ပ္ဍဲတွဵုရးဍုၚ်မန် ကြဴနူကံၚ်ဇြဳပၞာန် ကလေၚ်ဗလးကဵု ကောန်ထံၚ်တံတုဲဂှ် ပရေၚ်ကၠတ်ဂၠံက်ကွဳလိုန်ဓာတ်တံ သာဂၠိုၚ်ကၠုၚ်

မတ်မလီု၊ ဨပရဴ (၂၆)

ပ္ဍဲတွဵုရးဍုၚ်မန် နဒဒှ်စၟတ်သမ္တီကၠောံသၞာံတၟိဂှ် ကံၚ်ဇြဳပၞာန်သီအဝဵု ကြဴနူကလေၚ်ဗလးကဵု ကောန်ထံၚ်မဒးဒၟံၚ်ထံၚ် နကဵုဂဗုတ်ကၠတ်ဂၠံက်ပၠံၚ်ၜးတံဂှ်တုဲဂှ် ပရေၚ်ကၠတ်ကွဳလိုန်ဓာတ်တံ သာတုဲက္တဵုဒှ်ကၠုၚ်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဨပရဴ (၁၇) ပ္ဍဲတ္ၚဲသၞာံတၟိမံက်ဂှ် ကလေၚ်ဗလးကဵုလဝ် ကောန်ထံၚ် (၂၂၄) တၠ နူကဵုထံၚ်စာတ် မၞုံအပ္ဍဲတွဵုရးဂှ်တုဲ ညးမကလေၚ်ဗၠးကၠုၚ်တံဝွံ ညးမဒးဒုၚ်ဖျေံလဝ်ထံၚ် နကဵုဂဗုတ်ကၠတ်၊ ဂဗုတ်ပၠံၚ်ၜး၊ ဂဗုတ်ဂဥုဲၜူမာဲတံ ပါလုပ်ဂၠိုၚ်အိုတ်ဂှ် ဂွံတီကေတ်ရ။

ကံၚ်ဇြဳပၞာန်ဂှ် နဒဒှ်စၟတ်သမ္တီကၠောံသၞာံတၟိ ကြဴနူကလေၚ်ဗလးကဵု ကောန်ထံၚ်ဂမၠိုၚ်တုဲဂှ် ပရေၚ်ကၠတ်ဂၠံက်ကွဳလိုန်ဓာတ်တံ ဂၠိုၚ်ကၠုၚ် နူကၠာတေံတုဲ လၟေၚ်ဒဒှ်တ္ၚဲ ပရေၚ်ကၠတ်ဂၠံက်ကွဳလိုန်ဓာတ်တံ က္တဵုဒှ်ဒၟံၚ်တုဲ ယဝ်ရကွဳလိုန်ဓာတ် ကၠေံခၞၚ်မ္ဂးလေဝ် ကလေၚ်ဂွံလဝ် ဟွံမွဲပုဟ်ဂှ် ညးဒေသတံ သ္ဂးအိုတ်ရ။

ညးဒေသမွဲတၠဂှ် ပ္ဍဲကဵုပရေၚ်ကၠတ်ဂၠံက်ကွဳလိုန်ဓာတ်တံဂှ် ဗွဲကြဴဏံ ဒက်က္ဍိုပ်တုဲ ကၠတ်ကၠုၚ်ကဵုဂကောံတံ နွံကၠုၚ်တုဲ CCTV မစုတ်လဝ် အပ္ဍဲဍုၚ်ဂှ်လေဝ် ဟိုတ်နူပၟတ်ဟွံကၠုၚ်တုဲ ပတှ်ေစဟွံဂွံပုဟ်ဂှ် ဟီုရ။

