ဒဳမအ်ဇြော၊ မာတ်ချ် (၃၁)
တွဵုရးကရေၚ်ဍာဲ၊ ပ္ဍဲကွာန်ပါဲပၞာန် မၞုံလ္ပာ်ပလိုတ်ဒဳမအ်ဇြောတအ်ဂှ် ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ်တုဲ ညးဒေသ(၁)တၠ ဒးချိုတ် ဂွံလဝ်ဘဲဝပ် (၄)တၠရဂှ် ညးရီုဗၚ်ကဵုဒၟံၚ် ပရေၚ်ပါဲဘဲပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမာတ်ချ် စၟတ်တ္ၚဲ(၂၈) တုဲကၠုၚ် အခိၚ်ဇိုၚ်သဝ်တ္ၚဲဂှ် သီုပေါဲဗတိုက်ဟၟဲမွဲသာ် ကၠုၚ်စိုပ်ဂြာတ်ထောံဖျေံဗုမ် ပ္ဍဲသ္ကုတ်ပလိုတ်ဒဳမအ်ဇြော နကဵုက္ၜၚ်ကျာရ။
လၟုဟ်ဏံဂှ် တၚ်ဂၞၚ်ညးဇီုကပိုက်ဒးလဝ် ကေုာံယၟုကွာန်တအ်ဂှ် ဟိုတ်နူပရေၚ်ဂီုကၠီုတုဲ ဓမံက်ထ္ၜးဟီုဂး ဟွံဂွံဏီရဂှ် ညးကဵုဒၟံၚ်ရီုဗၚ်ပရေၚ်ပါဲဘဲပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲသ္ကုတ်ပလိုတ်ဒဳမအ်ဇြောဂှ် ဒှ်ဒၞာဲညးပါဲဘဲပၞာန် ပ္ဍဲတွဵုရးကရေၚ်ဍာဲ မံၚ်တန်တဴဒၟံၚ်ဂၠိုၚ်အိုတ်တုဲ ပ္ဍဲဒၞာဲဂှ် လ္ပာ်ကံၚ်ဇြဳပၞာန်ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲကီု ပရေၚ်ကၠုၚ်ပန်ပှ်ောဒၟံၚ် နကဵုက္ၜၚ်ကျာတအ်လေဝ် ကၠောန်သ္ပဒၟံၚ် ခြာဟွံလအ်ဟွံလအ်ရ။
ပ္ဍဲဂိတုဏံသ္ကုတ်ကၠာဂှ် ဟိုတ်နူပေါဲဗတိုက်တုဲ ပ္ဍဲလ္ပာ်ပလိုတ်ဒဳမအ်ဇြော ညးပါဲဘဲပၞာန် သာဂၠိုၚ်တိုန်ကၠုၚ်ဒၟံၚ်ကီု ပ္ဍဲလ္ပာ်ဗၟံက်ဒဳမအ်ဇြောလေဝ် ဒးဆေၚ်ဒၟံၚ်မုက်ကဵု အကာဲအရာညးဍုၚ်ကွာန် ပါဲဒဴဘဲပၞာန်တအ် ဆိုအ်ဗဒၟံၚ်ရ။
အတိုၚ်ညးချဳဒရာၚ်ပရေၚ်ပါဲဘဲပၞာန်တအ် ဟီုသ္ဂးလဝ်မ္ဂး ပ္ဍဲသၞာံ ၂၀၂၃ ဏံ ကံၚ်ဇြဳပၞာန် ဗတိုက်ကၠုၚ်ကဵုက္ၜၚ်ကျာ ပ္ဍဲတွဵုရးကရေၚ်ဍာဲ ဟွံအောန်နူ (၁၃)ဝါရဂှ် ဂွံတီကေတ်ရ။
အတိုၚ်တၚ်လလောၚ်တြး ဂကောံအခေါၚ်အရာမၞိဟ်ကရေၚ်ဍာဲ ( KnHRG ) လလောၚ်တြးလဝ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲတွဵုရးကရေၚ်ဍာဲ သၟာဒဒိုက်ဘဲပၞာန် ဒးဂြိပ်ဒဴဒၟံၚ် (၁၈၀,၀၀၀) နွံကၠုၚ်ဒၟံၚ်တုဲ ပ္ဍဲကဵုဂှ် ကောန်ၚာ်သၟတ် (၃၀)တၟံကၠံ ပါလုပ်ဒၟံၚ်ရဂှ် ဓမံက်ထ္ၜးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNDF