လဂုၚ် – မာတ်ချ် (၃၁)
ဗော်ဒဳမဝ်ကရေဇြဳကောန်ဂကူ (NLD) ဒက်ပ္တန်လဝ် ဗွဲမလုပ်သၞောဝ်ကီု သီုဗော်ပရေၚ်ဍုၚ်ကွာန်သ္အာၚ်တအ်ဂှ် နကဵုကဝ်မယှေန်ပေါဲရုဲမာဲကံၚ်ဇြဳပၞာန် အခေါၚ်ရိုဟ်ပလီု၊ အခေါၚ်သ္ပဒ္တန်ဟၟဲလးလးရဂှ် ဗော်ဒဳမဝ်ကရေဇြဳကောန်ဂကူ လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ(၂၉)ဏံရ။
ကံၚ်ဇြဳပၞာန် ဖံက်ပ္ကဝ်လဝ် သၞောဝ်ဥပဒေ နွံတန်တဴဒၟံၚ်တုဲတုဲဂှ် မ္ၚးနူဟွံလုပ်ကဵုသၞောဝ် ပရေၚ်သ္ပစၞးကဵုညးဍုၚ်ကွာန်လေဝ် ဟိုတ်နူဟၟဲဂှ်ရ ပရေၚ်ညးတအ်ကၠောန်ရေၚ်တၠုၚ်ဒၟံၚ်အလုံအိုဿီု ဟွံလုပ်ကဵုသၞောဝ်ရဂှ် နကဵုကဝ်မတဳကေၚ်ကာဗဟဵု NLD လလောၚ်တြးလဝ် နကဵုစၟတ်တ္ၚဲ ၇/၂၀၂၂၊၁၀/၂၀၂၂၊၁၂/၂၀၂၂ ကၠးကၠးတၟးတၟးတုဲဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
နူအခိၚ်ကံၚ်ဇြဳပၞာန်သီအဝဵုတေံ သွက်ဂွံဝးပ္ကဝ်တၚ်စၟဳပတှ်ေညးဍုၚ်ကွာန် ကေုာံသွက်ဂွံရုပ်သီ ရိုဟ်ပလီု ဗော် NLD မဒှ်ဗော်ဇၞးလဝ်မာဲသၞာံ (၂၀၂၀)ဂှ် ရန်လဝ်နွံတုဲ ပွမရပ်စပ် က္ဍိုပ်သ္ကိုပ်ဗော်ကဆံၚ်လ္တူ၊ ကၠောန်ဗဒှ်ဂဗုတ်ဟွံဗဗွဲဓဝ်တုဲ ဖျေံကၠုၚ်ဒၟံၚ်ထံၚ်စာတ်ရ။
လုကဴညးဍုၚ်ကွာန်သှ်ေၜက်ဒၟံၚ်ဏီမ္ဂး ဗော်နွံတန်တဴဒၟံၚ်လၟိုန်တုဲ စဵုကဵုတၚ်ရန်တၟံညးဍုၚ်ကွာန်တအ် ဂွံဍိုက်ပေၚ် ပ္တိတ်အာဇြဟတ် နကဵုနဲကဲဂၠံၚ်ဍာန်စုၚ်ကီု ဒတူလာၚ်အာ ကရောံညးဍုၚ်ကွာန်တအ်မွဲစွံတုဲ ဗော်ပရေၚ်ဍုၚ်ကွာန် ဟွံပ္တိုန်စၟတ်သမ္တီတအ်ဂှ်လေဝ် သ္ပရှ်ေသှ်ေ သ္ပဒၟံၚ်စၟတ်သမ္တီရဂှ် ဓမံက်ထ္ၜးလဝ်ပ္ဍဲတၚ်လလောၚ်တြးဂှ်ရ။
ဗော်ဒဳမဝ်ကရေဇြဳကောန်ဂကူ စက္ဍတ်ပါ်တိတ်ကၠုၚ် နူပၠန်ဂတးဒဳမဝ်ကရေဇြဳ သၞာံ ၁၉၈၈ ဂှ် ရေၚ်တၠုၚ်ကဵုဒၟံၚ်က္ဍိုပ် တၚ်စၟဳပတှ်ေ ဒတုဲမြမောဝ် ညးဍုၚ်ကွာန်ဟေၚ်တုဲ ဒှ်ဗော်ဒုၚ်ဂိုၚ်ကေတ်လဝ် သ္ဂုတ်သွာတ်ညးဍုၚ်ကွာန်ဟေၚ်ရဂှ် ဂွံတီကေတ်ရ။
အခိၚ်လၟုဟ်ဏံမ္ဂး ကံၚ်ဇြဳပၞာန် လုပ်စိုပ်လောန်ၜက် ပလီုပလာ်လဝ် ရုၚ်ရးဒေသ၊ ခရိုၚ်၊ ပွိုၚ်ဍုၚ် မပါလုပ်သီု ရုပ်ဂအုပ်ဗဟဵု လၟိဟ်(၁၂၀) ဝါပြၚ်ကီု ရပ်ကေတ်ဒၟံၚ် ကောန်ဗော်တအ်လေဝ် အဆက်က် နွံကၠုၚ်ဒၟံၚ်တုဲ ကောန်ဗော်(၂၆)တၠတအ်လေဝ် ဒးပြဟ်လလုဲလဝ် ပ္ဍဲပရေၚ်စၟတ်သၟာန် ကေုာံပ္ဍဲထံၚ်တအ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ညးဒးဒုၚ်ပန်ဂစိုတ်လဝ်ကဵု ကံၚ်ဇြဳပၞာန်(၆၃)တၠနွံတုဲ ဥူကျဝ်ဇေယျ ညးမဒှ်ကဝ်မတဳဗဟဵုမွဲတၠဂှ်လေဝ် ဒးဒုၚ်ဖျေံလဝ် ဒဏ်ဒက်ဂစိုတ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်)(မ်)
ဗီုရုပ် – NLD