“အဏံ တုဲကၠုၚ်ၜါပိတ္ၚဲဏံ ကွဳလိုန်ဓာတ် ကၠေံအာ (၃) ဖ္ဍိုက်။ ကၠေံအာတုဲ လအာတုပ်သာ်ဂှ်ပၠန် ပ္ဍဲကဵုအခိၚ်ဗ္တံ မာယှေဝ်ဠဝ် (၁) နာဍဳ (၂) နာဍဳဂှ် ဒက်က္ဍိုပ်တုဲ ကၠတ်ကွဳလိုန်ဓာတ်တံရ။ ညအ်လေဝ် ရပ်ဟွံဂွံပုဟ်။ သ္ၚိသ္ကဲသ္ကဲဂှ်လေဝ် ဟွံဂံၚ်ကရေဲပုဟ်။ ယဝ်ရကရေဲဒးတှ်ေ ကၠုၚ်ဂစိုတ်ဏာဇကုဟာ သာ်ဏံနွံရ။ မုဒှ်ရောတှ်ေ ကၠအ်မကၟာတ်လဝ်ဂှ် ပံက်ကသအ်တုဲ လုပ်အာလဝ်ဏောၚ်လေဝ်။ ညးဍုၚ်ကွာန် ကောန်အရာပ်တံဂှ်လေဝ် ကမၠတ်ဏံကၠတ်တုဲ သွက်ဂွံကညာၚ် ကမၠတ် ကမၠတ်ဟီုဂှ်လေဝ် ကညာၚ်ပ္ဍဲကဵုကၠအ်ဇကု၊ ပ္ဍဲအကြာဂၠံၚ်ဇကုတံရဂွံ၊ ဟွံဂံၚ်တိတ်ဂၠံၚ်ဇၞော်ပုဟ်။ ယဝ်တိတ်ဂၠံၚ်ဇၞော်တှ်ေ ဒးဒုၚ်ရပ်ဒက်ဏောၚ်။ ကိုပ်ကၠာဂှ်တှ်ေ စုတ် CCTV ဏောၚ်ဟီုမ္ဂး ဗီုလဵုဒှ်ဒှ် သွက်ညးလ္တူဍုၚ်တံ သွက်ဂီုကၠီုသ္ၚိဇကုဂှ် ပြေပြံၚ်ဏောၚ်ဂးတုဲ ပတှ်ေလဝ်ရ။ CCTV ဏံဟီုဂှ် သွက်ဍေံဂွံဂေတ်ဂြိပ်ဂှ် ပၟတ်နွံမှဒှ်ဏောၚ်။ လၟုဟ်ဂှ် ပၟတ်ဟွံမွဲတုဲ ပ္ဍဲကဵုလၟေၚ်ဒဒှ်ဗွဲမဂၠိုၚ်ဂှ် ဟိုတ်နူပၟတ်ဏံတုဲ စုတ် CCTV တုဲ ဟွံပြေပြံၚ်မွဲသာ် ရပ်ညးမကလိလောန်တံ ဟွံဂွံဂှ် တၟာဂလိုၚ်ဏောၚ်။ အေ ဂှ်တှ်ေ ပိုယ်တံ CCTV လေဝ် ပတှ်ေဟွံဂွံပုဟ်။ ပ္ဍဲကဵု CCTV သ္ၚိဇကုရဂှ် ပၟတ်ဟွံမွဲတုဲ ရပ်ရဲကၠတ်တံဂှ်ဟွံဂွံပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် နကဵုညးဍုၚ်ကွာန်တံ ဒးဒုၚ်ကၠတ်ကွဳလိုန်ဓာတ်တံတုဲ ယဝ်ရအာတေၚ် ဇရေၚ်ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံဂှ်မ္ဂးလေဝ် နကဵုတၚ်ထ္ၜးဟိုတ် ပရေၚ်ဂီုကၠီုဍေံတံဂှ် ကေတ်ဒုဟ်ရေၚ်တၠုၚ်ကဵု ဗွဲမစိုပ်တရဴဟွံမွဲတုဲ ၜိုန်ရထ္ၜး နကဵုသက်သဳတံကီုလေဝ် ဂၠိုက်ဂၠါဲစုစာမ် ရပ်ဒက်ကဵုဟွံမွဲပုဟ်ဂှ် သ္ဂးရ။

ညးဒေသ ကွဳလိုန်ဓာတ်ကၠေံအာမွဲတၠဂှ်လေဝ် ကွဳလိုန်ဓာတ်ဂမၠိုၚ်ဝွံ နကဵုပရူပရာလၟေၚ်ဒဒှ်နာနာဂှ် ကၠေံဒၟံၚ်တုဲ ယဝ်ရအာတေၚ် ကုဂကောံဒပ်ဗၠာဲသၟိၚ်တံမ္ဂးလေဝ် သ္ဂောံကလေၚ်ဂွံ စဵုကဵုဟွံမွဲ အောန်ဒၟံၚ်ဂှ် ဟီုရ။

