ၜဳကလေၚ်၊ ဨဗြဴ(၉)
တွဵုရးဍုၚ်မန် ပွိုၚ်ဍုၚ်ၜဳကလေၚ် ပ္ဍဲဂၠံၚ်ကွဳစက် လဂုၚ်-မတ်မလီု ဗ္ဒာဲရုၚ်စက်တာယာ ကွာန်ပလိုၚ်တၟံဂှ် ကွဳစက်ဟိုက်ဂျေတ်ကဵု ကွဳစက်ပ္ဍိုက် ညးအာတရဴ (မှန်လုံ)တအ် ဒှ်လဝ်ပရေၚ်တေက်ဇီုလဝ်ညးသ္ကအ်တုဲ ချိုတ်လဝ် (၁) တၠ ဒးလဝ်ဝပ် (၅) တၠရဂှ် ဂကောံရီုဗၚ်ဟံၚ်ပြာ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဨဗြဴ စၟတ်တ္ၚဲ (၈) အခိၚ်နူဂယးဂှ် ကွဳစက်ဟိုက်ဂျေတ် ဒဳစှ်ေကၠုၚ် နူလ္ပာ်ကျာ်ထဝ် ကေုာံ ကွဳစက်ပ္ဍိုက်ညးအာတရဴ ဒဳတိုန်ကၠုၚ် နူလ္ပာ်မတ်မလီုတအ်ဂှ် ဒှ်လဝ်ပရေၚ်တေက်ဇီုရ။
ပရေၚ်ယာဉ်ကွဳစက်တေက်ဇီုဏံဂှ် ကွဳစက်ဟိုက်ဂျေတ် ထိၚ်အသိၚ်ဟွံမာန်တုဲ ဂၠံၚ်ၜက် လုပ်စိုပ်အာဇီုဒးလဝ် ကွဳစက်ပ္ဍိုက် ညးအာတရဴ မၞုံပ္ဍဲဂၠံၚ်မွဲလ္ပာ်တေံဂှ်တုဲ ဂဗုတ်ယာဉ်ဇီုတေက် က္တဵုဒှ်လဝ်ရ။
ဟိုတ်နူပရေၚ်ယာဉ်ကွဳစက်ဇီုလဝ်တုဲ ကိုဝ်ကောၚ်ခကျဝ် ညးဒဳကွဳစက်ဟိုက်ဂျေတ်ဂှ် ပ္ဍဲဒၞာဲဒှ်ပရေၚ်ပရောဂှ်ဟေၚ် ဒးချိုတ်လဝ်တုဲ ညးဗြဴပါဗက်ကၠုၚ် ပ္ဍဲကွဳစက်ဟိုက်ဂျေတ် (၃)တၠ ကေုာံမၞိဟ်တြုံဍိုက်ပါဗက်ကၠုၚ် ကွဳစက်ပ္ဍိုက်ညးအာတရဴ (၂)တၠတအ် ဒးလဝ်ဝပ်ရ။
ပ္ဍဲကဵုညးဗြဴဒးလဝ်ဝပ် (၃)တၠဂှ် ဟိုတ်နူ ဒးလဝ်ဘဲဝပ်သ္ကာတ်မြဟ် (၁) တၠဂှ်ရ ပလံၚ်ဗစိုပ်ဏာလဝ် ရုၚ်ဂဥုဲညးဍုၚ် ကွာန်ခရိုၚ်သဓီုရဂှ် ဂွံတီကေတ်ရ။
ပ္ဍဲဂၠံၚ်ကွဳစက် လဂုၚ် -မတ်မလီုဂှ်မ္ဂး ပရေၚ်ယာန်ကွဳစက်ဇီု က္တဵုဒှ်ဒၟံၚ်ဟွံလအ်ဟွံလအ်တုဲ ပ္ဍဲပရေၚ်ပရောတအ်ဂှ် ညးဍုၚ်ကွာန် အာတရဴဂမၠိုၚ် ဇီုကပိုက်ဒးချိုတ်လဝ် နွံကၠုၚ်ဒၟံၚ်ရ။
ပရိုၚ်- သြၚ်လောန်တိုၚ်(မ်)
ဗီုရုပ် – Social Media