အပ္ဍဲပွိုၚ်ၜါသၞာံသွက်ဂွံစကၠောန်ပ္တိတ် ကမ်လှောဝ်ထိၚ်သၞေဝ်ဂှ် အဝ်သတြေလျ ရန်တၟံလဝ်

သေဒ္ဒနဳ၊ ဨပရဴ (၂၇)

နကဵုဍုၚ်အဝ်သတြေလျ ဟိုတ်နူကၠောန်ကၠုၚ် အစဳဇန်ပရေၚ်စဵုဒၞါတံ သၠဲသၠဲလးလးဂှ်ရ သွက်ဂွံစွံအာရီု ကုဇြဟတ်ပန်ပှော်ခြာဇမ္ၚောဲတံမာန်ဂှ်ကဵု ပရေၚ်ကၠောန်ပ္တိတ်ကမ်လှောဝ်ထိၚ်သၞေဝ်တံဂှ် ပြဟ်ဒၟံၚ် လ္တူနူစၟဳစလဝ်တေံ (၂) သၞာံတုဲ ပ္ဍဲသၞာံ ၂၀၂၅ ဏံ စကၠောန်အာ အပ္ဍဲဍုၚ်ရောၚ်ဂှ် လလောၚ်ပ္တိတ်လဝ်ပရိုၚ်ရ။

ဍုၚ်ကြုက်ဝွံ ဟွံမွဲကဵုပရေၚ်ကၠးမှးတုဲ စနူအခိၚ်ပၞာန်ဂၠးကဝ် ဒုတိယတုဲဂှ် ပ္ဍဲဍုၚ်လဵုဟွံဟီု ဒဒှ်ရစကၠောန်ကၠုၚ်လဝ် ပရေၚ်ဒက်ပ္တန်ပရေၚ်ပၞာန် ဇၞော်အိုတ်ဂှ်ကီု၊ အရာမကဵုကသပ် ကလေၚ်သ္ၚဳဂၠိပ် စပ်ကဵုပရေၚ်စဵုဒၞါ အရာမပြိုၚ်ပ္ကာန်ဇြဟတ်အဓိက ပဋိပက္ခမက္တဵုဒှ်မာန် ပ္ဍဲအေန်ဒိုဝ်−ပသိဖေခ်တံဂှ်လေဝ် ဒဒှ်ရဒုၚ်တဲဂှ် အလဵုအသဳ လလောၚ်ပ္တိတ် ဟီုဂးကၠုၚ်ရ။

ပ္ဍဲသၞာံ ၂၀၂၇ အခိၚ်မစၟတ်လဝ် သွက်ဂွံကၠောန်ပ္တိတ် လွဟ်လက်နက်ထိၚ်သၞေဝ် အပ္ဍဲဍုၚ် နူတမ်ဝါဒိတေံဂှ် သွက်ကိုန်စဳမာန်ဂှ် ထပ်ပါ်ပရအ်ကဵု အမေရိကာန်ဒဝ်ဠာ (၂ ဒဿမ ၅) ဗဳလျာန်တုဲ အပ္ဍဲပွိုၚ်ၜါသၞာံ သၠုၚ်ပ္တိုန်အာအသိၚ်ရောၚ် ဝန်ဇၞော်ကာစဵုဒၞါ ရေတ်ချက်မာလေသ် ဟီုဂးလဝ် ပ္ဍဲကဵုအခန်သၟာန်သၟုက်ဆဵုဂဗ ကုမဳဒဳယျာတံရ။

ဣဏံဝွံ နူကဵုပရဝ်ဂျက်ပရေၚ်စဵုဒၞါ မပလီုလဝ်တေံဂှ် ဒဒှ်ရသ္ပစၞး သွက်သြန်ဗွဝ် ပြံၚ်လဝ်ဂၠံၚ်တရဴ မပဵုတိုန်ကၠုၚ်ၜါဆပြၚ်တံကီုဏောၚ်ဂှ်လေဝ် သ္ဂးရ။