“မွဲတ္ၚဲ ၜိုတ် (၅) ဖ္ဍိုက်ကၠေံဒၟံၚ်ရောၚ်ဂှ် ဂွံမိၚ်ကေတ်ရ။ တ္ၚဲဒြပ်ပိုယ်ကၠေံဂှ်တှ်ေ ဂွံမိၚ်ကေတ်ဂှ် (ငမွေဒိုး) သၟးရ ကၠေံအာ။ ဂကူဏံသၟးဂှ် ကၠေံအာ ၜိုတ်ပိဖ္ဍိုက်။ ကၠေံအာ ဒဵုကဵုကဆံၚ်ဏံရ။ အခိၚ်မဒေါအ်လဝ်ကွဳလိုန်ဓာတ်ဂှ် ဒးဒုၚ်ကၠတ်ဏာလဝ်ရ။ အဟိန်စွံလဝ်ပ္ဍဲသ္ၚိဖိုဟ် လုပ်ပ္ဍဲသ္ၚိတုဲ ဒးဒုၚ်ကၠတ်တံလေဝ် နွံ။ တေၚ်ဂှ် တေၚ်ဒၟံၚ်ရ။ အာပ္တိုန်လဝ်အမှုရ။ ဍေံတံဂှ် ဆဵုတှ်ေ ကလေၚ်ကဵုပရိုၚ်ဏောၚ် ၜိုတ်ဏံရ၊ ဂွံကလေၚ်ဂွံဂှ် ဟွံမွဲပုဟ်” သာ်ဝွံ သ္ဂးရ။

မွဲလ္ပာ်ပၠန်ဂှ် ကံၚ်ဇြဳပၞာန် နကဵုတၚ်ထ္ၜးဟိုတ်ပရေၚ်ဂီုကၠီုတုဲ ပ္ဍဲကဵုပွိုၚ်ဍုၚ် မၞုံအပ္ဍဲတွဵုရးတံဂှ် သုၚ်စောဲဇြဟတ်ဗွဲမဂၠိုၚ်ဂၠေၚ်တုဲ ဂေတ်ကၚ်ကီု၊ နကဵုပရေၚ်ဂီုကၠီု ပ္ဍဲကဵုဒၞါဲမဒှ်အဓိကတံဂှ် ဂၠိုက်ဂၠါဲစၟဳစၟတ်တံကီု၊ အပ္ဍဲအရာပ်ဂမၠိုၚ် ၜိုန်ရကၠောန်ဒၟံၚ် ပရေၚ်စၟဳစၟတ်စရၚ်ကၟုဲတံကီုလေဝ် မၞိဟ်ကၠတ်ကွဳလိုန်ဓာတ်တံဂှ် ရပ်ဂွံလဝ် ဟွံမွဲရ။

အခိၚ်လၟုဟ် ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံဝွံ ပွမရပ်ဒက် ညးမကၠတ်ဂၠံက်တံဟွံမွဲမွဲသာ် ကုညးသၟတ်ဒေသတံဂှ် ဆက်စပ်ကဵု ဂကောံဒပ်စဵုဒၞါညးဍုၚ်ကွာန် (PDF) ဂးတုဲ ထ္ၜးဟိုတ်နာနာတုဲ ရပ်ဒက်စၟဳစၟတ် အာတ်သၠုဲတံဂှ်ဟေၚ် ကၠောန်ဒၟံၚ်အဓိကရောၚ်ဂှ် ညးဒေသတံ သ္ဂးအိုတ်ရ။

ပ္ဍဲတွဵုရးဍုၚ်မန် ကြဴနူဒပ်ပၞာန်သီအဝဵုတုဲ ပရေၚ်သၞောဝ်အုပ်လဒံဂှ် သုန်ဂြာံအာကြပ်ပေၚ်ၚ်တုဲ အရိုဟ်ဒဒှ်တ္ၚဲ ကွဳလိုန်ဓာတ်ကၠေံကီု၊ ကပေါတ်အရပ်အရာ အပ္ဍဲသ္ၚိတံ ဒးဒုၚ်ကၠတ်သၟးဟွံက ဂစိုတ်မၞိဟ်တုဲ ပရေၚ်ပၠံၚ်ၜးတံလေဝ် က္တဵုဒှ်ဒၟံၚ် မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