှ်ရ ကမၠောန်လဇုဲအာတံဂှ် နွံ။ ၚုဟ်လေဗာတံ ကၠေံအာညိညရ။ ဓမ္မတာ ပိုယ်တံ ဒးတုဲကဵု (၂) တ္ၚဲဂှ် ဒးကၠောန်ဒၟံၚ် (၂) တ္ၚဲဘာ်။ ဒှ်အာမးမးတုဲ ၚုဟ်ကမၠောန်တံ၊ အခိၚ်တံဂှ် ဆောံလေၚ်အာရ။ ပြသၞာဏံဂှ် အဲမွဲဓဝ် ဒးဒုၚ်စသိုၚ်ဒၟံၚ် ဟွံသေၚ်ပုဟ်။ လၟုဟ် သီုဖအိုတ်ဂှ် ဒးဒုၚ်စသိုၚ်ဒၟံၚ်ရ။ မူဟိုတ်ရောဟီုတှ်ေ ဇၟာပ်မၞိဟ်မကၠောန်ဒၟံၚ်ကမၠောန်တံဂှ်ဝွံ ပတှ်ေပၟတ်ဓာတ်လလဳတုဲ ကၠောန်ဒၟံၚ်ကလောန်အိုတ်ဂှ်ရ မဏံဟွံဍိုက်ပေၚ်ဗက်ဂှ် သီုညးဖအိုတ် အရာမ္ဒးဂိအာတံ နွံဏောၚ်ဂှ် အဲထေၚ်ရ” သာ်ဝွံ သ္ဂးရ။
ဟိုတ်နူဟွံဂွံပၟတ်ဓာတ်လလဳ မှာန်န်ဂှ်ရ ကမၠောန် (MSME) ဗွဲမဂၠိုၚ်ဝွံ သ္ပပဓာန်ကဵုပၟတ်စက်ဇၞော်ဇၞော်တံတုဲ ဒးကၠောန်ၜိုတ်ဒၟံၚ်ဂှ်ရ ခရိတ်အိုတ် အိုတ်ဂၠိုၚ်တုဲ ကမၠောန်ဗွဲမဂၠိုၚ် ဖအောန်ဖျေံကမၠောန် ကၠောန်ၜိုတ်ဒၟံၚ်တံ နွံဒၟံၚ်တုဲ ကမၠောန်လ္ၚဵုတံဂှ် ဒးဒေါအ်ဇူထောံဒတုဲတံ နွံဒၟံၚ်ရ။
အတိုၚ်ဂလာန် တိုက်သြန်ဗဟဵုဂှ်မ္ဂး ဟိုတ်ဒၟါနူကဵု ပဋိပက္ခမက္တဵုဒှ်ဒၟံၚ် ပ္ဍဲဍုၚ်ဗၟာကီု၊ ဒဒှ်မပၟတ်ဓာတ်လလဳ ပိုတ်ပၠိုတ်ဂၠိုၚ်တံကီု ကေုာံ သီုကဵုမူဝါဒ အပြံၚ်အလှာဲတံဂှ်တုဲလေဝ် အရာမဇီုကပိုက်ပရေံပရေံ လ္တူပရေၚ်ပိုန်ဒြပ်ဍုၚ်ဗၟာတံ ဆက်နွံဒၟံၚ်တုဲ ဂျဳပဳဒဳ မၞိဟ်မွဲမွဲဂှ်ဝွံ စိုပ်အာ (၁၃) တၟံကၠံ သၟဝ်ကာလကဝ်ဝေဒ်ဟွံက္တဵုဒှ်တေံဏီဂှ် တုဲကၠုၚ် ပ္ဍဲဂိတုဂျာန္နဝါရဳ (၃၀) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Phoe Khwar