“ညအ်ဂှ် စပ်ကဵုအစောံစရာဲ ပရေၚ်ကၠောန်ပ္တိတ်ဗၞိက်တုဲ အခိၚ်ကာလဂှ် သ္ကဵုပြံၚ်အာ တီတီဒှ်ဒှ်ရ” သာ်ဝွံ ပ္ဍဲတ္ၚဲဗုဒ္ဓဝါတေံ ပ္ဍဲကဵုအေန်တာဗျူ ကုပရိုၚ်အေဂျေန်ဇြဳ Nine မွဲဂှ် ညးဟီုလဝ်ရ။

သြန်ဒဝ်ဠာအမေရိကာန် (၁ ဒဿမ ၆) ဗဳလျာန်တၞဟ်ပၠန်ဂှ် ရပ်စပ်အာ အပ္ဍဲပွိုၚ်ၜါသၞာံ သွက်ဂွံရာန် သၞောတ်ပန်ပှော်ခြာဇမ္ၚောဲ နူကဵုဍုၚ်သ္အာၚ်တံရောၚ်ဂှ် ညးထပ်ဟီုလဝ်ရ။

သွက်ပရေၚ်ကၠောန်ပ္တိတ် ပ္ဍဲအဝ်သတြေလျရဂှ် အလဵုအသဳဝွံ ဒဒှ်ရသဳကၠဳဒၟံၚ်ကဵု ကမ္ပဏဳကၠောန်ပ္တိတ်ကမ်လှောဝ်

Raytheon (RTX.N) ၊ ကမ္ပဏဳ Lockheed (LMT.N) တံယျဂှ်လေဝ် ညးဟီုလဝ်ဏီရ။

ကုကမ္ပဏဳ ကၠောန်ပ္တိတ်ကမ်လှောဝ်ပရေၚ်ဗ္တိုက် ဒပ်ဍာ်နဝ်ဝေ Kongsberg (KOG.OL) ဂှ်လေဝ် ကၠောန်သ္ပလဝ် ပရေၚ်သဳကၠဳတံတုဲ နူအဝ်သတြေလျ ဒဒှ်ရတုပ်လဝ်စိုတ် သွက်ဂွံရာန်ကေတ်တုဲယျဂှ်လေဝ် ညးထပ်ဟီုလဝ်ရ။

ဝန်ဇၞော်ကမၠောန်ကွတ်စက်ပရေၚ်စဵုဒၞါဂှ် ပ္ဍဲကဵုလိက်ကဵုသပ် နူလိက်စံၚ်တၚ်သ္ၚဳဂၠိပ်တံဂှ် ကဵုလဝ်ကသပ် သွက်ဂွံရာန်ကေတ် ကမ်လှောဝ်ဗ္တိုက်ပံၚ်တောဲ Kongsberg ဂှ်တုဲ သွက်ဂွံကဵုဂကောံဗော်သွး မကၠောန်ပ္တိတ်ကမ်လှောဝ် မၞုံပ္ဍဲအဝ်သတြေလျတံ ဂွံဗဵုကျောဝ်ရောၚ်ဂှ် ဟီုဂးလဝ်ရ။

အဝ်သတြေလျဝွံ သွက်ဂွံတာဒၞါ ပဋိပက္ခဂှ်ကီု၊ သွက်ဂွံသၠုၚ်ပ္တိုန် ပရေၚ်ဆက်ဆောံ စပ်ကဵုပရေၚ်စဵုဒၞါ နကဵုဍုၚ်အာယှဒိုဟ်အဂၞဲ၊ ဂျပါန်၊ အိန္ဒိယ ကေုာံ တ္ကအ်ပသိဖေခ်တံဂှ်တုဲ အခိၚ်မသၠုၚ်ပ္တိုန် ကေၚ်ကာကလုတ်တမာန် အပ္ဍဲဒေသတံဂှ် ကၠောန်ၜိုတ်အာ ကရောံမဟာမိတ်ပရေၚ်ဂီုကၠီုညး အမေရိကာန် ကြပ်ပ်ရောၚ်ဂှ်လေဝ် ဂွံတီကေတ်ရ။

Ref: Reuters